1 Chronicle 19;1-19
19 Edikem Nahash+ edidem nditọ Ammon akpa, ndien eyen esie ọtọn̄ọ ndikara ke itie esie.+
2 Ntem David ọdọhọ ete: “Ami nyowụt Hanun eyen Nahash ima-mfọnido,+ koro ete esie okowụtde mi ima-mfọnido.”+ Mmọdo David ọdọn̄ mme isụn̄utom ẹka ẹkedọn̄ enye esịt ẹban̄a ete esie, ndien mme asan̄autom David ẹdi isọn̄ nditọ Ammon+ man ẹdidọn̄ Hanun esịt.
3 Edi mbọn̄ nditọ Ammon ẹdọhọ Hanun ẹte: “Ndi ese ete David okpokpono ete fo ke enye ndidọn̄ mbon ndọn̄esịt ẹdi ke ọtọ fo? Nte idịghe man mmọ ẹtịm ẹdụn̄ọde ẹnyụn̄ ẹyep+ ẹnyụn̄ ẹkan obio emi, esịn mme asan̄autom esie ẹdi ke ọtọ fo?”+
4 Ntre Hanun omụm mme asan̄autom David+ akwat mmọ+ idet onyụn̄ esịbe mmọ ọfọn̄idem ke mbombom+ ndien ọnọ mmọ ẹnyọn̄ọ.+
5 Ekem mme owo ẹkesian David ẹban̄a iren emi; ndien enye ọsọsọp ọdọn̄ ẹkesobo ye mmọ, koro ẹkesuenede mmọ ata etieti; ndien edidem ọdọhọ ete: “Mbufo ẹdụn̄ ke Jericho+ tutu ntan̄ebek mbufo ọkọri okpon. Ekem mbufo ẹnyọn̄ ẹdi.”
6 Ekem nditọ Ammon ẹkụt ke mmimọ imakabade idi n̄kpọ itekesịt+ inọ David, ndien Hanun+ ye nditọ Ammon ẹnọ talent+ silver tọsịn kiet ndida n̄kpe mme chariot+ ye mme awat enan̄-mbakara nnọ idemmọ ke Mesopotamia ye ke Aram-maacah+ ye ke Zobah.+
7 Ntre ke mmọ ẹkpe chariot+ tọsịn edịp ye duopeba ye edidem Maacah ye ikọt esie ẹnọ idemmọ.+ Ndien mmọ ẹdụk ẹdinam nna ke Medeba;+ ndien nditọ Ammon ẹsop idem ọtọkiet ẹwọrọ ke obio ẹdi ndin̄wana ekọn̄.
8 Ke ini David okopde n̄kpọ emi, enye ọsọsọp osio Joab+ ye ofụri udịmekọn̄ esie ye n̄kpọsọn̄ owo+ esie ọdọn̄.
9 Ndien nditọ Ammon ẹwọn̄ọ ẹka ẹketịm idem ẹnọ ekọn̄ ke inuaotop obio, edi ndidem+ emi ẹkedide ẹdu ekemmọ ke an̄wa ẹtịm idem ẹnọ ekọn̄.
10 Ke ini Joab okụtde ke ẹbụmede ẹdi ndin̄wana ekọn̄ ye imọ iso ye edem, enye ọsọsọp emek ndusụk ke otu nti irenowo ke Israel onyụn̄ etịm mmọ ndikosobo ye mbon Syria.+
11 Ndien enye ayak mbon oro ẹsụhọde esịn ke ubọk Abishai+ eyeneka esie, man mmọ ẹtịm idem ẹka ẹkesobo ye nditọ Ammon.+
12 Ndien enye ọdọhọ ete: “Edieke mbon Syria+ ẹsọn̄de ubọk ẹkan mi, afo eyedi edinyan̄a mi;+ edi edieke nditọ Ammon ẹsọn̄de ubọk ẹkan fi, ami nyedi ndinyan̄a fi.+
13 Kop odudu,+ man nnyịn idi uko inọ ikọt nnyịn inyụn̄ idi inọ mme obio Abasi nnyịn;+ ndien Jehovah ayanam se ifọnde enye ke enyịn.”+
14 Ekem Joab ye mbon oro ẹdude ye enye ẹwọrọ ẹken̄wana ye mbon Syria,+ ndien mmọ ẹfen̄e+ ke iso esie.
15 Ndien ke ini nditọ Ammon ẹkụtde ke mbon Syria ẹfen̄e, mmọ n̄ko ẹfen̄e+ ke iso Abishai eyeneka esie ẹnyọn̄ọ ẹkesịm obio.+ Ekem Joab ọnyọn̄ edi Jerusalem.
16 Ke ini mbon Syria ẹkụtde ẹte ke Israel ẹkan mmimọ,+ mmọ ẹdọn̄ mme isụn̄utom ẹkeda mbon Syria oro ẹdude ke edem Akpa*+ oko ẹdi, ndien Shophach etubom udịmekọn̄ Hadadezer ebem mmọ iso.
17 Ke ini ẹtịn̄de n̄kpọ emi ẹnọ David, enye ọsọsọp obon ofụri Israel ọtọkiet, ndien ebe Jordan edisịm mmọ, onyụn̄ etịm udịmekọn̄ ndin̄wana ye mmọ.+ Ke ini David etịmde udịmekọn̄ aka okosobo ye mbon Syria, mmọ ẹtọn̄ọ ndin̄wana ye enye.
18 Edi mbon Syria ẹfen̄e+ ke ntak Israel; ndien David owot mme awat chariot mbon Syria tọsịn itiaba ye owo tọsịn aba emi ẹsan̄ade ke ukot, enye onyụn̄ owot Shophach etubom udịmekọn̄.+
19 Ke ini mme asan̄autom Hadadezer ẹkụtde ke Israel ẹkan mmimọ,+ mmọ ẹsọsọp ẹnam emem ye David ẹnyụn̄ ẹnam n̄kpọ ẹnọ enye;+ Syria inyụn̄ idomoke aba nditọn̄ọ ntak nnyan̄a nditọ Ammon.+
Mme Ikọ Idakisọn̄
^ Oro edi, “Euphrates.”
