•  Ntọn̄ọikọ 2

•  Mme Akpan N̄kpọ ke Ikọ Abasi 3-5

  •  Utịn̄ikọ 3

  •  Yom N̄kpọuto ke Ikọ Abasi 4

  •  Edikot Bible 5

•  Kpep Ndikwọrọ Ikọ Ọfọn 6-14

  •  Nte Ọkpọtọn̄ọde Nneme 7

  •  Sifiak Ka 8

  •  Ndinam Mme Owo Edi Mbet Jesus 9

  •  Ndinam Se Enịmde ke Akpanikọ An̄wan̄a 10

  •  Utịn̄ikọ 11

  •  Nte Ẹdinamde 12

  •  Nte Ẹtimde 13

  •  Ndida Mme Vidio ye N̄wed Nnyịn Nnam N̄kpọ 14

•  Nte Christian Okpodude Uwem 15-16

  •  Ukpepn̄kpọ Bible Esop 16

•  Utịtikọ 17

•  Itoro ye Item 18

•  Ini 19

•  Urua Emi Esenyịn Circuit Edide 20

•  Urua Mbono Circuit M̀mê Akamba Mbono 21

•  Urua Editi 22

•  Esenyịn Mbono Esop Uwem ye Utom Nnyịn 23

•  Etieibuot Okpokoro Mbono Esop Uwem ye Utom Nnyịn 24

•  Udiana Ọnọitem 25

•  Mme Udiana Ubet Ukpepn̄kpọ 26

•  Mme Vidio 27

1. Ndausụn̄ emi ayan̄wam kpukpru mbon emi enyenede n̄kpọ ndinam ke Mbono Esop Uwem ye Utom Nnyịn Mme Christian. Mmọ ẹkpenyene ndidụn̄ọde ndausụn̄ kaban̄a se ẹnọde mmọ ẹnam nte ẹwetde ke N̄wed Mbono Esop Uwem ye Utom Nnyịn Mme Christian ye se ẹwetde emi mbemiso ẹtịmde se ẹnọde mmọ. Mbọk ẹdọhọ kpukpru mme asuanetop ẹben̄e idem ndinam se ẹnọde mmọ ẹnam. Ẹkeme n̄ko ndinọ mbon oro mîdịghe kan̄a mme asuanetop edinam eyen ufọkn̄wed edieke mmọ ẹnyịmede se Bible ekpepde, ẹdude uwem nte Bible ọdọhọde, ẹsinyụn̄ ẹdụkde mbono esop kpukpru ini. Edieke owo mîdịghe asuanetop edi oyomde ndisịn enyịn̄, esenyịn Mbono Esop Uwem ye Utom Nnyịn ekpenyene ndineme mme n̄kpọ oro ẹyomde ye enye onyụn̄ anam enye ọfiọk m̀mê enye odot. Ọkpọfọn ẹnam ntre ke iso owo oro ekpepde enye Bible (mîdịghe ke iso ete m̀mê eka esie emi edide andinịm ke akpanikọ). Mme n̄kpọ oro ẹyomde mi ẹdi ukem ukem ye se ẹyomde ẹto owo oro oyomde ndikabade ndi asuanetop oro mînaha baptism.—od ib. 8 ikp. 8.

2. Minit 1. Kpukpru urua, ke ẹma ẹkekwọ ikwọ ẹnyụn̄ ẹbọn̄ akam, etieibuot okpokoro Mbono Esop Uwem ye Utom Nnyịn eyetịn̄ ikọ ifan emi edinamde mbono Esop usen oro ọdọn̄ kpukpru owo. Enye ekpetịn̄ mme n̄kpọ emi ẹdinen̄erede inyene ufọn inọ esop.

