ITIE BIBLE ẸNAMDE AN̄WAN̄A

Rome 10:13—“Okot Enyiŋ Jehovah”

BRE

“Ẹyenyan̄a kpukpru owo eke ẹsemede ẹkot enyịn̄ Jehovah.”—Rome 10:13, Edikabade Eke Obufa Ererimbot.

“Owo ekededi eke edisemede okot enyiŋ Jehovah eyebọhọ.”—Rome 10:13, Edisana Ŋwed Abasi Ibom.

Se Rome 10:13 Ọwọrọde

Abasi isisarike owo. Oro anam enye oyom kpukpru owo ke ererimbot, imọ ye ubuene, ẹdu uwem ke nsinsi. Edi man inyene uwem emi, ana iseme ikot enyịn̄ Jehovah, emi edide ata enyịn̄ Abasi. *—Psalm 83:18.

Ke ini Bible ọdọhọde “ẹkot enyịn̄ Jehovah,” emi ikụreke ke ndidiọn̄ọ enyịn̄ oro nnyụn̄ n̄kot enye ke ini inamde n̄kpọ Abasi. (Psalm 116:12-14) Ọwọrọ ke ana ibuọt idem n̄ko ye Jehovah isinyụn̄ ika ibịne enye ima iyom un̄wam.—Psalm 20:7; 99:6.

Jesus Christ akada ata enyịn̄ Abasi nte akpan n̄kpọ. Ata akpa n̄kpọ emi enye eketịn̄de ke ini enye ekekpepde nnyịn ndibọn̄ akam ekedi: “Ete nnyịn emi odude ke heaven, yak ẹnam enyịn̄ fo asana,” m̀mê yak ikpono enyịn̄ fo. (Matthew 6:9) Jesus ama owụt nnyịn n̄ko ke ana idiọn̄ọ andinyene enyịn̄ oro, inam se enye ọdọhọde, inyụn̄ ima enye man ikeme ndinyene uwem nsinsi.—John 17:3, 6, 26.

Isan̄a didie idiọn̄ọ ke Jehovah edi “Ọbọn̄” oro isikụtde ke Romans 10:13, ke ndusụk Bible? Sia ẹda se idude ke itie Bible oro ẹto Joel 2:32, emi ata enyịn̄ Abasi, Jehovah, odude ke ata akpa N̄wed Abasi usem Hebrew. *

Se Iban̄ade Rome 10:13

Rome ibuot 10, owụt ke ana owo ọbuọt idem ye Jesus Christ edieke enye oyomde Abasi ada enye nte owo esie. (Rome 10:9) Ediwak itie ke Akani Testament owụt ke ntre ke edi. Ana owo “atan̄a an̄wan̄wa,” ọkwọrọ nti n̄kpọ emi ukara Abasi edinamde, ọnọ mme owo man enye owụt ke imenyene mbuọtidem ẹtetịn̄ mi. Oro ekeme ndinam mbon en̄wen ẹtiene ẹnyene mbuọtidem emi edinamde ẹnyan̄a mmọ.—Rome 10:10, 14, 15, 17.

Kot Rome ibuot 10 ye ikọ idakisọn̄ ekededi emi anamde ndusụk n̄kpọ an̄wan̄a ye mme itie Bible eken emi ẹtịn̄de ukem n̄kpọ oro.

^ ikp. 3 Ata enyịn̄ Abasi ama odu ke n̄kpọ nte itie 7,000 ke N̄wed Abasi ini ẹkewetde enye. Ke usem Hebrew, ẹda abisi inan̄ ẹwet ata enyịn̄ Abasi; abisi oro ekere Tetragrammaton. Ke Ikọmbakara ẹsikot ata enyịn̄ Abasi “Jehovah”; edi ndusụk owo ẹsinyụn̄ ẹkot enye “Yahweh.”

^ ikp. 6 Imenen̄ede inịm ke mme Christian oro ẹkewetde Bible ẹma ẹsisịn ata enyịn̄ Abasi ini ekededi mmọ ẹdade n̄kpọ ẹto itie emi enyịn̄ oro okodude ke “Akani Testament.” N̄wed emi ẹkotde The Anchor Bible Dictionary ọdọhọ ete: “Nsio nsio n̄kpọ owụt ke Tetragrammaton emi adade aban̄a enyịn̄ Abasi, Yahweh, ama odu ke ndusụk itie m̀mê ke kpukpru itie emi ẹkesiode n̄kpọ ke Akani Testament ẹsịn ke ata akpa Obufa Testament.” (Eboho 6, page 392) Okpoyom ndidiọn̄ọ n̄kpọ en̄wen mban̄a ata enyịn̄ Abasi, se ibuotikọ emi “Enyịn̄ Abasi ke N̄wed Abasi Christian Usem Greek” ke ekpri n̄wed emi, Se Idin̄wamde Fi Ekpep Ikọ Abasi page 6.