Ih ekeme. Abasi ekere aban̄a mme asan̄autom esie oro ẹdọn̄ọde. Kop se Bible etịn̄de mi aban̄a mmọ mi: “Jehovah eyese aban̄a [mmọ] ke bed udọn̄ọ.” (Psalm 41:3) Yak isiak n̄kpọ ita emi ẹkemede ndin̄wam fi edieke udọn̄ọ mîyakke ọbọ emem:

1.   Bọn̄ akam. Akam ekeme ndinọ fi “emem Abasi emi akande kpukpru ekikere,” ndien emi idiyakke fi etịmede esịt, edi ayanam esịt ana fi sụn̄.—Philippi 4:6, 7.

2.   Nam se inọde fi inemesịt. Bible ọdọhọ ete: “Esịt ama enem owo idem ọsọn̄. Edi mbọpiso owot owo sụn̄sụn̄.” (Mme N̄ke 17:22, Good News Translation) Kere se idinamde esịt enem fi nyụn̄ nam se inemde owo imam nyụn̄ tiene sak. Imam esinam idem ọsọn̄ owo esisịt.

3.   Kûduọk idotenyịn. Ndifiọk ke n̄kpọn̄ ọyọfọn ekeme ndinam okop inemesịt kpa ye oro ọdọn̄ọde. (Rome 12:12) Bible ọdọhọ ke “baba andidụn̄ kiet ididọhọke ite: ‘ndọdọn̄ọ’” ke ini iso. (Isaiah 33:24) Ini oro ke Abasi edikọk kpukpru udọn̄ọ emi mbiausọbọ mîkemeke ndikọk. Ke uwụtn̄kpọ, Bible owụt ke idem ayafiak esehe n̄kani owo. Kop se enye etịn̄de mi aban̄a n̄kani owo: “Yak obụkidem esie akabade esehe akan eke ini uyen; yak enye afiak enyene odudu nte ekenyenede ke ini uyen esie.”—Job 33:25.

 Mme Ntiense Jehovah ẹsika ufọkibọk ke ini mmọ ẹdọn̄ọde kpa ye oro ẹdiọn̄ọde ke Abasi ayanyan̄a mmimọ. (Mark 2:17) Edi nnyịn isidọhọke owo ke enye akpakam ọbọ usọbọ enye emi m̀mê enye oko sia n̄kpọ aban̄ade usọbọ edi mbubehe idemowo.