“Kpono usọ ye uka man usen fo ekpebịghi ke isọn̄ oro Jehovah Abasi fo ọnọde fi.”—Exodus 20:12, Edikabade Eke Obufa Ererimbot.

“Kpono usọ ye uka; kpaŋ usen fo ekpebịghi ke isọŋ emi Jehovah Abasi fo ọnọde fi.”—Exodus 20:12, Edisana Ŋwed Abasi Ibom.

Abasi ọkọdọhọ nditọ Israel ete ẹkpono mme ete ye eka mmọ. Enye ama ọn̄wọn̄ọ ndidiọn̄ mmọ man anam enenem mmọ ndinam ewụhọ oro. Ibet emi Abasi ọkọnọde Moses, emi ẹsikotde Ibet Moses, ama ebe efep, edi oro iwọrọke ke Abasi okpụhọde nte oyomde nnyịn inam n̄kpọ. Se ikanamde Abasi ọnọ ibet oro ikpụhọkede, n̄kpọ oro osụk ekeme ndin̄wam nnyịn mfịn.—Colossae 3:20.

Eyen ekededi emi okopde uyo ete ye eka esie owụt ke imokpono mmọ. (Leviticus 19:3; Mme N̄ke 1:8) Idem nditọ emi ẹkponde ẹnyene ufọk idemmọ, ẹdisụk ikaka iso ima mme ete ye eka mmọ inyụn̄ in̄wam mmọ. Ke uwụtn̄kpọ, mmọ ẹyekụt ẹte ke imese iban̄a mme ete ye eka mmọ, ẹsinyụn̄ ẹsio okụk ẹda ẹn̄wam mmọ.—Matthew 15:4-6; 1 Timothy 5:4, 8.

Akana nditọ Israel ẹkpono ete ẹnyụn̄ ẹkpono eka mmọ n̄ko, sia emi ediwụt ke eka mmọ enyene ufọn n̄ko. (Mme N̄ke 6:20; 19:26) Se anade nditọ ẹnam edi oro mfịn.

Ewụhọ Abasi oro ọdọhọde nditọ ẹkpono mme ete ye eka mmọ enyene adan̄a. Ikanaha nditọ Israel ẹbiat ibet Abasi ke ntak ukop uyo nnọ mme ete ye eka mmọ m̀mê owo ekededi. (Deuteronomy 13:6-8) Ukem ntre, “nnyịn inyene ndikop uyo Abasi nte andikara utu ke uyo owo.”—Utom 5:29.

Abasi ama ọn̄wọn̄ọ ke ibet emi enye ọkọnọde nditọ Israel ete ke nditọ emi ẹkponode ete ye eka mmọ ẹyedu uwem ẹbịghi, ke n̄kpọ oyonyụn̄ ọfọn ye mmọ ke isọn̄ emi imọ inọde mmọ. (Deuteronomy 5:16) Se iditịbede inọ nditọ emi mîkopke item Abasi, mîkopke uyo inọ ete ye eka mmọ, iditịbeke inọ mmọ. (Deuteronomy 21:18-21) Idem tutu mfịn emi, Abasi osụk oyoyom nditọ ẹkpono mme ete ye eka mmọ. (Ephesus 6:1-3) M̀mê idi eyenọwọn̄ m̀mê akamba owo, Abasi ọyọnọ nnyịn utịp n̄kpọ emi inamde. Enye iditreke ndinọ nditọ emi ẹkopde uyo esie ye uyo ete ye eka mmọ anyan isua uwem. Enye ayanam mmọ ẹdori enyịn ndidu uwem nsinsi.—1 Timothy 4:8; 6:18, 19.

Ewụhọ Abasi oro ke Exodus 20:12 esịne ke otu Ibet Duop. Itie emi enye odude ekpep nnyịn akpan n̄kpọ. (Exodus 20:1-17) Ewụhọ emi odude ke ufan̄ikọ 4 esịm 11 aban̄a se akanade nditọ Israel ẹnam ẹnọ Abasi, utọ nte ndituak ibuot nnọ enye ikpọn̄ ikpọn̄. Ewụhọ emi odude ọtọn̄ọde ke ufan̄ikọ 13 esịm 17 aban̄a nte akanade mmọ ẹnam n̄kpọ ye ekemmọ owo. Ke uwụtn̄kpọ, ikanaha owo ọkpọn̄ ebe m̀mê n̄wan esie akama owo en̄wen, m̀mê eyịp n̄kpọ owo. Emi anam ndusụk owo ẹdọhọ ke ewụhọ oro, “kpono usọ ye uka,” etie nte urụk emi ọbọpde se owo akpanamde ọnọ Abasi ye se owo akpanamde ọnọ ekemmọ owo adian kiet.