Enyene odu-uwem-n̄kpọ emi ẹkotde sea-cucumber; enye esidụn̄ ke isọn̄ inyan̄ m̀mê ke otu mme odu-uwem-n̄kpọ eken ke isọn̄ inyan̄. Enye esikeme ndinam ikpaidem esie etie mkputụk mkputụk, n̄kukịm n̄kukịm, m̀mê ndọbọde ndọbọde. Enye ekeme ndinam ikpaidem esie enen̄ede emem m̀mê enen̄ede ọsọn̄ inikiet inikiet. Emi esinam enye ekeme ndidụk n̄kpri ufan̄ nsịne, ndien ama odụk ama enye anam ikpaidem esie enen̄ede ọsọn̄ man n̄kpọ ididụri enye isio do. Enyene n̄kpọ emi odude enye ke idem; n̄kpọ oro esin̄wam enye ekeme ndinam ikpaidem esie etie nte enye oyomde.

 Kere ise: Odu-uwem-n̄kpọ emi ẹkotde sea-cucumber mi, esikeme ndikpụhọ ikpaidem esie ke usụn̄ ita. Enye ekeme ndinam ikpaidem esie enen̄ede ọsọn̄ m̀mê emem, onyụn̄ ekeme ndinam enye isọn̄ke-sọn̄ inyụn̄ imemke-mem ikaha. Ini ekededi emi enye oyomde ndinam ikpaidem esie etie nte enye oyomde, enye esinam ndusụk esịp ke ikpaidem esie adiana kiet mîdịghe anam mmọ ẹdian̄ade. Utọ mmọn̄, m̀mê protein, iba ke idem esie esin̄wam enye anam kpukpru emi.

 Enye esida kiet ke otu protein iba oro anam n̄kpọ emi etiede urụk urụk ke ufan̄ esịp ikpaidem esie, ndien oro esikot ikpaidem esie adian anam enen̄ede ọsọn̄ m̀mê asat adiana kiet. Enye esinyụn̄ ada protein enye eken afiak anam n̄kpọ oro atara man ikpaidem esie afiak emem. Enye ekeme ndinam ikpaidem esie emem tutu etie nte ikpaidem esie ọmọn̄ adiahade.

 Ntaifiọk ke ẹdomo ndibot nsio nsio n̄kpọ emi etiede nte ikpaidem sea-cucumber. Mmọ ẹduak ndibot electrode​—n̄kpọ emi mme dọkta ẹsida ẹnam utom ke mfre owo. Mmọ ẹyom ndibọt enye emi ọsọn̄de idem ekem se ẹsịn ke nnennen itie, ndien ẹma ẹsịn ẹma enye emem ikpọn̄. Mmọ ẹkpekeme ẹnam utọ electrode oro, etie nte idem owo eyenen̄ede ama enye oro.

 Afo ekere didie? Ndi sea-cucumber emi ekemede ndinam ikpaidem esie ọsọn̄ m̀mê emem okofoforo? Mîdịghe ndi ẹkebobot mmọ?