Mbon Estonia Ẹtoro “Ata Eti Utom” Oro Ẹkenamde ke Bible Nnyịn
Ke 2014, ẹma ẹnọ Mme Ntiense Jehovah enọ emi ẹsinọde mbon emi ẹwetde nti n̄wed ke usem Estonia. Ẹkenọ mmọ enọ emi ke ntak Edisana N̄wed Abasi—Edikabade Eke Obufa Ererimbot emi mmọ ẹkesiode ke usem Estonia. Bible emi ekedi ọyọhọ n̄wed ita ke otu n̄wed 18 emi mme owo ẹkemade ẹkan.
Kristiina Ross, mma kiet emi enen̄erede ọfiọk usem Estonia ke ufọkn̄wed ntaifiọk usem Estonia, ọkọdọhọ ẹsịn Bible nnyịn emi ẹkesiode ke August 8, 2014 ke otu n̄wed oro ẹmade ẹkan. Mma emi ọkọdọhọ ke Bible emi “enem etieti inyụn̄ isọn̄ke ndikot.” Enye ama adian do ete: “Nte ẹkabarede Bible emi eyenen̄ede an̄wam nnyịn ndikabade n̄wed ke usem Estonia.” Rein Veidemann, prọfesọ emi ọdiọn̄ọde n̄kpọ aban̄a ido edinam mbon Estonia ye nte ẹsiwetde n̄wed ke usem emi, ọkọdọhọ ke mbon emi ẹkekabarede Bible emi ẹkenam “ata eti utom.”
Akpa ini emi ẹkekabarede ofụri Bible ke usem Estonia ekedi ke 1739, ndien tọn̄ọ oro, ẹkabade mme Bible en̄wen ke usem Estonia. Nso ndien inam ẹdọhọ ke mbon oro ẹkekabarede Bible emi ẹkenam “ata eti utom”?
Ẹkabade enen. Ọwọrọetop Bible usem Estonia emi ẹkesiode ke 1988 akakabade enyịn̄ Abasi nte “Jehoova” (Jehovah) ke se ibede itie 6,800 ke N̄wed Abasi Usem Hebrew (Akani Testament). * Edi enyịn̄ Abasi awak akan oro ke Edikabade Eke Obufa Ererimbot eke usem Estonia. Mme andikabade Bible emi ẹma ẹdọn̄ enyịn̄ Abasi ke mme itie oro enyịn̄ emi ọkpọdọn̄ọde ke N̄wed Abasi Christian Usem Greek (Obufa Testament).
An̄wan̄a owo. Ndi nte ẹkekabarede Bible emi ama enen, ndi onyụn̄ emem utom ndikot? Toomas Paul emi edide akabade Bible ama etịn̄ ke n̄wedmbụk n̄kpọntịbe emi ẹkotde Eesti Kirik (Ufọkabasi Estonia) ete ke Edikabade Eke Obufa Ererimbot isọn̄ke ndikot ke usem Estonia. Enye ama adian do ete: “Ata akpa ini emi nnyịn inyenede Bible emi mîsọn̄ke ndikot onyụn̄ an̄wan̄ade owo edi emi.”
Mme owo ke ẹbọ ufọn Bible nnyịn ke usem Estonia
Mbon Estonia ẹma Bible emi tutu. Ẹma ẹda minit 40 ẹtịn̄ ẹban̄a obufa Bible emi ke radio Estonia. Mme etubom ufọkabasi ye ediwak mme aka ufọkabasi ẹsidọhọ Mme Ntiense Jehovah ẹnọ mmimọ Bible emi. Ufọkn̄wed kiet ke Tallinn, emi nditọ imọ owo ẹsikade, ẹma ẹbọ idem Bible emi 20 man ẹda ẹkpep nditọ ufọkn̄wed n̄kpọ. Mbon Estonia ẹma ndikot n̄wed etieti, ndien Mme Ntiense Jehovah ẹkop inemesịt ndinọ mmọ akakan n̄wed, emi ẹkabarede ata nnennen nnennen, mînyụn̄ isọn̄ke ndikot.
^ ikp. 5 Prọfesọ Ain Riistan, emi edide adaibuot ke itie emi ẹsikpepde n̄kpọ ẹban̄a Obufa Testament ke University of Tartu, ama etịn̄ nte mbon Estonia ẹkesan̄ade ẹtọn̄ọ ndikot Abasi “Jehoova.” Ekem enye ọdọhọ ete: “N̄kere ke enen ndikot Abasi Jehoova mfịn. Inamke n̄kpọ m̀mê ẹkeda enyịn̄ emi ke m̀mọ̀n̄, enyịn̄ emi enyene . . . se ọwọrọde onyụn̄ enen̄ede enyene ufọn ke ediwak emana idahaemi. Abasi emi ọkọnọde Eyen esie edikpa man afak mme owo ekere Jehoova.”
Ekeme Ndidi Ayama Mmọ Emi N̄ko
ESSENTIAL BIBLE TEACHINGS
Abasi Ekere Didie?
Bible ọdọhọ ke Abasi edi Ata Ọkpọsọn̄ m̀mê Abasi Ibom, Andibot, ye Ọbọn̄. Edi ata enyịn̄ esie odu ke Bible ebe utịm ike-7,000.
MME N̄KPỌ EMI ISIODE
Ẹnam Mme Owo Ẹnyene Bible ke Usem Emana Mmọ
Ẹsinọ mme owo Edisana N̄wed Abasi—Edikabade Eke Obufa Ererimbot edieke mmọ ẹyomde ndikot. Owo inyamke-nyam.