Jesus Eketie Didie?

BRE

Jesus Eketie Didie?

Se Bible ọdọhọde

Owo ndomokiet idiọn̄ọke nte Jesus eketiede, sia Bible itịn̄ke nte enye eketiede. Emi owụt ke nte Jesus eketiede inen̄ekede idi akpan n̄kpọ. Edi Bible etịn̄ n̄kpọ ifan̄ oro ekemede ndinam idiọn̄ọ nte enye eketiede.

Nte enye eketiede: Jesus ekedi Jew, ndien ekeme ndidi enye ama ebiet eka esie ekpri. (Mme Hebrew 7:14) Etie nte enye ikenen̄ekede ikpụhọde ye mbon en̄wen. Isan̄ kiet, enye ama oto Galilee aka Jerusalem edi mme owo ikọdiọn̄ọke enye. (John 7:10, 11) Enye ikonyụn̄ inen̄ekede ikpụhọde ye mme mbet esie. Ti ke ini mme asua ẹkekade ndimụm Jesus, ke Judas Iscariot akanam mmọ ẹdiọn̄ọ enye.—Matthew 26:47-49.
Idet esie: Ọsọsọn̄ ndidọhọ ke Jesus ama esikama anyan idet, sia Bible ọdọhọ ete: “Edieke erenowo enyenede anyan idet, edi n̄kpọ esuene ọnọ enye.”—1 Corinth 11:14.
Ntan̄ebek: Jesus ama esinịm ntan̄ebek. Enye eketiene ibet mme Jew; ibet oro ọkọdọhọ irenowo ẹkûkwat mben ntan̄ebek mmọ. (Leviticus 19:27; Galatia 4:4) Bible ama asiak ntan̄ebek Jesus ke prọfesi emi aban̄ade ufen oro akanade enye ọbọ.—Isaiah 50:6.
Idemesie: Se idiọn̄ọde iban̄a Jesus owụt ke enye ama eye idem onyụn̄ enyene odudu. Enye ama esisan̄a ata anyan usụn̄ ọkwọrọ ikọ. (Matthew 9:35) Enye ama anam temple asana ikaba, onụk okpokoro mme okpụhọ okụk ọduọn̄ọ, onyụn̄ ada urụk ebịn mme ufene osion̄o ke temple. (Luke 19:45, 46; John 2:14, 15) N̄wed emi ẹkotde McClintock and Strong’s Cyclopedia ọdọhọ ete: “Ofụri mbụk ukwọrọikọ [Jesus] owụt ke Jesus ama ọsọn̄ idem onyụn̄ enyene odudu.”—Volume IV, page 884.
Nte iso esie eketiede: Jesus ekesitie ifụre ifụre, enye ama esinyụn̄ atua mme owo mbọm; imenịm ke iso esie ama owụt ke enye edi utọ owo oro. (Matthew 11:28, 29) Nsio nsio owo ẹma ẹsika ẹbịne enye ẹkeyom un̄wam ye ndọn̄esịt. (Luke 5:12, 13; 7:37, 38) Nditọwọn̄ n̄ko ẹma ẹsima ndidu ye enye.—Matthew 19:13-15; Mark 9:35-37.

Se mme owo ẹsitịn̄de ẹban̄a nte Jesus eketiede

Se mme owo ẹsitịn̄de: Ndusụk owo ẹdọhọ ke anaedi Jesus okoto Africa sia n̄wed Ediyarade ọdọhọ ke idet esie etie nte ideterọn̄, ndien ikpat esie etie nte “nsak-nsak okpoho.”—Ediyarade 1:14, 15, Edisana Ŋwed Abasi Ibom.

Akpanikọ: N̄wed Ediyarade esiwak nditịn̄ ikọ emi adade aban̄a n̄kpọ. (Ediyarade 1:1) Se ẹtịn̄de ẹban̄a idet ye ukot Jesus iban̄ake nte Jesus eketiede ini enye okodude mi ke isọn̄, edi aban̄a nte Jesus esinamde n̄kpọ tọn̄ọ enye ekeset. N̄wed Ediyarade 1:14 etịn̄ ke “ibuot esie ye idet esie ẹfia nte afia idet erọn̄, ye nte snow.” Ke itie oro, owo itịn̄ke iban̄a ukotidet Jesus, edi ẹda afia kọlọ idet esie ẹwụt utọ ifiọk emi enye enyenede ye adan̄a nte enye ebịghide uwem. (Ediyarade 3:14) Itie n̄wed Abasi oro iwọrọke ke ata idet Jesus edi wool, kpa nte mîwọrọke ke ata idet Jesus edi snow.

N̄wed Ediyarade ọdọhọ ke ikpat Jesus “ẹbiet nsemnsem okpoho ke ini esemde ke akwa ikan̄.” (Ediyarade 1:15) Ẹdọhọ n̄ko ke iso esie “ebiet utịn ke ini enen̄erede ayama.” (Ediyarade 1:16) Sia mîdụhe idụt ndomokiet emi mme owo ẹtiede ntre, ọwọrọ n̄kukụt oro ada aban̄a n̄kpọ. Enye aban̄a Jesus emi ẹkenamde eset, emi “odụn̄de ke un̄wana eke owo mîkemeke ndisan̄a n̄kpere.”—1 Timothy 6:16.

Se mme owo ẹsitịn̄de: Jesus ekememem onyụn̄ efehe n̄kpọ.

Akpanikọ: Jesus ekesinam n̄kpọ nte erenowo. Ke uwụtn̄kpọ, enye ama enyene uko ọwọrọ ọkọdọhọ otuowo emi ẹkekamade n̄kpọ en̄wan ẹdi ndimụm enye ete ke imọ idi Jesus. (John 18:4-8) Anaedi Jesus ama enyene odudu, sia mîkpedịghe ntre enye ikpekekemeke ndinam utom kapenta.—Mark 6:3.

Nso ndien ikanam ẹyom owo an̄wam Jesus emen eto ndutụhọ esie? Nso ikonyụn̄ inam enye akpa mbemiso owo iba oro ẹkekọn̄de ke eto ẹkpere enye? (Luke 23:26; John 19:31-33) Mbemiso ẹkekọn̄de Jesus ke eto, ẹma ẹnam idem enen̄ede emem enye. Enye ikedehe idap ofụri okoneyo oro; ekeme ndidi ke ntak mfụhọ. (Luke 22:42-44) Mme Jew ẹma ẹmia enye ibak ibak okoneyo oro, ndien ke eyo ẹsierede mbon Rome ẹma ẹnen̄ede ẹtụhọde enye. (Matthew 26:67, 68; John 19:1-3) Etie nte se ikanamde enye ọsọp akpa ẹdi oro.

Se mme owo ẹsitịn̄de: Jesus ekesitie mfụhọ mfụhọ ye idop-idop.

Akpanikọ: Jesus eketie nte Ete esie ke heaven, Jehovah, emi Bible okotde “Abasi inemesịt.” (1 Timothy 1:11; John 14:9) Jesus ekesikam ekpep mme owo nte mmọ ẹdinamde ikop inemesịt. (Matthew 5:3-9; Luke 11:28) Emi owụt ke iso Jesus ekesitie idara idara.