Ndi Abasi Eyefen Ọnọ Mi?

BRE

Se Bible ọdọhọde

Ih, Abasi eyefen ọnọ fi edieke anamde se enye ọdọhọde fi anam. Bible ọdọhọ ke Jehovah edi Abasi emi “enyịmede ndifen nnọ” owo ye nte ke “enye eyefen ke akamba usụn̄.” (Nehemiah 9:17; Psalm 86:5; Isaiah 55:7) Ke ini Abasi efende nnyịn, enye esifen ke ofụri esịt onyụn̄ ‘ọsọhi’ idiọkn̄kpọ nnyịn efep ofụri ofụri. (Utom 3:19) Abasi isifiakke iti mme idiọkn̄kpọ nnyịn aba ke ama ekefen nnyịn, sia enye ọdọhọ ke imọ ‘iditịghi aba mme idiọkn̄kpọ’ ikọt esie. (Jeremiah 31:34) Enye ama efefen nnyịn efen, isinyụn̄ ifiakke ida idiọkn̄kpọ oro imia nnyịn ufen aba.

Edi, Abasi isifenke idiọkn̄kpọ owo ke ntak emi enye mîkemeke ndinam owo oro n̄kpọ. Enye isikpụhọkede ndinen ibet esie m̀mê nte enye oyomde idu uwem. Oro anam enye mîsifenke ndusụk idiọkn̄kpọ.—Joshua 24:19, 20.

Se akpanamde man Abasi efen ọnọ fi

Bem iso diọn̄ọ ke amabiat ibet Abasi. Kpa ye oro se akanamde akayatde mbon en̄wen, ana afo ebem iso ọdiọn̄ọ ke Abasi inemke esịt ke se akanamde oro.—Psalm 51:1, 4; Utom 24:16.
Tịn̄ idiọkn̄kpọ oro afo akanamde nọ Abasi.—Psalm 32:5; 1 John 1:9.
Nen̄ede fụhọ ke ntak idiọkn̄kpọ oro. Utọ mfụhọ emi ayanam akabade esịt onyụn̄ anam ukpụhọde. (2 Corinth 7:10) Ana ofụhọ n̄ko aban̄a se ikadade ikesịm idiọkn̄kpọ oro.—Matthew 5:27, 28.
Kabade esịt, kûnyụn̄ ufiak unam se akanamde oro. (Utom 3:19) Emi ọwọrọ ke afo udunamke idiọkn̄kpọ kiet uyọhọ ikaba, mîdịghe ke ana afo okpụhọde nte esikerede ye nte esinamde n̄kpọ.—Ephesus 4:23, 24.
Nam n̄kpọ ban̄a se iketịbede oro, mîdịghe diọn̄ se ededi oro akabiarade. (Matthew 5:23, 24; 2 Corinth 7:11) Kpe mbon oro ẹkebọde ufen ubọk ke ntak n̄kpọ emi akanamde m̀mê ke ntak n̄kpọ emi eketrede ndinam, edieke onyụn̄ anade ekpe se ikatakde, kpe.—Luke 19:7-10.
Bọn̄ akam ben̄e Abasi efen ọnọ fi ke ntak uwa ufak Jesus. (Ephesus 1:7) Ana afo efen ọnọ mbon oro ẹkeduede fi edieke anade Abasi ọbọrọ akam fo oro.—Matthew 6:14, 15.
Edieke edide akwa idiọkn̄kpọ ke akanam, tịn̄ nọ akwa owo emi edikemede ndibọn̄ akam nnọ fi nnyụn̄ n̄n̄wam fi afiak asan̄a ekpere Abasi.—James 5:14-16.

Ukwan̄ ekikere oro mme owo ẹsinyenede ẹban̄a edifen idiọkn̄kpọ

“Idiọkn̄kpọ mi awak akan se Abasi efende.”

Abasi ama efen ọnọ David emi ekesịnde efịbe onyụn̄ owot owo

Edieke inamde se Abasi etịn̄de ke Bible, enye eyefen ọnọ nnyịn, sia idụhe idiọkn̄kpọ ndomokiet emi Abasi mîkemeke ndifen. Enye ekeme ndifen ikpọ idiọkn̄kpọ ekpededi enye emi owo akanamde ediwak ini.—Mme N̄ke 24:16; Isaiah 1:18.

Ke uwụtn̄kpọ, ẹma ẹfen Edidem David emi ekesịnde efịbe onyụn̄ owotde owo. (2 Samuel 12:7-13) Apostle Paul ekekere ke imọ idi akakan anamidiọk ke ofụri ekondo, edi ẹma ẹfen ẹnọ enye n̄ko. (1 Timothy 1:15, 16) Mme Jew eyo mme apostle ẹkenam ẹwot Jesus emi ekedide Messiah, edi Abasi ama enyịme ndifen nnọ mmọ edieke mmọ ẹkabarede esịt.—Utom 3:15, 19.

“Ẹyefen ẹnọ mi edieke ntịn̄de se n̄kanamde nnọ oku ufọkabasi.”

Abasi inọhọ owo ndomokiet ke isọn̄ odudu aba ndifen idiọkn̄kpọ oro ẹnamde ẹdian Abasi. Okposụkedi emi edide owo ndiyarade idiọkn̄kpọ oro nnọ owo en̄wen ayanam esịt ana enye sụn̄, Abasi kpọt ekeme ndifen nnọ owo.—Ephesus 4:32; 1 John 1:7, 9.

Edi Jesus ọkọdọhọ mme apostle esie ete: “Edieke mbufo ẹfende mme idiọkn̄kpọ owo ekededi, ẹyefen mmọ; edieke mbufo ẹmụmde mme idiọkn̄kpọ owo ekededi ẹnịm, ẹyemụm mmọ ẹnịm.” Nso ke ikọ esie emi ọkọwọrọ? (John 20:23) Jesus eketịn̄ aban̄a san̄asan̄a odudu emi mme apostles esie ẹdinyenede ke ini ẹnọde mmọ edisana spirit.—John 20:22.

Ke isua 33 eyo mme apostle, mmọ ẹma ẹbọ edisana spirit emi nte Jesus ọkọn̄wọn̄ọde. (Utom 2:1-4) Apostle Peter akada odudu emi ebiere ikpe ọnọ Ananias ye Sapphira. Peter ama ọdiọn̄ọ ke mmọ ẹkesu nsu, ndien se enye eketịn̄de ama owụt ke owo ifenke idiọkn̄kpọ mmọ.—Utom 5:1-11.

Odudu edisana spirit oro ẹkenọde mme apostle ye mme enọ eken, utọ nte editịn̄ ikọ ke nsio nsio usem ye edikọk owo udọn̄ọ ikodụhe aba ke mme apostle ẹma ẹkekpan̄a. (1 Corinth 13:8-10) Ntem owo ndomokiet ikemeke ndimen idiọkn̄kpọ owo en̄wen mfep.