Akwa ukụt ayada afanikọn̄ emi akananam mîsịmke ubonowo edi. Mme prọfesi Bible ẹwụt ke emi editịbe ke “mme akpatre usen,” m̀mê “utịt ini.” (2 Timothy 3:1; Daniel 12:4) Enye edidi “usen ukụt, orụk eke akanam mîdụhe toto ke editọn̄ọ emi Abasi okobotde mme n̄kpọ tutu esịm ini oro, idinyụn̄ idụhe aba.”—Mark 13:19; Daniel 12:1; Matthew 24:21, 22.

Se iditịbede ke ini akwa ukụt

•   Nsobo nsunsu ido ukpono. Ẹyesobo nsunsu ido ukpono efep usọp usọp ke usụn̄ emi akpade owo idem. (Ediyarade 17:​1, 5; 18:9, 10, 21) United Nations emi ofụri odudu ukara ẹdude ke idak mmọ ẹdisobo nsunsu ido ukpono man uduak Abasi osu.—Ediyarade 17:3, 15-18. a

•   Ẹyeyom ndisobo ido ukpono akpanikọ. Nsio nsio idụt ẹyediana kiet ẹdomo ndisobo mbon oro ẹkponode Abasi ke nnennen usụn̄; mmọ ke Ezekiel okokụt ke n̄kukụt ndien ẹkekot mmọ “Gog isọn̄ Magog.” Edi, Abasi idiyakke ẹsobo mbon oro ẹkponode enye.—Ezekiel 38:1, 2, 9-12, 18-23.

•   Ini ikpe mme andidụn̄ isọn̄. Jesus eyebiere ikpe ọnọ kpukpru owo onyụn̄ “abahade mme owo kiet ye eken, kpa nte ekpemerọn̄ abaharede erọn̄ ye ebot.” (Matthew 25:31-33) Se enye edidade ibiere ikpe inọ mmọ edi, m̀mê mmọ ẹma ẹn̄wam m̀mê mmọ ikan̄wamke “nditọete” Jesus emi ẹditienede Jesus ikara ke heaven.—Matthew 25:34-46.

•   Nditan̄ mbon oro ẹdikarade ke Heaven mbok. Nti owo emi ẹmekde nditiene Christ n̄kara ẹyekụre utom mmọ mi ke isọn̄, ẹyenyụn̄ ẹnam mmọ ẹset ẹka heaven.—Matthew 24:31; 1 Corinth 15:50-53; 1 Thessalonica 4:15-17.

•   Armageddon. Armageddon edi “ekọn̄ akwa usen Abasi Ata Ọkpọsọn̄.” Enye n̄ko ke ẹkot “usen Jehovah.” (Ediyarade 16:14, 16; Isaiah 13:9; 2 Peter 3:12) Ẹyesobo mbon emi ikpe etịpde. (Zephaniah 1:18; 2 Thessalonica 1:6-10) Emi eyesịne n̄ko ndisobo ofụri ukara ererimbot, emi Bible okotde idiọk unam emi enyenede ibuot itiaba.—Ediyarade 19:19-21.

Se iditịbede akwa ukụt ama okụre

•   Ẹyekọbi Satan ye mme demon esie. Akwa angel kiet oyomụm Satan ye mme demon esie “esịn ke editụn̄ọ ukpe,” emi edinyụn̄ etie nte ke enye idụhe aba. (Ediyarade 20:1-3) Nte ẹdisịnde Satan ke editụn̄ọ ukpe edinyụn̄ etie nte ẹkpesịnde enye ke ufọk-n̄kpọkọbi; enye idikemeke aba nditụn mme owo usụn̄.—Ediyarade 20:7.

•   Isua Tọsịn Kiet emi Christ edikarade ọtọn̄ọ. Obio Ubọn̄ Abasi ọyọtọn̄ọ ndikara ke isua 1000 ndien enye ayada edidiọn̄ ọsọk mme owo. (Ediyarade 5:9, 10; 20:4, 6) “Akwa otuowo” emi owo mîkemeke ndibat ẹdi “mbon emi ẹketode akwa ukụt ẹwọn̄ọ,” ndien mmọ ẹyekụt ini ukara Christ editọn̄ọde mi ke isọn̄.—Ediyarade 7:9, 14; Psalm 37:9-11.