 3. Utịn̄ikọ: Minit 10. Ẹwet ibuotikọ ye akpan n̄kpọ iba m̀mê ita oro ẹdinemede ke N̄wed Mbono Esop Uwem ye Utom Nnyịn. Ebiowo m̀mê asan̄autom unamutom oro odotde ke ẹkpenọ utịn̄ikọ emi. Edieke itie Bible oro ẹkedọhọde ẹkot urua oro edide akpa ibuot n̄wed Bible, ẹyebre vidio emi editịn̄de n̄kpọ iban̄a n̄wed Bible oro. Etịn̄ikọ ekeme ndiwụt nte vidio oro enyenede n̄kpọ ndinam ye ibuotikọ oro enye enemede. Edi, akpana enye okụt ete ke imeneme mme akpan n̄kpọ oro ẹsiakde ke N̄wed Mbono Esop Uwem ye Utom Nnyịn. Edieke ini odude, enye ekpenyene nditịn̄ n̄kpọ mban̄a mme ndise oro ẹdude do. Ẹdọn̄ mme ndise emi man ẹda ẹdian ẹkpep esop n̄kpọ. Enye ekeme n̄ko ndisio n̄kpọ ke Enyọn̄-Ukpeme m̀mê ke n̄wed oro ẹsiakde ke utịn̄ikọ emi nsịn ke utịn̄ikọ esie, amakam edi oro ayanam mme akpan n̄kpọ oro enye enemede enen̄ede an̄wan̄a otuowo.

 4. Yom N̄kpọuto ke Ikọ Abasi: Minit 10. Enye emi edidi mbụme ye ibọrọ, inyeneke ntọn̄ọikọ ye utịtikọ. Ebiowo m̀mê asan̄autom unamutom oro odotde edinam. Enye ekpenyene ndibụp otuowo mbụme iba oro ẹdude ke ikpehe emi. Enye ekeme ndibiere n̄ko m̀mê ẹkpekokot mme ufan̄ikọ Bible oro ẹsiakde ẹsịn do. Mbon oro ẹbọrọde mbụme ẹkpenyene ndibọrọ ke sekọn 30 m̀mê osụhọrede akan oro.

 5. Edikot Bible: Minit 4. Ẹdinọ eyen ufọkn̄wed emi edide eren. Enye ekpenyene ndikot itie oro ẹnọde enye, itịn̄ke ntọn̄ọikọ m̀mê utịtikọ. Etieibuot okpokoro mbono esop eyenen̄ede an̄wam nditọ ufọkn̄wed ẹkot n̄wed ọfọn, ọdọnọ, onyụn̄ an̄wan̄a owo; ẹmenede ẹnyụn̄ ẹsụhọde uyo ke ebiet oyomde ẹnam ntre, ẹtuak ẹda esisịt ke ebiet ẹkpetuakde ẹda, ẹnyụn̄ ẹkot enye nte mmọ ẹsitịn̄de ikọ. Sia ndusụk itie Bible emi ẹdọhọde ẹkot esiniọn̄de akan ndusụk, akpana esenyịn Mbono Esop Uwem ye Utom Nnyịn ekere aban̄a ukeme eyen ufọkn̄wed kiet kiet mbemiso enye ọnọde mmọ edikot Bible.

6. Minit 15. Ikpehe mbono esop enye emi ọyọnọ kpukpru owo ifet ndikpep nte mmọ ẹdikwọrọde ikọ, onyụn̄ owụt nte ẹkpeforide ukeme ndinyene nneme, ndikwọrọ ikọ ye ndikpep owo n̄kpọ ọfọn. Ẹkeme ndinọ mbiowo edinam eyen ufọkn̄wed ini ekededi oro ẹkụtde ke ọfọn ẹnam ntre. Akpana eyen ufọkn̄wed kiet kiet anam se ẹnọde enye nte ẹdọhọde ke nọmba n̄wed Ukpepn̄kpọ m̀mê ediye ekpri n̄wed Ma Mme Owo emi esịnede ke N̄wed Mbono Esop Uwem ye Utom Nnyịn. Ndusụk ini, ẹyetịn̄ ikpehe enye oro ẹdinamde nte nneme. Ekpedi ntre, ebiowo m̀mê asan̄autom unamutom emi odotde edise aban̄a.—Se  ikpehe ekikere 15 man okụt nte edinamde ikpehe emi edide nneme.

 7. Nte Ọkpọtọn̄ọde Nneme: Eyen ufọkn̄wed emi edide eren m̀mê n̄wan ekeme ndinam ikpehe emi. Ke ini ẹnọde eren, andin̄wam ekpenyene ndidi eren n̄ko m̀mê owo ubon esie. Ke ini ẹnọde n̄wan, andin̄wam ekpenyene ndidi n̄wan n̄ko m̀mê owo ubon esie. Mmọ ẹkeme nditetie mîdịghe ẹdada.—Se  ikpehe ekikere 12 ye  13 man okụt ntọt efen efen kaban̄a nte ekpetịmde ye se ẹyomde ẹto owo emi anamde ikpehe emi.

