1 Chronicle 23;1-32
23 Ndien David ọsọn̄+ onyụn̄ oyụhọ usen, ntre enye enịm Solomon+ eyen esie ke edidem Israel.
2 Ndien enye okot kpukpru mbọn̄+ Israel ye mme oku+ ye nditọ Levi+ obon ọtọkiet.
3 Ntem ẹbat nditọ Levi ọtọn̄ọde ke owo isua edịp ye duop dọk;+ ndien ibat mme okopidem irenowo, owo mmọ kiet kiet,* ekedi owo tọsịn edịp ye efịteta.
4 Ndien mbon emi ẹkenamde n̄kpọ nte mme eseutom ke ufọk Jehovah ke otu mmọ emi ẹkedi owo tọsịn edịp ye inan̄; ndien owo tọsịn itiokiet ẹnam n̄kpọ nte ikpọ owo+ ye mme ebiereikpe;+
5 ndien owo tọsịn inan̄ ẹdi mme ekpeme-inuaotop,+ owo tọsịn inan̄ ẹnyụn̄ ẹdi mme andinọ Jehovah itoro+ ke mme n̄kpọmbre+ emi David ọkọdọhọde, “Ami n̄kanam man ẹda ẹnọ itoro.”
6 Ekem David abahade mmọ ọdọn̄ ke otu+ nditọ Levi,+ oro edi, Gershon, Kohath ye Merari.
7 Nditọ Gershon ẹkedi Ladan ye Shimei.
8 Nditọ Ladan ẹkedi Jehiel+ kpa etubom ye Zetham ye Joel,+ owo ita.
9 Nditọ Shimei ẹkedi Shelomoth ye Haziel ye Haran, owo ita. Mmọ emi ẹkedi mme etubom mme ete Ladan.
10 Ndien nditọ Shimei ẹkedi Jahath, Zina ye Jeush ye Beriah. Owo mbinan̄ emi ẹkedi nditọ Shimei.
11 Ndien Jahath edi etubom, Zizah onyụn̄ edi udiana. Amaedi Jeush ye Beriah, mmọ ikenyeneke ediwak nditọ; ntre mmọ ẹkabade ẹdi ufọk mme ete+ ẹnọ otu kiet emi ẹkamade utom.
12 Nditọ Kohath+ ẹkedi Amram, Izhar,+ Hebron+ ye Uzziel,+ owo inan̄.
13 Nditọ Amram ẹkedi Aaron+ ye Moses.+ Edi ẹma ẹdian̄ade+ Aaron ye nditọ esie iren ẹnịm, man mmọ ẹnam Ata Edisana+ ikpehe asana ke nsinsi, ndinam nsụn̄ikan̄ uwa+ ọwọrọ ọdọk ke iso Jehovah, ẹsan̄a utom ẹnọ enye+ ẹnyụn̄ ẹda enyịn̄ esie ẹdiọn̄+ mme owo ke nsinsi.
14 Amaedi Moses owo ata Abasi,+ ẹkebat nditọ esie ẹsịn ke esien Levi.+
15 Nditọ Moses ẹkedi Gershom+ ye Eliezer.+
16 Nditọ Gershom ẹnyụn̄ ẹdi Shebuel+ kpa etubom.
17 Ndien nditọ Eliezer ẹkedi Rehabiah+ etubom; ndien Eliezer ikenyeneke nditọ en̄wen, edi nditọ Rehabiah ẹma ẹwak etieti.
18 Nditọ Izhar+ ẹkedi Shelomith+ kpa etubom.
19 Ndien nditọ Hebron ẹkedi Jeriah etubom, Amariah ọyọhọ iba, Jahaziel ọyọhọ ita ye Jekameam+ ọyọhọ inan̄.
20 Nditọ Uzziel+ ẹkedi Micah etubom ye Isshiah ọyọhọ iba.
21 Nditọ Merari+ ẹkedi Mahli ye Mushi.+ Nditọ Mahli ẹnyụn̄ ẹdi Eleazar+ ye Kish.
22 Edi Eleazar akpa; ndien enye ikenyeneke nditọiren edi ekenyene nditọiban. Ntre nditọ Kish kpa nditọete mmọ ẹtan̄ mmọ ẹdọ.+
23 Nditọ Mushi ẹkedi Mahli ye Eder ye Jeremoth,+ owo ita.
24 Mmọ emi ẹkedi nditọ Levi nte ufọk mme ete mmọ edide,+ mme etubom mme ete mmọ, mbon emi ẹmekde, ke ibat enyịn̄ mmọ, owo kiet kiet, kpa mme anamutom emi ẹnamde utom+ ke ufọk Jehovah, ọtọn̄ọde ke owo isua edịp dọk.+
25 Koro David ọkọdọhọde ete: “Jehovah Abasi Israel ọmọnọ ikọt esie nduọkodudu,+ ndien enye oyodụn̄ ke Jerusalem ke nsinsi.+
26 Ndien n̄ko nditọ Levi idinyeneke ndibiom tent utuakibuot m̀mê mme n̄kpoduoho esie ekededi ndida nnam utom esie.”+
27 Koro ke mme akpatre ikọ+ David, mmọ emi ẹdi ibat nditọ Levi ọtọn̄ọde ke owo isua edịp dọk.
28 Koro utom mmọ ekedi ndin̄wam nditọ Aaron+ ndinam utom ke ufọk Jehovah ke okụre+ ye ke mme ubet udia+ nnyụn̄ nnam kpukpru ndisana n̄kpọ+ ẹsana nnyụn̄ nnam utom emi anade ẹnam ke ufọk ata Abasi,
29 ọkọrọ ye ndise mban̄a uyo emi ẹtan̄de-tan̄ ẹkọk+ ye eti ndomuyo+ emi ẹdade ẹwa uwa n̄kpasịp ye enye emi ẹdade ẹnam mfefere uyo+ eke leaven mîdụhe+ ye uyo emi ẹsan̄de ke akpan̄kpan̄+ ye ndomuyo emi ẹbuakde+ nnyụn̄ nse mban̄a kpukpru n̄kpọ eke ẹdomode ye idaha mmọ;+
30 ye ke ndidada+ kpukpru usenubọk+ n̄kọm+ nnyụn̄ ntoro+ Jehovah, nnyụn̄ nnam kpasụk ntre ke mbubreyo;
31 ye ke ndin̄wam ẹfọp kpukpru edifọp uwa ẹnọ Jehovah ke mme sabbath,+ ke mbufa ọfiọn̄+ ye ke mme ini usọrọ,+ ke ibat mmọ nte ibet mmọ ẹdide, kpukpru ini ke iso Jehovah.
32 Ndien mmọ ẹkpeme+ tent usopidem ye edisana ebiet+ ẹnyụn̄ ẹkpeme nditọ Aaron kpa nditọete mmọ ke utom emi mmọ ẹnamde ke ufọk Jehovah.+
Mme Ikọ Idakisọn̄
^ At. Ed., “ke ibuot ke ibuot.”
