1 Corinth 15;1-58
15 Nditọete, nnam mbufo ẹfiọk eti mbụk+ emi ami n̄kọkwọrọde nnọ mbufo,+ emi mbufo n̄ko ẹkebọde, ẹkenyụn̄ ẹsọn̄ọde ẹda ke esịt,+
2 emi n̄ko ẹdade ẹnyan̄a+ mbufo, oto ke ikọ emi ami n̄kadade ntan̄a eti mbụk nnọ mbufo, edieke mbufo ẹsọn̄ọde ẹmụm enye ẹkama, ibọhọke mbufo ẹkekabade ẹdi mme andinịm ke akpanikọ ke ikpîkpu.+
3 Ke akpa itie, mma nyak se n̄konyụn̄ mbọde+ nnọ mbufo, nte ke Christ ama akpa kaban̄a mme idiọkn̄kpọ nnyịn nte N̄wed Abasi ọdọhọde;+
4 nte ke ẹma ẹbụk enye,+ ye nte ke ẹma ẹnam enye eset+ ke ọyọhọ usen ita+ nte N̄wed Abasi ọdọhọde;+
5 ye nte ke enye ama owụt Cephas idem,+ ekem owụt mbet duopeba.+
6 Ke oro ebede enye owụt nditọete emi ẹwakde ẹbe owo ikie ition idem ini kiet, emi ata ediwak ẹsụk ẹdude tutu esịm emi,+ edi ndusụk mmọ ẹma ẹde ke n̄kpa.
7 Ke oro ebede enye owụt James+ idem, ekem owụt kpukpru mme apostle;+
8 edi ke akpatre enye owụt mi n̄ko idem+ nte n̄kpọ eke owụtde eyen emi amanade ke ini mîkemke.
9 Koro ami n̄kpri n̄kan+ ke otu mme apostle, nnyụn̄ ndotke se ẹkotde apostle, koro mma n̄kọbọ+ esop Abasi.
10 Edi oto ke mfọnido Abasi oro owo mîdotke+ ke ami ndi se ndide emi. Ndien mfọnido esie oro owo mîdotke emi ẹwụtde mi ikedịghe ke ikpîkpu,+ edi mma nnam utom n̄kan kpukpru mmọ,+ idịghe ami edi edi mfọnido Abasi oro owo mîdotke emi odude ye ami.+
11 Nte ededi, edide ami m̀mê edide mmọ, ntre ke nnyịn ikwọrọ, ntre n̄ko ke mbufo ẹnyụn̄ ẹnịm ke akpanikọ.+
12 Edi edieke ẹkwọrọde ẹte ke ẹma ẹnam Christ eset ke n̄kpa,+ ndusụk owo ke otu mbufo ẹsan̄a didie ẹdọhọ ke ediset mme akpan̄kpa idụhe?+
13 Ke akpanikọ, edieke ediset mme akpan̄kpa mîdụhe, owo ikonyụn̄ inamke Christ eset.+
14 Ndien edieke owo mîkanamke Christ eset, ukwọrọikọ nnyịn ọwọrọ ikpîkpu, mbuọtidem nnyịn onyụn̄ ọwọrọ ikpîkpu.+
15 Akan oro, ẹkụt ke nnyịn n̄ko idi mme ntiense nsu inọ Abasi,+ koro nnyịn itiede ntiense+ inọ Abasi ite enye ama anam Christ eset,+ edi emi enye mîkanamke eset edieke owo mîdinamke mme akpan̄kpa ẹset.+