 8. Sifiak Ka: Eyen ufọkn̄wed emi edide eren m̀mê n̄wan ekeme ndinam ikpehe emi. Ke ini ẹnọde eren, andin̄wam ekpenyene ndidi eren n̄ko. Ke ini ẹnọde n̄wan, andin̄wam ekpenyene ndidi n̄wan n̄ko. (km 5/97 p. 2) Mmọ ẹkeme nditetie mîdịghe ẹdada. Eyen ufọkn̄wed ekpenyene ndinam n̄wụt se ẹkpetịn̄de ke ini ẹfiakde ẹka ẹbịne owo oro akakpan̄de utọn̄ akpa ini emi ẹkenyenede nneme ikọ Abasi.—Se  ikpehe ekikere 12 ye  13 man okụt ntọt efen efen kaban̄a nte ekpetịmde ye se ẹyomde ẹto owo emi anamde ikpehe emi.

 9. Ndinam Mme Owo Edi Mbet Jesus: Eyen ufọkn̄wed emi edide eren m̀mê n̄wan ekeme ndinam ikpehe emi. Ke ini ẹnọde eren andin̄wam ekpenyene ndidi eren n̄ko. Ke ini ẹnọde n̄wan andin̄wam ekpenyene ndidi n̄wan n̄ko. (km 5/97 p. 2) Mmọ ẹkeme nditetie mîdịghe ẹdada. Ke ini ẹnọde fi ikpehe emi, kûtịn̄ n̄kpọ emi owụtde ke oyom nditọtọn̄ọ ukpepn̄kpọ Bible idaha oro, edi yak otuowo ẹkụt nte afo osụk ekpepde owo n̄kpọ. Ufọn idụhe ndikọm enyeneufọk m̀mê ndidọhọ enye ke iyom nditọn̄ọ mi m̀mê ke iyom nditre mi mfịn ibọhọke se ẹsede fi edi oro. Idịghe ibet ke ana okot kpukpru ikpehe, inyụn̄ idiọkke ndikot edieke amade.

 10. Ndinam Se Enịmde ke Akpanik An̄wan̄a: Edieke edide utịn̄ikọ, eyen ufọkn̄wed emi edide erenowo ekpenyene ndinam ikpehe emi. Ẹkpedi nnamn̄wụt, eyen ufọkn̄wed emi edide eren m̀mê n̄wan ekeme ndinam. Ke ini ẹnọde erenowo, andin̄wam ekpenyene ndidi erenowo n̄ko. Ke ini ẹnọde n̄wan, andin̄wam ekpenyene ndidi n̄wan n̄ko. Mîdịghe enye edi owo ubon owo emi ẹkenọde n̄kpọ anam. Eyen ufọkn̄wed emi ekpenyene ndida mbufiọk mbọrọ mbụme emi edide ibuotikọ esie in̄wan̄ in̄wan̄. Enye ekpenyene ndida n̄kpọ nto n̄wed emi ẹsiakde ẹsịn ke ikpehe emi. Eyen ufọkn̄wed edibiere m̀mê iyasiak n̄wed emi ẹdade edinam esie ẹto ke ini enye anamde se ẹnọde enye anam.

 11. Utịn̄ikọ: Ẹdinọ erenowo utịn̄ikọ eyen ufọkn̄wed emi. Enye edinọ nte ẹsinọde utịn̄ikọ ofụri owo. Ke ini se ẹnọde enye anam otode appendix A ke ediye ekpri n̄wed Ma Mme Owo, eyen ufọkn̄wed ekpenyene ndinam an̄wan̄a nte ekpedade mme ufan̄ikọ Bible oro ẹnam n̄kpọ ke an̄wautom. Ke uwụtn̄kpọ, enye ekeme ndinam an̄wan̄a ini ẹkpedade mme ufan̄ikọ Bible oro ẹnam n̄kpọ, se mme ufan̄ikọ oro ọwọrọde, ye nte ẹkpedade enye ẹkọk ibuot ye owo. Edieke utịn̄ikọ oro otode kiet ke otu mme ukpepn̄kpọ ke ediye ekpri n̄wed Ma Mme Owo, eyen ufọkn̄wed ekpenyene ndiwụk ntịn̄enyịn ke nte ẹkpedade akpan n̄kpọ oro ẹnam n̄kpọ ke an̄wautom. Enye ekeme ndinam uwụtn̄kpọ oro ẹsịnde ke akpa nọmba ke ukpepn̄kpọ oro an̄wan̄a mîdịghe anam an̄wan̄a itie n̄wed Abasi emi ẹwetde ke ikpehe oro ẹkotde Se N̄ko emi esịnede ke ukpepn̄kpọ oro, edieke emi edin̄wamde otuowo.

