SE IDIN̄WAMDE UBON | NDỌ
Ndi Akpana Idụn̄ Kiet Mbemiso Inamde Ndọ?
Ediwak iren ye iban ẹsidụn̄ kiet mbemiso mmọ ẹnamde ndọ. Ndusụk mmọ ẹsinam emi sia mmọ ẹkere ke oro ayan̄wam mmimọ idiọn̄ọ m̀mê eyedi se inamde ndọ ẹnyụn̄ ẹkere ke ndidụn̄ kiet ayanam ndọ mmọ ọfọn mmọ ẹma ẹnam ndọ. Ndi ọfọn ndidụn̄ kiet mbemiso ẹnamde ndọ?
Ke ibuotikọ emi
Nso ke Bible etịn̄?
Bible inyịmeke owo anam idan̄ ke ini enye mîdọhọ ndọ. Ke uwụtn̄kpọ, enye ọdọhọ ete: “Mbufo ẹbet use.” (1 Thessalonica 4:3; 1 Corinth 6:18) Oro esịne idan̄ emi eren ye n̄wan emi ẹdụn̄de kiet ẹnamde, idem ekpededi mmọ ẹduak ndinam ndọ ke ini iso. a Se Bible etịn̄de esikam an̄wan̄wam eren ye n̄wan, iyakke n̄wan oyomo idịbi ke ini enye mîdọhọ ebe, onyụn̄ an̄wam mmọ ẹkûdụk mme mfịna emi mbon oro ẹsidụn̄de kiet ke ini mmọ mînamke ndọ ẹsidụkde.
Abasi ọkọtọn̄ọ ndọ. Ini enye ọkọtọn̄ọde ndutịm ndọ, enye ọkọdọhọ ete: ‘Erenowo ọyọkpọn̄ ete ye eka esie onyụn̄ akadiana ye n̄wan esie ndien mmọ ẹyekabade ẹdi obụk kiet.’ (Genesis 2:24) N̄wan ye ebe nditi se mmọ ẹken̄wọn̄ọde ẹnọ idemmọ ke n̄kpọ ndomokiet ididian̄akede mmimọ tutu amama esinen̄ede anam ndọ ebịghi, ima onyụn̄ odu.
Ndi ndidụn̄ kiet ayanam mbufo ẹben̄e idem ẹnọ ndọ?
Ndusụk owo ẹdọhọ ke ayanam. Mmọ ẹkere ke eren ye n̄wan emi ẹdụn̄de kiet mbemiso ẹnamde ndọ ẹsinen̄ede ẹkpep n̄kpọ nte mmọ ẹdianade kiet ẹnam utom ufọk, ke mmọ ẹsinyụn̄ ẹdiọn̄ọ mme edu kiet eken. Edi, ata akpan n̄kpọ emi esinamde ndọ ọfọn edi ebe ye n̄wan nditi se mmọ ẹken̄wọn̄ọde ẹnọ idemmọ ke usen ndọ ke n̄kpọ ndomokiet ididian̄akede mmimọ tutu amama.
Nso ke eren ye n̄wan ẹkpenam man ẹkpep ndika iso ndiana kiet ke ini n̄kpọ ọfọnde ye ke ini n̄kpọ ọdiọkde? Idịghe ndidụn̄ kiet man ẹdomo ẹse m̀mê mmimọ iyekeme ndidọ idem mmimọ m̀mê ndikere ke ndọ edi n̄kpọ edide ẹma ẹdụk mfịn n̄kpọn̄ ẹwọrọ. Utu ke oro, ndọ esifọn ke ini eren ye n̄wan ẹdiọn̄ọde ke n̄kpọ ndomokiet ididian̄akede mmimọ ẹnyụn̄ ẹdianade kiet ẹnam n̄kpọ man ẹkan mme mfịna oro mmọ ẹnyenede.
Se anade ọdiọn̄ọ: Utu ke eren ye n̄wan ndidụn̄ kiet n̄kere ke mmimọ iben̄e idem inọ ndọ, ana mmọ ẹti ke ndinam utọ n̄kpọ oro ekeme ndikam nnanam mmọ ẹdian̄ade.
Se Bible etịn̄de: “Se ededi eke owo ọtọde, oro ke enye edinyụn̄ ọdọk.”—Galatia 6:7.
Ndi ndidụn̄ kiet ayanam mbufo ẹfam okụk ẹnịm?
Ndusụk owo ẹdọhọ ke ayanam. Ndụn̄ọde oro mbon Pew Research Center ẹkenamde ke United States owụt ke n̄kpọ nte owo inan̄ ke otu ikpọ owo duop emi ẹdụn̄de kiet ke ini mmọ mînamke ndọ ẹkedọhọ ke mmimọ ndidụn̄ kiet ayan̄wam mmimọ ifam okụk inịm inọ ndọ. Edi, ke mmọ ẹma ẹkedụn̄ kiet ke ndusụk ini, ediwak mmọ ẹsụk ẹdọhọ ke ata akpan ntak emi anamde mmimọ ikûnam ndọ edi ke mmimọ inyeneke okụk ndida nnam ndọ.
Ndidụn̄ kiet mbemiso ndọ esikama ediwak mfịna, ndien esinen̄ede afịna iban. Ke uwụtn̄kpọ, ke ini mmọ ẹdian̄arede, iban oro ẹsiwak ndibọ ufen n̄kama nditọ oro mmọ ẹkenyenede do.
Se anade ọdiọn̄ọ: Mme mfịna emi ẹsidude ke ndidụn̄ kiet mbemiso ẹnamde ndọ okpon akan ufọn ekededi oro mme owo ẹkerede ke mmimọ iyenyene edieke idụn̄de kiet mbemiso inamde ndọ.
