Ntiense Jehovah kiet emi ekerede Virginia ọdọn̄ọ udọn̄ọ emi ẹkotde locked-in syndrome. Udọn̄ọ oro anam enye nte akpauben̄ ekpo. Enye ekeme ndikụt n̄kpọ, okop n̄kpọ, ọbọp enyịn, atat, onyụn̄ ọwọn̄ọde ibuot ekpri ekpri. Edi enye ikemeke nditịn̄ ikọ, ikemeke ndidia udia. Mbemiso udọn̄ọ emi, idem ama ọsọn̄ enye, enye onyụn̄ okop odudu. Edi usenubọk usen kiet ke 1997, enye ama okop ọkpọsọn̄ ubiak ke ekọt nte ẹda ikwa ẹsiak enye, ubiak oro inyụn̄ imaha nditre. Ebe esie ama emen enye aka ufọkibọk. Mbubreyo usen oro enye ama osụhọ, ete iset, urua iba ebe. Ini enye esetde edi, enye edikụt idemesie ke itie ufọkibọk emi ẹsisede ẹban̄a mbon emi ẹdọn̄ọde n̄kpa n̄kpa, ikemeke ndinyịghede idem, ẹnyụn̄ ẹfak enye masịn ke ibuo man ekeme ndin̄wek ibifịk. Ke ufan̄ usen ifan̄, enye iketịghi n̄kpọ ndomokiet, ikam idiọn̄ọke m̀mê imọ idi anie.

 Virginia etịn̄ se iketịbede ke enye ama ekedidiọn̄ọ idem. Enye ọdọhọ ete: “Mma ntọn̄ọ nditi n̄kpọ sụn̄sụn̄ sụn̄sụn̄. Mma mbọn̄ akam etieti. Eyen mi erenowo ekedi eyen isua usụkkiet ini oro, n̄konyụn̄ nyomke ndikpa n̄kpọn̄ enye. Mma ndomo nditi ediwak itie Bible emi n̄kọdiọn̄ọde man ọsọn̄ọ mi idem.

 “Ekem mme dọkta ẹma ẹdisio mi ke itie emi ẹsisede ẹban̄a mbon emi ẹdọn̄ọde n̄kpa n̄kpa ẹka itie efen. Ke ofụri ọfiọn̄ itiokiet, mma nsan̄a nsio nsio ufọkibọk ye itie emi ẹsin̄wamde owo emi ọkọduọde idiọk udọn̄ọ afiak ekeme ndinam ndusụk se enye ekesinamde. Utịt utịt, ẹma ẹdọhọ ẹmen mi ẹnyọn̄ ufọk. N̄kosụk n̄kemeke ndimenede itie ndomokiet ke idem mi. Akana ẹn̄wan̄wam mi ẹnam kpukpru n̄kpọ. Ikenemke mi ke usụn̄ ndomokiet! Eketie mi nte nnyeneke ufọn nnọ mme owo, nnyụn̄ nnyeneke ufọn nnọ Jehovah. Mma nnyụn̄ n̄kere n̄ko m̀mê ndinam didie nse mban̄a eyen mi.

 “Mma ntọn̄ọ ndikot mban̄a Mme Ntiense Jehovah emi ẹkedọn̄ọde ikpọ ikpọ udọn̄ọ n̄ko. Ama akpa mi idem ndikụt se mmọ ẹkekemede ndinam nnọ Jehovah. Oro ama anam ndomo ndisịn ekikere mi ke se n̄kemede ndinam, n̄kûnyụn̄ ndiọk idem esịt. Mbemiso ndọn̄ọde udọn̄ọ emi, n̄kesinen̄ekede nnyene ini n̄kpep Ikọ Abasi ke idemmi, n̄kwọrọ ikọ, nnyụn̄ mbọn̄ akam. Edi idahaemi tọn̄ọ usenubọk tutu eyo okụt, nnyeneke se n̄kade. Ndien utu ke ami nditie nseme idem, mma ntọn̄ọ ndisịn ofụri ekikere mi ke n̄kpọ Abasi.