   12. Nte Ẹdinamde: Se ẹtịn̄de ke ikpehe emi ye enye oro etienede enyene n̄kpọ ndinam ye edinam eyen ufọkn̄wed “Nte Ọkpọtọn̄ọde Nneme” ye “Sifiak Ka”. Ibọhọke ẹnọ ndausụn̄ en̄wen, se ẹyomde eyen ufọkn̄wed anam edi ndibuana mmemmem akpanikọ Bible oro edinemde owo ndikop, onyụn̄ obụp mbụme mîdịghe anam n̄kpọ emi edin̄wamde enye ekeme ndifiak n̄kenyene nneme ye owo oro. Eyen ufọkn̄wed ekpenyene ndimek ibuotikọ emi odotde onyụn̄ ekemde ye idaha n̄kann̄kụk. Enye edibiere m̀mê iyọnọ owo n̄wed mîdịghe iwụt vidio emi esịnede ke Mme Akpan N̄kpọ Emi Isidade Ikpep Owo Bible. Utu ke ndinam n̄wụt se enye okomụmde ọdọn̄ ke ibuot, eyen ufọkn̄wed ekpenyene ndinam n̄wụt mme usụn̄ emi ẹkpenemede nneme, utọ nte ndiwụt ke imama mme owo ye ndinam n̄kpọ ke ndammana usụn̄.

   13. Nte Ẹtịmde: Eyen ufọkn̄wed ekpenyene nditịm se ẹnọde enye anam yak ekekem ye idaha n̄kann̄kụk. Ke uwụtn̄kpọ:

1. (1) Ukwọrọikọ Eke Ufọk ke Ufọk: Nte etịmde enye emi abuana ndikwọrọ ikọ ke ufọk ke ufọk—edide iso ye iso, ke fon, m̀mê ndiwet leta—ye ndifiak n̄ka mbịne owo emi ikọkwọrọde ikọ inọ ke ukwọrọikọ eke ufọk ke ufọk.

2. (2) Ukwọrọikọ Ido Nneme: Enye emi abuana ndiben̄eidem ndinam nneme oro inemede ye mme owo akabade edi nneme ikọ Abasi. Emi ekeme ndisịne ndibuana itie n̄wed Abasi ye owo ke itie utom, ufọkn̄wed, ye mbọhọidụn̄, owo emi okụtde ke n̄kpọisan ofụri owo, ke mme itie en̄wen, ye nte anamde mme n̄kpọ ke usen ke usen.

3. (3) Ndikwọrọ Ikọ ke Ebiet Emi Mme Owo Ẹwakde: Enye emi abuana ndida ke ukpatn̄kpọ, ukwọrọikọ ke itie mbubehe, ke efak, ke itie unọ idem nduọk odudu, ke itie unịm moto ye itie ekededi emi mme owo ẹdude.

 14. Ndida Mme Vidio ye N̄wed Nnyịn Nnam N̄kpọ: Etiene nte mme idaha etiede, eyen ufọkn̄wed ekeme ndibiere ndinọ owo n̄wed m̀mê ndiwụt owo vidio. Edieke se ẹnọde eyen ufọkn̄wed anam esịnede ndiwụt owo vidio mîdịghe enye ke idemesie ebiere ndiwụt owo vidio, enye eyetịn̄ n̄kpọ aban̄a vidio oro, edi idibreke.

