AUSTRALIA: Nsiondi The Sydney Morning Herald eke October 2, 2012, ọkọdọhọ ete: “Ke ufọkibọk, idem esisọp ọsọn̄ mbon udọn̄ọ emi ẹdide Mme Ntiense Jehovah, emi mîsiyakke ẹsịn mmọ iyịp ke ntak se mmọ ẹnịmde ke akpanikọ akan mbon udọn̄ọ eken.”

Magazine oro etịn̄ se James Isbister emi edide Prọfesọ Ibọkusọbọ ke Ufọkn̄wed Ukpep Ibọkusọbọ, ke Ufọkn̄wed Ntaifiọk Sydney eketịn̄de. N̄wed oro ọdọhọ ete: “Prọfesọ Isbister ọdọhọ ke mbiausọbọ oro ẹkedomode ndinam iyịp mmọ [mbon udọn̄ọ emi ẹdide Mme Ntiense] okûwọrọ akaha ẹma ẹtịm ẹsọbọ Mme Ntiense Jehovah. Ke ntak emi, ediwak mmọ isikpaha, mmọ n̄ko isidụhe ke ufọkibọk ibịghi nte mbon eken oro ẹkesịnde mmọ iyịp ke ini ẹsiakde mmọ idem.”

Idịghe Dọkta Isbister kpọt etịn̄ emi. Magazine emi American Medical Association ẹsiode, ke nsiondi eke July 2, 2012, eketịn̄ ntem aban̄a Mme Ntiense oro ẹkesiakde esịt: “Mme Ntiense emi ẹkenyenede mfịna ke ẹma ẹkekụre usiakidem ikawakke, mmọ ikonyụn̄ idụhe ke ufọkibọk ibịghi nte mbon udọn̄ọ eken oro ẹkesiakde esịt ẹnyụn̄ ẹsịnde mmọ iyịp.”