 “Mma n̄kpep ndikama kọmputa n̄n̄wam idemmi. Enyene n̄kpọ kiet ke kọmputa mi emi nsidade ntaip n̄kpọ. N̄kpọ oro esidi mma n̄n̄wọn̄ọde ibuot nse abisi emi nyomde ke kọmputa mi, enye ataip ọnọ mi. Ndiwọn̄ọde ibuot nse kpukpru se nyomde nditaip esikak mi, edi n̄kpọ oro esin̄wam mi n̄kpep Bible onyụn̄ an̄wam mi ntaip leta ye e-mail nda n̄kwọrọ ikọ nnọ mme owo. Se nte nsinamde nneme nneme ye mbon emi ẹdude ẹkpere mi mi: Mmenyene n̄kpọ kiet emi ẹwetde kpukpru mme abisi. Owo emi odude ye ami oyotụk mme abisi oro kiet kiet. Enye ama otụk enye emi nyomde, nyọbọp enyịn. Edi enye okpotụk enye emi mmenyomke, nyenen̄ede ntat enyịn. Iyanam ntre tutu mbọp kpukpru ikọ ye mme udịmikọ emi nyomde nditịn̄. Ndusụk nditọete emi ẹsiwakde ndidu ye ami ẹnen̄ede ẹdiọn̄ọ ediwak se nyomde nditịn̄ idahaemi. Edi ndusụk ini esitọ mmọ. Ama onyụn̄ ọtọ mmọ, imesida inam n̄kpọ imam.

 “Esinem mi nditiene nnam se ẹnamde ke esop. N̄kesida Intanet n̄kop se ẹnamde ke mbono esop, edi idahaemi ndida Zoom ndụk mbono esop. Mmesitaip ibọrọ mbụme emi nyomde ndibọrọ, ndien ẹma ẹbụp mbụme oro ke mbono esop, owo oyokot ibọrọ oro. Zoom n̄ko ke nsida ntiene mbon otu an̄wautom nnyịn nse Edinam TV Mme Ntiense Jehovah eke ọfiọn̄ ke ọfiọn̄. a

 “Isua 23 edi emi tọn̄ọ n̄kọdọn̄ọ udọn̄ọ emi. Mmesifụhọ ke ntak udọn̄ọ emi ndusụk ini. Ke mme utọ ini oro, akam, ndidu ye nditọete, ye ndisịn idem nnam n̄kpọ Abasi ẹsinam esịt afiak enem mi. Nditọete ke esop nnyịn ẹn̄wam mi nnam utom usiakusụn̄ unọ un̄wam mbe isua itiokiet. Mmodomo ndinam nti n̄kpọ man Alessandro eyen mi ekpebe. Idahaemi enye ọdọ n̄wan, onyụn̄ edi ebiowo. Enye ye n̄wan esie ẹdi mme asiakusụn̄ ofụri ini.

 “Mmesiwak nditie n̄kere mme n̄kpọ emi ndinamde ke Paradise. Akpa n̄kpọ emi nyomde ndinam edi ndida uyo mi ntịn̄ n̄kpọ mban̄a Jehovah. N̄kpama n̄ko ndika ekpri obio emi enyenede mmọn̄ n̄kasan̄a ke mben mmọn̄ oro nse nte ebiet oro eyede. N̄ko sia edide ebe isua 20 idahaemi tọn̄ọ ẹketọn̄ọ ndisịn mi n̄kpọ ke ibuo nnọ mi mmọn̄ mmọn̄ udia ndia, ntetie mbet usen emi ndidade ubọk mi n̄kịbi apple ke eto ndom nta. Nto Italy, udia Italy esinyụn̄ ọdọn̄ mi. Ntetie mbet ini emi ndikemede nditem pizza ye mme udia n̄kan̄ nnyịn en̄wen emi mmade ndia!

 “‘Idotenyịn edinyan̄a’ iyakke n̄kere n̄kpọ ntịme ntịme. (1 Thessalonica 5:8) Kpa ye emi idem mi etiede ntem, mma n̄kere nte nditiede ke Obio Ubọn̄ Abasi, esịt esinem mi etieti. Mmonyụn̄ nnịm ke ibịghike udọn̄ọ mi emi oyokụre. Enen̄ede ọdọn̄ mi ndidu ‘ata uwem’ emi Jehovah oyomde nnyịn idu ke ini ukara esie.”—1 Timothy 6:19; Matthew 6:9, 10.