N̄kpọ nte owo 300 ẹdụn̄ ke n̄kpri n̄kpri isuo Halligen emi odude ke North Sea. Mme isuo emi ẹkpere edem usoputịn Schleswig-Holstein, ke Germany. Ndi eti mbụk emi Mme Ntiense Jehovah ẹkwọrọde oyosụk esịm n̄kan̄ emi n̄ko?​—Matthew 24:14.

Mme Ntiense Jehovah ẹsiwat ke ubom ẹkekwọrọ ikọ ẹnọ mme owo ke ndusụk isuo emi. Edi ndusụk mmọ ẹsisan̄a ke ukot ke n̄kpọ nte kilomita ition m̀mê itiat ita, man ẹkekwọrọ ikọ ke mme isuo eken. Mmọ ẹsisan̄a didie ẹnam emi?

Mmọ ẹnen̄ede ẹdiọn̄ọ mmọn̄ emi. North Sea n̄kan̄ isuo Halligen esitọ onyụn̄ ekebe kpukpru hour itiokiet. Mmọn̄ emi esisụhọde esịm mita ita ke ini ekebede. Ata akamba ikpehe akpa emi esisụhọde tutu edi se ẹkemede ndikụt isọn̄ akpa. Ntre, Mme Ntiense ẹsisan̄a ke isọn̄ mmọn̄ ẹbe ẹka Isuo ita.

Isan̄ emi esitie didie? Ulrich, owo emi esidade Mme Ntiense eken aka mme isuo emi ọdọhọ ete: “Esida n̄kpọ nte hour iba ndisan̄a n̄kesịm isuo Halligen kiet. Isiwak ndisan̄a ukot ikpîkpu koro edieke esịnede ikpaukot, ọyọbọ ufen eti eti. Ini etuep kpọt ke isisịne ikpọ ndodobi ikpaukot.”

Ama asan̄a ke isọn̄ mmọn̄ editie fi nte adaba ndap. Ulrich ọdọhọ ete: “Editie fi nte odu ke ererimbot en̄wen. Ndusụk itie etie okpụk okpụk, ndusụk eken etie itiat itiat, edi enyene ndusụk itie emi mbiet ofụkde. Ekeme ndidi ke asan̄a, ke asan̄a, afo okụt mme inuen, n̄kon̄o, ye mme n̄kpọ eken.” Ndusụk ini mmọ ẹsisan̄a ẹkebe edịk emi mbon Germany ẹkotde Priele.

Idịghe nte ke esinen̄ede emem ọnọ mbon emi ẹsikade n̄kpọ emi. Ulrich ọdọhọ ke owo ekeme ndisop edieke enye mîdiọn̄ọke nte asan̄ade ke ini ntụhube ofụkde kpukpru ebiet. Ke mmimọ imesikama ekanem mbakara mîdịghe GPS, oro edi, n̄kpọ emi ẹsidade ẹfiọk usụn̄, ndien ke isinam kpukpru n̄kpọ ke ini man mmọn̄ iditọ isịri usụn̄.

Ndi kpukpru se mmọ ẹnamde emi enyene ufọn? Ulrich etịn̄ nte ete kiet emi edide isua 90 esimade ndikot Enyọn̄-Ukpeme ye Ẹdemede! Enye ọdọhọ ete: “Ini ama okụre ọkpọn̄ nnyịn usen kiet, ntre nnyịn ikekemeke ndika ufọk ete emi. Edi mbemiso itọn̄ọde isan̄ unyọn̄, enye ama awat enan̄ukwak esie edisịm nnyịn, onyụn̄ ọdọhọ ete, ‘Edi didie, ukûduakke ndinọ mi Enyọn̄-Ukpeme mfịn?’ Esịt ama enen̄ede enem nnyịn ndikụt enye, ima inyụn̄ inọ enye Enyọn̄-Ukpeme.”