16 Koro edieke owo mîdinamke mme akpan̄kpa ẹset, owo ikonyụn̄ inamke Christ eset.
17 N̄ko-n̄ko, edieke owo mîkanamke Christ eset, mbuọtidem mbufo inyeneke ufọn; mbufo ẹsụk ẹdodu ke idiọkn̄kpọ mbufo.+
18 N̄ko, ke akpanikọ, mmọ oro ẹkedede ke n̄kpa emi ẹbuanade n̄kpọ+ ye Christ ẹma ẹtak.+
19 Edieke edide ke uwem emi kpọt ke nnyịn idori enyịn ke Christ,+ nnyịn imenyene mbọm ikan kpukpru owo.
20 Edi, ẹma ẹnam Christ eset ke n̄kpa,+ nte akpa mbun̄wụm+ ke otu mbon oro ẹdede ke n̄kpa.+
21 Koro kpa nte n̄kpa+ otode owo, ediset+ mme akpan̄kpa oto owo n̄ko.
22 Koro kpa nte otode ke Adam kpukpru owo ẹkpan̄a,+ kpasụk ntre ke Christ ẹyenam kpukpru owo ẹdu uwem.+
23 Edi owo kiet kiet ke idaha esie: Christ akpa mbun̄wụm,+ ekem mmọ eke ẹdide eke Christ ke ini edidu esie.+
24 Ekem, utịt edi, emi enye ayakde obio ubọn̄ ọnọ Abasi ye Ete esie, ke enye ama akanam kpukpru ukara ye kpukpru unen edikara ye odudu ẹkabade ẹdi ikpîkpu.+
25 Koro ana enye akara nte edidem tutu Abasi ada kpukpru mme asua esie esịn enye ke idak ikpat.+
26 Ẹyesobo+ n̄kpa ẹfep nte akpatre asua.
27 Koro Abasi “akada kpukpru n̄kpọ esịn enye ke idak ikpat.”+ Edi ke ini enye ọdọhọde ete, ‘ẹkeda kpukpru n̄kpọ ẹsịn enye ke idak,’+ ana in̄wan̄-in̄wan̄ nte ke emi isịneke enye emi akadade kpukpru n̄kpọ esịn enye ke idak.+
28 Edi ke ẹma ẹkeyak kpukpru n̄kpọ ẹsịn enye ke idak,+ adan̄aoro Eyen n̄ko oyosụk idem ọnọ Enye+ emi akadade kpukpru n̄kpọ esịn enye ke idak, man Abasi ekpedi kpukpru n̄kpọ ọnọ kpukpru owo.+
29 Mîdịghe ntre, nso ke mmọ eke ẹnade baptism kaban̄a uduak edidi mme akpan̄kpa ẹdinam?+ Edieke owo mîdinamke+ mme akpan̄kpa ẹset, ntak emi ẹnịmde mmọ baptism+ kaban̄a utọ uduak oro?
30 Ntak emi nnyịn n̄ko idude ke afanikọn̄ kpukpru ini?+
31 Mmosobo n̄kpa iso ye iso ke usen ke usen.+ Nditọete, nda idatesịt+ oro nnyenede mban̄a mbufo, emi ami nnyenede ke Christ Jesus Ọbọn̄ nnyịn, nsọn̄ọ emi.
32 Edieke n̄kan̄wanade ye ndiọi unam ke Ephesus+ nte mbon efen ẹken̄wanade, oro ọfọn mi nso? Edieke owo mîdinamke mme akpan̄kpa ẹset, “ẹyak nnyịn idia inyụn̄ in̄wọn̄, koro nnyịn iyakpa n̄kpọn̄.”+
33 Ẹkûyak ẹtụn mbufo usụn̄. Idiọk nsan̄a ababiat eti ido.+
34 Ẹdemede+ ẹnyụn̄ ẹnam se inende, ẹkûnyụn̄ ẹka iso ẹnam idiọkn̄kpọ, koro ndusụk owo inyeneke ifiọk Abasi.+ Ntịn̄ emi man bụt anam mbufo.+
35 Edi, owo ọyọdọhọ ete: “Didie ke ẹdinam mme akpan̄kpa ẹset? Ih, nso orụk idem ke mmọ ẹdida ẹwọn̄ọ ẹdi?”+
36 Afo anana-ibuot owo! Owo inamke se afo ọtọde odu uwem ibọhọke enye ebem iso akpa;+
37 ndien amaedi se afo ọtọde, afo utọhọ idem oro editịbede ọwọrọ, edi sụk n̄kpasịp kiet,+ edide wheat m̀mê n̄kpọ en̄wen;
38 edi Abasi ọnọ enye idem+ kpa nte enemde enye esịt,+ onyụn̄ ọnọ n̄kpasịp kiet kiet idem.
