Se ededi emi owo anamde m̀mê ekerede emi Abasi mîmaha edi idiọkn̄kpọ. Emi esịne ndibiat ibet Abasi. (1 John 3:4; 5:17) Bible ọdọhọ n̄ko ke edieke owo ọfiọkde eti n̄kpọ edi esịn ndinam, ke enye anam idiọkn̄kpọ.—James 4:17.

 Ke ata akpa usem oro ẹkedade ẹwet Bible, ikọ emi idiọkn̄kpọ ọwọrọ owo nditop n̄kpọ ndue ubọk m̀mê nditre nditop n̄kpọ n̄wụk ke nnennen ebiet emi akpanade enye okowụhọ. Ke uwụtn̄kpọ, enyene mbonekọn̄ Israel emi ẹkesinen̄erede ẹfiọk nditop itiat “iduehe” ubọk. Ekpedi ekedi ẹkabade itien̄wed emi ẹbon ikọ nte mbon Hebrew ẹsitịn̄de ikọ, ẹkpekedọhọ ke mbonekọn̄ oro ẹma ẹfiọk nditop itiat “inamke idiọkn̄kpọ.” (Judges 20:16) Ntem, edieke owo mînịmke ibet Abasi nnennen nnennen nte akpanade ẹnịm, enye anam idiọkn̄kpọ.

 Abasi enyene unen ndinọ nnyịn ibet sia enye okobot nnyịn. (Ediyarade 4:11) Kpukpru nnyịn iyanam ibat inọ Abasi ke sededi oro inamde.—Rome 14:12.

Ndi enyene owo emi mînamke idiọkn̄kpọ?

 Ihih, idụhe. Bible ọdọhọ ke “kpukpru owo ẹnam idiọkn̄kpọ ẹnyụn̄ ẹtaba ubọn̄ Abasi.” (Rome 3:23; 1 Ndidem 8:46; Ecclesiastes 7:20; 1 John 1:8) Ntak edide ntre?

 Ata akpa owo emi Abasi okobotde, Adam ye Eve, ẹma ẹfọn ẹma ikesinyụn̄ inamke idiọkn̄kpọ ke ini Abasi okobotde mmọ, koro enye okobot mmọ ke mbiet esie. (Genesis 1:27) Edi mmọ ikedịghe aba mfọnmma toto ke usen emi mmọ ẹkesọn̄de ibuot ye Abasi. (Genesis 3:5, 6, 17-19) Mmọ ẹma ẹkpọn̄ idiọkn̄kpọ ẹnọ nditọ mmọ, kpa nte udọn̄ọ eka esibede eyen. Ntre nditọ mmọ n̄ko ifọnke ima. (Rome 5:12) Enye ekesịn Edidem David ọdọhọ ke imọ ‘ikamana ye ukwan̄n̄kpọ.’—Psalm 51:5.

Ndi Ndusụk Idiọkn̄kpọ Okpon Akan Ndusụk?

 Ih, okpon akan. Ke uwụtn̄kpọ, Bible ọdọhọ ke mbon Sodom “ẹkedi mme idiọkowo ẹnyụn̄ ẹnen̄ede ẹnam idiọkn̄kpọ,” ndien ke ‘idiọkn̄kpọ mmọ ama odobi etieti.’ (Genesis 13:13; 18:20) Yak ise n̄kpọ ita emi ẹdade ẹfiọk nte idiọkn̄kpọ okponde eketre.

1.   Utọ Idiọkn̄kpọ. Bible ọdọhọ nnyịn ikûnam ikpọ idiọkn̄kpọ nte use, ubụp ekpo, uyịpinọ, ukpammịn, ndikan owo ubọk mbọ n̄kpọ, uwot owo, ye ndikpono ndem. (1 Corinth 6:9-11; Ediyarade 21:8) Bible owụt ke utọ idiọkn̄kpọ emi itiehe nte idiọkn̄kpọ emi owo mîkereke-kere m̀mê mîfiọkke-fiọk inam, utọ nte ndidue ntịn̄ ikọ m̀mê ndinam n̄kpọ emi abiakde owo. (Mme N̄ke 12:18; Ephesus 4:31, 32) Edi Bible idọhọke nnyịn ida idiọkn̄kpọ ndomokiet nte ata ekpri ndudue emi mîdịghe n̄kpọ ndomokiet, sia owo ekeme nditọn̄ọ n̄kpri n̄kpri ntre anam akwa idiọkn̄kpọ.—Matthew 5:27, 28.

2.   Ntak Ẹnamde. Ndusụk mbon emi ẹnamde idiọkn̄kpọ idiọn̄ọke ibet Abasi. (Utom 17:30; 1 Timothy 1:13) Emi iwọrọke ke se mmọ ẹnamde idiọkke, edi Bible owụt ke mmọ itiehe nte mbon emi ẹkoide-koi ẹbiat ibet Abasi. (Numbers 15:30, 31) Mbon emi ẹkoide-koi ẹnam idiọkn̄kpọ ẹdi ata ndiọi owo.—Jeremiah 16:12.

3.   Ikafan̄ ke Ẹnam. Bible owụt ke idiọkn̄kpọ oro ẹnamde ini kiet kpọt okpụhọde ye enye oro ẹnamde ẹfiak ẹnam ediwak ini. (1 John 3:4-8) Abasi idifenke inọ mbon oro ‘ẹkoide-koi ẹka iso ẹnam idiọkn̄kpọ’ ke ẹma ẹkekpep Ikọ Abasi.—Mme Hebrew 10:26, 27.

 Esịt ekeme ndinen̄ede mfịna mbon emi ẹkeduede ẹnam ikpọ idiọkn̄kpọ. Ke uwụtn̄kpọ, Edidem David ọkọdọhọ ete: “Mme ndudue mi ẹmedọk ẹbe ibuot mi; nte ndodobi mbiomo mmọ ẹmedobi ẹkan mi.” (Psalm 38:4) Edi Bible ọdọhọ utọ mbon emi ete: “Yak idiọkowo ọkpọn̄ usụn̄ esie, owo ibak onyụn̄ ọkpọn̄ mme ekikere esie; yak enye onyụn̄ afiak etiene Jehovah, emi edituade enye mbọm, onyụn̄ etiene Abasi nnyịn, koro enye eyefen ke akamba usụn̄.”—Isaiah 55:7.