15. Ke ẹma ẹkekwọ ikwọ, ikpehe enye emi edidi minit 15. Ndusụk ini, ẹdinam n̄kpọ kiet m̀mê iba kpọt. Se ẹdinemede ayan̄wam kpukpru nnyịn ida se ikpepde ke Bible idu uwem. Ibọhọke ẹsiak akpan owo emi ẹdọhọde anam, mbiowo m̀mê mme asan̄autom unamutom oro ẹdotde ẹdinam n̄kpọ ke ikpehe enye emi. Edi edieke edide “Se Ẹyomde Ẹneme ke Esop,” ebiowo edinam. Edieke ẹdọhọde ke ikpehe emi edi nneme, eyenete oro ẹnọde ikpehe emi ekeme ndimek mme mbụme efen-efen ke adianade ye enye emi ẹnọde. Ntọn̄ọikọ esie ekpedi ibio ibio man enye enyene ini ndision̄o mme akpan n̄kpọ onyụn̄ ọnọ otuowo ufan̄ nditiene mbuana. Edieke oyomde ẹnam ndụn̄ọde ye asuanetop, ekpenen̄ede ọfọn owo oro ọdọk edi mbot utịn̄ikọ utu ke nditie ke otu owo mbọrọ.

  16. Ukpepn̄kpọ Bible Esop: Minit 30. Ẹkpenọ ebiowo emi enen̄erede ọdiọn̄ọ ndikpep n̄kpọ. (Ke mme esop oro mbiowo mîwakke, ẹkeme ndinọ mme asan̄autom unamutom emi ẹfiọkde ndikpep n̄kpọ.) Otu mbiowo ẹdibiere m̀mê anie odot ndinịm Ukpepn̄kpọ Bible Esop. Akpana ẹmek mbon oro ẹdikemede ndinịm ukpepn̄kpọ emi ọfọn inyụn̄ idiaha ini. Akpana mmọ ẹnen̄ede ẹfiọk ndinam mme akpan itie N̄wed Abasi oro ẹdude ke ukpepn̄kpọ oro an̄wan̄a owo, ẹnyụn̄ ẹkeme ndin̄wam kpukpru owo ẹkụt nte ẹkpedade se ẹkpepde ẹdu uwem. Mbon oro ẹmekde ẹyebọ ufọn ẹto ndidụn̄ọde ndausụn̄ emi esop Abasi ẹnọde kaban̄a nte ẹkpenịmde ikpehe emi edide mbụme ye ibọrọ. (w23.04 p. 24, ekebe) Ke ẹma ẹkekụre ndikpep se ẹkedọhọde ẹkpep urua oro, ufọn idụhe ada Ukpepn̄kpọ Bible Esop ndisụk nyịre ndọhọ ke ana imọ ida minit 30. Edieke mbon oro ẹsinịmde ukpepn̄kpọ emi ye mbon oro ẹsikotde ikpehe ẹwakde, ọkpọfọn nsio nsio owo ẹsinịm ukpepn̄kpọ emi, nsio nsio owo ẹnyụn̄ ẹkot ikpehe kpukpru urua. Edieke etieibuot okpokoro Mbono Esop Uwem ye Utom Nnyịn ọdọhọde ada ukpepn̄kpọ osụhọ ndusụk ini ọnọ imọ, ada ukpepn̄kpọ edibiere nte enye edinamde oro. Enye ekeme ndidọhọ ẹkûkot ndusụk ikpehe.

17. Minit 3. Etieibuot okpokoro Mbono Esop Uwem ye Utom Nnyịn eyetịn̄ akpan n̄kpọ ifan̄ oro ẹkpepde usen oro onyụn̄ etịn̄ se ẹdikpepde urua en̄wen. Enye ekeme ndisiak enyịn̄ nditọ ufọkn̄wed oro ẹdinamde n̄kpọ urua en̄wen, edieke ini odude. Etieibuot okpokoro ekpenyene ndida ini emi n̄ko nnọ ntọt ekededi emi ẹkụtde ke oyom ẹnọ nnyụn̄ n̄kot leta emi ẹdọhọde ẹkot ẹnọ esop, ibọhọke ẹsiak ini en̄wen emi ẹkpenamde emi. Enye ikpadaha ini emi ikot mme utọ n̄kpọ nte ndutịm an̄wautom m̀mê ndutịm ẹdinịm Ufọkmbono Obio Ubọn̄ asana, edi ẹkpedian mme utọ n̄kpọ oro ke obukpọk ntọt. Edieke ini oro ẹnọde mi mîdikemke se enye adade ọnọ ntọt m̀mê okot leta, akpana enye ọdọhọ nditọete emi ẹnọde n̄kpọ ẹnam ke ikpehe mbono esop emi ẹkotde Nte Christian Okpodude Uwem, ẹsụhọ ini ẹnọ imọ. (Se  ikpehe ekikere 16 and  19.) Ẹyekwọ ikwọ ẹnyụn̄ ẹbọn̄ akam ẹberi mbono esop emi.