39 Idịghe kpukpru idem edi ukem, idem eke owo odu, idem eke enan̄ onyụn̄ odu, idem eke inuen onyụn̄ odu, eke iyak onyụn̄ odu.+
40 Idem eke heaven+ ye idem eke isọn̄+ ẹnyụn̄ ẹdu; edi ubọn̄+ idem eke heaven edi orụk ubọn̄ kiet, ndien eke isọn̄ edi orụk efen.
41 Ubọn̄ utịn+ edi orụk kiet, ubọn̄ ọfiọn̄+ onyụn̄ edi efen, ndien ubọn̄ ntantaọfiọn̄+ edi efen; ke akpanikọ, ntantaọfiọn̄ kiet okpụhọde ye ntantaọfiọn̄ efen ke ubọn̄.
42 Kpasụk ntre ke edi ye ediset mme akpan̄kpa.+ Ẹtọ ke mbiara, ẹnam eset nte se mîkemeke ndibiara.+
43 Ẹtọ ke esuene,+ ẹnam eset ke ubọn̄.+ Ẹtọ ke mmemidem,+ ẹnam eset ke odudu.+
44 Ẹtọ ke idem eke obụk,+ ẹnam eset ke idem eke spirit.+ Edieke idem eke obụk odude, idem eke spirit odu n̄ko.
45 Ẹkam ẹwet ntem ẹte: “Akpa owo oro Adam akakabade edi ukpọn̄ eke odude uwem.”+ Akpatre Adam akabade edi spirit+ eke ọnọde uwem.+
46 Edi, idịghe idem eke spirit edi akpa, edi edi idem eke obụk, ndien ekem idem eke spirit.+
47 Akpa owo oto isọn̄, ẹkenyụn̄ ẹda ntan+ ẹnam enye; ọyọhọ owo iba oto heaven.+
48 Kpa nte enye emi ẹkedade ntan+ ẹnam edide, ntre ke mbon oro ẹdade ntan ẹnam ẹdi n̄ko; ndien kpa nte enye emi otode heaven+ edide, kpasụk ntre ke mbon oro ẹdide eke heaven ẹdi n̄ko.+
49 Ndien kpa nte isịnede mbiet+ enye emi ẹkedade ntan ẹnam, nnyịn iyesịne n̄ko mbiet+ enye emi edide eke heaven.
50 Nte ededi, ndọhọ emi, nditọete, nte ke obụk ye iyịp ikemeke ndida obio ubọn̄ Abasi nnyene,+ mbiara inyụn̄ ikemeke ndida se mîkemeke ndibiara nnyene.+
51 Sese! Mmọn̄ nsian mbufo edisana ndịben̄kpọ: Idịghe kpukpru nnyịn idide ke n̄kpa, edi ẹyekpụhọde kpukpru nnyịn,+
52 ke idaha kiet, ke ediyịp enyịn, ke ini ẹfride akpatre obukpon̄. Koro ẹyefri obukpon̄,+ ndien mme akpan̄kpa ẹyeset nte se mîkemeke ndibiara, ndien ẹyekpụhọde nnyịn.
53 Koro ana se ikemede ndibiara esịne se mîkemeke ndibiara,+ ndien ana se ikemede ndikpa+ esịne se mîkemeke ndikpa.
54 Edi ke ini se ikemede ndibiara esịnede se mîkemeke ndibiara, se ikemede ndikpa onyụn̄ esịnede se mîkemeke ndikpa, adan̄aoro ikọ emi ọyọwọrọ osu emi ẹwetde ẹte: “Ẹmen+ n̄kpa ẹmen ke nsinsi.”+
55 “N̄kpa, edikan fo enye? N̄kpa, ifọt fo enye?”+
56 Ifọt+ n̄kpa edi idiọkn̄kpọ, edi odudu idiọkn̄kpọ edi Ibet.+
57 Edi ekọm enyene Abasi, koro enye ọmọnọ nnyịn edikan ebe ke Ọbọn̄ nnyịn Jesus Christ!+
58 Mmọdo, ndima nditọete mi, ẹsọn̄ọ ẹda,+ ẹkûyak n̄kpọ esehede mbufo, ẹnyene ekese ndinam ke utom Ọbọn̄+ kpukpru ini, sia ẹfiọkde ẹte utom mbufo idịghe ikpîkpu+ ke Ọbọn̄.
