Ih. Ke ini Jesus ọkọdọhọde ete, “Mbon emi idem ọsọn̄de isiyomke abiausọbọ, edi mbon oro idem mîsọn̄ke ẹsiyom,” ikọ esie ọkọwọrọ ke mme anditiene enye ẹkeme ndibọ usọbọ. (Matthew 9:12) Kpa ye oro Bible mîdịghe n̄wed ibọkusọbọ, enye an̄wam mbon oro ẹyomde ndinem Abasi esịt ẹfiọk se ẹkpenamde.

Bụp idem fo mme mbụme emi:

 1. Ndi usọbọ oro ẹyomde ndinọ mi an̄wan̄a mi? Bible eteme nnyịn ete ibụp mbụme man ifiọk se inende utu ke ‘ndibuọt idem ke kpukpru ikọ.’—Mme N̄ke 14:15.

 2. Ndi ikpọfọnke mbụp abiausọbọ kiet m̀mê iba efen mban̄a usọbọ emi? Ke ini “mme ọnọitem ẹwakde,” ọyọfiọk se akpanamde, akpan akpan edieke ọdọn̄ọde akamba udọn̄ọ.—Mme N̄ke 15:22.

 3. Ndi usọbọ emi ayanam mbiat ibet Abasi emi ọdọhọde “ẹbet iyịp”?—Utom 15:20.

 4. Ndi ẹdiyom ẹka idiọn̄ mbemiso ẹfiọk se ibiakde mi m̀mê ẹnọ mi usọbọ? Bible akpan “ubụpekpo.” (Galatia 5:19-21) Man ọfiọk m̀mê ẹdida odudu efen ẹnọ fi usọbọ, bụp idem fo mme mbụme emi:

•   Ndi ọnọ-usọbọ emi esibre idiọn̄?

•   Ndi ọnọ-usọbọ emi enịm ke mme abasi emi ẹduede m̀mê mme asua emi ẹdide ifọt ẹsitọ owo udọn̄ọ?

•   Ndi ẹyewa n̄kpọ, ẹtan̄a n̄kpọ, mîdịghe ẹnam mme n̄kpọ ibọk eken ke ini ẹnọde usọbọ emi?

 5. Ndi mmekere mban̄a nsọn̄idem mi n̄kaha? Bible eteme nnyịn ete: “Ẹyak kpukpru owo ẹkụt eti ibuot mbufo.” (Philippi 4:5) Eti ibuot ayan̄wam fi ekere aban̄a “se idide akpan n̄kpọ ikan,” utọ nte ndinam n̄kpọ Abasi.—Philippi 1:10; Matthew 5:3.