18. Ke ini eyen ufọkn̄wed kiet kiet anamde n̄kpọ ama, etieibuot okpokoro Mbono Esop Uwem ye Utom Nnyịn ayada n̄kpọ nte minit kiet otoro eyen ufọkn̄wed onyụn̄ ọnọ enye item nte ekemde ye ibuot ukpepn̄kpọ emi ẹkenọde enye. Ke ini etieibuot okpokoro okotde eyen ufọkn̄wed edinam se ẹkenọde enye, enye idisiakke se ẹsede eyen ufọkn̄wed oro. Edi, eyen ufọkn̄wed ama okụre se ẹkenọde enye, oyotoro enye ke se anamde ọfọn; enye ekeme nditịn̄ se ẹkesede eyen ufọkn̄wed oro onyụn̄ etịn̄ se inamde enye ọdọhọ ke eyen ufọkn̄wed oro anam ọfọn, mîdịghe etịn̄ nte eyen ufọkn̄wed oro akpanamde se ẹkesede enye afiak ọfọn akan oro. Etieibuot okpokoro ekeme nditịn̄ n̄kpọ en̄wen emi enye okụtde ke eyenyene ufọn ọnọ eyen ufọkn̄wed oro m̀mê otuowo. Ke mbono esop ama akasuana m̀mê ke ini en̄wen, enye ekeme ndida se idude ke ediye ekpri n̄wed Ma Mme Owo, n̄wed Ukpepn̄kpọ m̀mê n̄wed Ufọkn̄wed Utom nnọ eyen ufọkn̄wed item emi edin̄wamde enye, edi ọkpọfọn edi sụk enye ye eyen ufọkn̄wed oro. Item emi ekeme ndiban̄a se ẹkesede eyen ufọkn̄wed m̀mê n̄kpọ en̄wen.—Se  ikpehe ekikere 19,  24, ye  25, edieke oyomde ndifiọk n̄kpọ efen efen mban̄a utom etieibuot okpokoro Mbono Esop Uwem ye Utom Nnyịn ye utom udiana ọnọitem.

19. Ikpanaha owo ndomokiet adia ini, se etieibuot okpokoro Mbono Esop Uwem ye Utom Nnyịn etịn̄de ikponyụn̄ ibehe ini emi ẹnọde enye. Kpa ye emi N̄wed Mbono Esop Uwem ye Utom Nnyịn owụtde ini emi ẹkpedade ẹnam ikpehe kiet kiet, edieke ẹnamde n̄kpọ ẹma, ndien ini osụhọ, ufọn idụhe ndidian mme ikọ efen man ẹda ẹkụre ini oro ọsụhode do. Edieke owo adiade ini, etieibuot okpokoro Mbono Esop Uwem ye Utom Nnyịn m̀mê udiana ọnọitem ekpenyene ndinọ enye item ke ndịbe. (Se  ikpehe ekikere 24 ye  25.) Mbono esop emi, esịnede ikwọ ye akam, ikpebehe hour 1 ye minit 45.

20. Ke urua emi esenyịn circuit edide esop, ẹkpenịm mbono esop emi nte ẹtịn̄de ke N̄wed Mbono Esop Uwem ye Utom Nnyịn. N̄kukụre se owo mîdinamke edi Ukpepn̄kpọ Bible Esop, sia esenyịn circuit edida minit 30 oro inọ akpa utịn̄ikọ esie. Mbemiso esenyịn circuit ọnọde utịn̄ikọ emi, etieibuot okpokoro Mbono Esop Uwem ye Utom Nnyịn eyetịn̄ akpan n̄kpọ ifan̄ oro ẹkpepde usen oro, etịn̄ se ẹdikpepde urua en̄wen, ọnọ ntọt ekededi oro ẹyomde ẹnọ, onyụn̄ okot leta oro ẹyomde ẹkot, ndien ekem okot esenyịn circuit edinọ utịn̄ikọ esie. Ke esenyịn circuit ama ọkọnọ utịn̄ikọ ama, enye edimek ikwọ emi ẹdikwọde isuana. Enye ekeme ndikot eyenete en̄wen edibọn̄ akam usuana. Esop emi esenyịn circuit edide edise idinamke n̄kpọ ke udiana ubet ukpepn̄kpọ ke usen emi ẹnịmde Mbono Esop Uwem ye Utom Nnyịn. Edieke esop ẹnyenede otu, otu oro ẹkeme ndisụk nnịm mbono esop mmọ ke udiana ubet ukpepn̄kpọ ke ini esenyịn circuit edide esop emi ẹsede ẹban̄a mmọ. Mmọ ẹkpenyene nditiene esop emi ẹsede ẹban̄a mmọ n̄kop utịn̄ikọ esenyịn circuit.