Se Bible etịn̄de: “Ami Jehovah, ndi Abasi fo, Enye emi ekpepde fi man afo ọbọ ufọn.”—Isaiah 48:17.
Ndi ndidụn̄ kiet mbemiso ẹnamde ndọ ayanam okûdọ owo emi mûkpudọhọ?
Ndusụk owo ẹdọhọ ke ayanam. Edi, enyene se n̄wed kiet emi ẹkotde Fighting for Your Marriage etịn̄de. N̄wed oro ọdọhọ ke “mbon emi ẹsidụn̄de kiet mbemiso ẹnamde ndọ isisọpke idiọn̄ọ ke ndidụn̄ kiet esikam ananam ọsọn̄ owo ndidian̄ade.” Ntak-a? Ndusụk mbon emi ẹdụn̄de kiet ke ini mmọ mîdọhọ ndọ ẹsidikụt ke owo mmimọ idụn̄de kiet do idifọnke se mmimọ idọde. Edi ke ntak ediwak n̄kpọ emi mmọ ẹbuanade kiet ẹnyene, utọ nte ebua, ufọk m̀mê idịbi ndidụk ke ini owo mîkodorike enyịn, esisọn̄ mmọ ndidian̄ade. b Ke nditịn̄ ke usụn̄ en̄wen, n̄wed oro Fighting for Your Marriage ọdọhọ ke “ndusụk mbon oro ẹkpemade ndidian̄ade ẹsidọ owo emi mmọ mîkpọdọhọ sia mmọ ẹma ẹdodụn̄ kiet ẹmehe.”
Se anade ọdiọn̄ọ: Ndidụn̄ kiet ye owo mbemiso ẹdọde ndọ idinamke fi ọdiọn̄ọ m̀mê ọkpọdọdọ owo oro mûkpudọhọ, utu ke oro, edikam inanam ọsọn̄ fi ndikpọn̄ owo oro, ekpededi enye idifọnke ye afo.
Se Bible etịn̄de: “Owo mbufiọk ada okụt afanikọn̄ ndien edịbe, edi ọkọi ebe aka ọkọbọ ufen.”—Mme N̄ke 22:3.
Ndi odu n̄kpọ en̄wen emi ọfọnde akan oro?
Emekeme ndibọhọ ofụri mfịna oro mme owo ẹsinyenede ke ntak emi mmọ ẹdụn̄de kiet ye owo mbemiso ẹnamde ndọ, ndien ndọ fo onyụn̄ ekeme ndifọn. Didie ke oro ekeme nditịbe? Edieke anamde ofuri se ekekeme man anam ofụri se Bible etin̄de aban̄a ndọ, ndọ fo ọyọfọn onyụn̄ enem. Nen̄ede da ini diọn̄ọ owo emi oyomde ndidọ mbemiso ẹnamde ndọ. Enen̄ede ọfọn emek owo emi edidọde ke ntak emi enye amade mme n̄kpọ emi afo amade, onyụn̄ enịmde se afo enịmde utu ke ndimek owo ke ntak uyai kpọt.
Bible ọdọn̄ọ nti item emi ẹkemede ndin̄wam fi ọtọn̄ọ ndọ emi edinemde edinyụn̄ ibịghide. c Ke uwụtn̄kpọ, Bible ọdọn̄ọ mme item emi ẹdin̄wamde fi . . .
esinam akpanikọ
edi eti an̄wan m̀mê ebe
Edieke oyomde ndidiọn̄ọ mme n̄kpọ en̄wen mban̄a ibuotikọ emi, se ikpehe “Ndọ ye Ubon” ke jw.org.
Se Bible etịn̄de: “Abasi ọkọnọ odudu spirit ẹda ẹwet ofụri N̄wed Abasi, ndien enye ọfọn ndida nnọ ukpep.”—2 Timothy 3:16.
a Kot ibuotikọ emi “Does Romantic Love Justify Premarital Sex?”
b Ẹda ẹto ibuotikọ emi “Sliding Versus Deciding: Inertia and the Premarital Cohabitation Effect,” emi Scott M. Stanley, Galena Kline Rhoades, ye Howard J. Markman, ẹkewetde ke n̄wed oro Family Relations.
c Ke ndusụk obio, mme ete ye eka ẹsimek owo emi mmọ ẹyomde eyen mmọ ọdọ. Ama etie ntre, Bible osụk ekeme ndin̄wam mme ete ye eka ẹdiọn̄ọ mme edu oro owo emi mmọ ẹyomde eyen mmọ ọdọ ekpenyenede.
Ekeme Ndidi Ayama Mmọ Emi N̄ko
BIBLE EKEME NDIBỌRỌ MBỤME FO
Nso ke Bible Etịn̄ Aban̄a Mbon Emi Mîdọhọ Ndọ Ndidụn̄ Kiet?
Ndausụn̄ emi Abasi ọnode nnyịn esinam idiọn̄ọ nte ikpanamde ubon nnyịn enem, ndien nte Abasi ọdọhọde idu uwem esifọn ye mbon oro ẹmade.
ẸDEMEDE!
Ndi Ọdiọk Owo Emi Mîdọhọ Ndọ Ndinam Idan̄?
Se se Bible etịn̄de aban̄a ndinam idan̄ ke ini owo mîdọhọ ndọ ye mme mbubiam ido eken.
SE BIBLE EKPEPDE EMI ANADE OWO ỌDIỌN̄Ọ
Abasi Ada Didie Ndọ?
Abasi iyomke ndọ fo asuana. Item emi odude ke Bible an̄wam ediwak mme ọdọ ndọ.
