Ih. Bible, n̄wed ọniọn̄ emi ẹkewetde ke eset, ọbọrọ mme akpan mbụme emi ẹsibụpde ẹban̄a uwem onyụn̄ ekeme ndin̄wam fi okop inem uwem onyụn̄ ama nte afo etiede. Kere ban̄a ndusụk mbụme emi enye ọbọrọde.

1.   Ndi Andibot Odu? Bible ọdọhọ ke Abasi “[okobot] kpukpru n̄kpọ.” (Ediyarade 4:11) Sia Abasi edide Andibot, enye ọfiọk se nnyịn iyomde man ikop inem uwem.

2.   Ndi Abasi ekere aban̄a mi? Bible idọhọke ke Abasi inyeneke n̄kpọ ndinam ye mme owo, edi akam ọdọhọ ke enye “[iyomke] usụn̄ ikpọn̄ nnyịn owo kiet kiet.” (Utom 17:27) Enye enyene udọn̄ ke idem fo onyụn̄ oyom ndin̄wam fi okụt unen ke uwem.—Isaiah 48:17, 18; 1 Peter 5:7.

3.   Didie ke ndifiọk Abasi ekeme ndinam uwem enem mi? Abasi okobot nnyịn man ikere iban̄a “unana [nnyịn] ke n̄kan̄ eke spirit,” oro edi, iyom usụn̄ ifiọk se ikpadade uwem nnyịn inam. (Matthew 5:3) Unana nnyịn ke n̄kan̄ eke spirit esịne ndiyom ndifiọk Andibot nnyịn nnyụn̄ nnam ufan ye enye. Esịt edikam inenem Abasi edieke afo esịnde ukeme ndifiọk enye, sia Bible ọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.”—James 4:8.

 Ediwak miliọn owo ẹkụt ke ndidi ufan Abasi anam uwem enem mmọ onyụn̄ anam mmọ ẹma nte uwem mmọ etiede. Okposụkedi emi ndifiọk Abasi mîditreke kpukpru mfịna fo, ọniọn̄ esie oro esịnede ke Bible ekeme ndin̄wam fi

•   Okop inem ubon fo.

•   Odu ke emem ye mbon en̄wen.

•   Ọyọ nsio nsio mfịna, utọ nte ọkpọsọn̄ mfụhọ, mfịna okụk, ye uyịre uyịre udọn̄ọ.

Ediwak ufọkabasi emi ẹkamade Bible itieneke se Bible ekpepde. Edi ido ukpono akpanikọ, emi etienede se Bible enen̄erede ekpep, ekeme ndin̄wam fi ọfiọk Abasi.