21. Owo idinịmke mbono esop ndomokiet ke urua oro esop ẹnyenede mbono circuit m̀mê akamba mbono. Ẹkpenyene nditi nditọete ke esop yak mmọ ẹtie owo kiet kiet mîdịghe nte ubon ẹkpep se ẹkpekpepde ke mbono esop urua oro.

22. Ke ini Editi odụkde ke ufọturua, Monday esịm Friday, owo idinịmke mbono esop ufọturua urua oro.

23. Otu mbiowo ẹyemek ebiowo kiet edi esenyịn Mbono Esop Uwem ye Utom Nnyịn. Enye enyene ndikụt nte ke ẹnịm mbono esop emi ọfọn, ke ẹnyụn̄ ẹtiene ndausụn̄ oro ẹnọde mi. Enye ye udiana ọnọitem ẹkpenyene ndidiana kiet nnam utom mmọ. Ke ndondo oro N̄wed Mbono Esop Uwem ye Utom Nnyịn edide edisịm, esenyịn Mbono Esop Uwem ye Utom Nnyịn ekpenyene ndideme kpukpru n̄kpọ oro ẹdinamde ke mbono esop ufọturua ke ọfiọn̄ iba. Emi esịne edinam oro mîdịghe edinam nditọ ufọkn̄wed, mbon oro edide etibuot okpokoro ke otu mbon emi otu mbiowo ẹkemekde ye edinam nditọ ufọkn̄wed. (Se  ikpehe ekikere 3-16 ye  24.) Ke ini oyomde ndibiere se ọkpọnọde eyen ufọkn̄wed anam, enye ekpenyene ndikere mban̄a isua emana, udomo ifiọk, ye ifụre utịn̄ikọ eyen ufọkn̄wed kaban̄a se ẹnọde enye anam. Enye ekpenyene ndinam ukem emi ke mme ikpehe eken ke mbono esop. Ekpenyene ndibabak nda babru Se Ẹnọde Fi Anam ke Mbono Esop Uwem ye Utom Nnyịn (S-89) nnọ nditọ ufọkn̄wed se mmọ ẹdinamde. Ekpenyene ndinọ mmọ babru emi urua ita ke nsụhọde n̄kaha mbemiso usen emi mmọ ẹdinamde n̄kpọ. Esenyịn mbono esop uwem ye utom nnyịn ekpenyene ndikụt nte ke ẹdian kpukpru se ẹdinamde ke obukpọk ntọt. Otu mbiowo ẹkeme ndimek ebiowo m̀mê asan̄autom unamutom man an̄wam enye. Edi, mbiowo kpọt ke ẹkpedọhọ ẹdeme ikpehe emi mîdịghe edinam nditọ ufọkn̄wed.

24. Kpukpru urua, ebiowo kiet edidi etieibuot okpokoro Mbono Esop Uwem ye Utom Nnyịn. (Ke mme esop oro mbiowo mîwakke, ẹkeme ndidọhọ asan̄autom unamutom oro odotde edi etieibuot okpokoro.) Enye editịm ntọn̄ọikọ ye utịtikọ esie. Enye edikot kpukpru mbon oro ẹnyenede n̄kpọ ke mbono esop usen oro ẹdinam se ẹkenọde mmọ. Enye ekeme nditiene nnam n̄kpọ n̄ko ke mbono esop usen oro edieke mbiowo mîwakke. Enye ikpetịn̄ke ikọ awak akaha ke owo kiet kiet ama okokụre se ẹkenọde enye anam. Otu mbiowo ẹdimek mbiowo emi ẹdotde ndidi mme etieibuot okpokoro Mbono Esop Uwem ye Utom Nnyịn. Mbiowo emi ẹdisinịm mbono esop emi ke ini ke ini. Etiene nte n̄kpọ etiede ke esop, ẹkeme ndisinọ esenyịn Mbono Esop Uwem ye Utom Nnyịn etieibuot okpokoro mbono esop ndien ndien akan nte ẹnọde mbiowo eken emi otu mbiowo ẹkemekde. Edieke ebiowo odotde ndinịm Ukpepn̄kpọ Bible Esop, ekeme ndidi enye oyodot n̄ko ndidi etieibuot okpokoro mbono esop emi. Mbọk ẹti ke edi utom ebiowo emi edide etieibuot okpokoro mbono esop ndisitoro mbon oro ẹnyenede utịn̄ikọ eyen ufọkn̄wed nnyụn̄ nnọ mmọ item ke ima ima usụn̄, edieke oyomde. Enye onyụn̄ enyene ndikụt nte ke mbono esop asuana ke ini. (Se  ikpehe ekikere 17 ye  19.) Edieke enye amade, edieke ufan̄ onyụn̄ okponde ekem ke mbot utịn̄ikọ, ẹkeme ndiwụk n̄kpọ utịn̄ikọ en̄wen nnọ enye man nte enye osụk okotde owo ọdọk edi, owo oro ama asasan̄a edisịm okpokoro utịn̄ikọ. Enye onyụn̄ ekeme ndimek nditie ke okpokoro ke mbot utịn̄ikọ n̄kot eyen ufọkn̄wed emi edikotde Bible ye mbon oro ẹnọde n̄kpọ ẹnam ke ikpehe oro ẹkotde Kpep Ndikwọrọ Ikọ Ọfọn. Ndinam ntem idiyakke ẹbiat ini.

25. Edieke ebiowo emi ọfiọkde ndinọ utịn̄ikọ ọfọn odude, ọkpọfọn enye edi udiana ọnọitem. Ke ini mbiowo ye mme asan̄autom unamutom ẹnamde n̄kpọ ke Mbono Esop Uwem ye Utom Nnyịn, ẹnọde utịn̄ikọ ofụri owo, ẹkotde ikpehe m̀mê ẹnịmde Ukpepn̄kpọ Enyọn̄-Ukpeme m̀mê Ukpepn̄kpọ Bible Esop, udiana ọnọitem ọyọnọ mmọ item ke ndịbe edieke enye okụtde ke ọfọn inam ntre. (Se  ikpehe ekikere 19.) Edieke mbiowo emi ẹfiọkde ndinọ utịn̄ikọ ọfọn ẹnyụn̄ ẹfiọkde ndikpep esop n̄kpọ ẹwakde ke esop, otu mbiowo ẹkeme ndimek owo mmọ kiet kiet edi udiana ọnọitem ke isua kiet kiet. Udiana ọnọitem inyeneke ndinọ owo item kpukpru ini emi owo anamde n̄kpọ.

26. Edieke nditọ ufọkn̄wed ẹwakde, ẹkeme ndibahade ndusụk mmọ ndọn̄ ke udiana ubet ukpepn̄kpọ. Ẹkpenyene ndimek owo emi odotde edi ọnọitem ke ubet ukpepn̄kpọ emi, ndien ọkpọfọn enye edi ebiowo. Edi edieke mbiowo mîwakke ikem, ẹkeme ndinọ asan̄autom unamutom oro odotde utom emi. Otu mbiowo ẹdibiere m̀mê anie odot ndidi ọnọitem, n̄ko m̀mê ẹkpedi owo kiet ama anam isua emi, owo en̄wen anam isua en̄wen. Ọnọitem emi ekpenyene nditiene ndausụn̄ oro odude ke ọyọhọ  ikpehe ekikere 18. Edieke esop ẹnyenede udiana ubet ukpepn̄kpọ, ẹkpenyene ndidọhọ nditọ ufọkn̄wed ẹwọrọ ẹka do ke ẹma ẹkekụre Yom N̄kpọuto ke Ikọ Abasi mbemiso ẹtọn̄ọde Edikot Bible. Mmọ ẹkpenyene ndinyọn̄ ndi ke akpatre eyen ufọkn̄wed anamde se ẹkenọde enye ama.

27. Ẹyesibre ndusụk vidio ke mbono esop emi. Ẹdidọn̄ mme vidio emi ke JW Library^®. Ẹkeme ndikama nsio nsio fon, tablet, ye laptop nsion̄o mmọ mbre.

© 2023 Watch Tower Bible and Tract Society of Pennsylvania

S-38-EF 11/23