1 Ndidem 22;1-53
22 Ndien mmọ ẹdu isua ita, ekọn̄ inyụn̄ idụhe ke ufọt Syria ye Israel.
2 Edikem ke ọyọhọ isua ita Jehoshaphat+ edidem Judah osụhọde okosobo ye edidem Israel.
3 Ndien edidem Israel ọdọhọ mme asan̄autom esie ete: “Nte mbufo ẹmefiọk ke edi nnyịn inyene Ramoth-gilead?+ Edi nnyịn ke imen̄e ndika n̄kosio enye ke ubọk edidem Syria.”
4 Ndien enye obụp Jehoshaphat ete: “Ndi afo eyetiene mi akan̄wana ekọn̄ ke Ramoth-gilead?”+ Ndien Jehoshaphat ọbọrọ edidem Israel ete: “Ami ye afo idi kiet. Ikọt mi ẹnyụn̄ ẹdi ikọt fo.+ Mme enan̄-mbakara mi ẹnyụn̄ ẹdi mme enan̄-mbakara fo.”
5 Edi Jehoshaphat ọdọhọ edidem Israel ete: “Mbọk, bem iso bụp+ uyo Jehovah kan̄a.”
6 Ntre edidem Israel okot mme prọfet obon ọtọkiet,+ n̄kpọ nte irenowo ikie inan̄, onyụn̄ obụp mmọ ete: “Nte n̄ka n̄kan̄wana ekọn̄ ye Ramoth-gilead m̀mê n̄kûka?” Ndien mmọ ẹdọhọ ẹte: “Dọk ka,+ koro Jehovah ayada enye esịn edidem ke ubọk.”
7 Edi Jehoshaphat obụp ete: “Nte prọfet Jehovah idụhe aba mi? Ntre yak nnyịn ibụp enye nan̄a.”+
8 Ntem edidem Israel ọbọrọ Jehoshaphat ete: “Osụk kan̄a owo kiet ndibụp uyo Jehovah;+ edi ami nsasua enye,+ koro enye mîsitịn̄ke eti ntịn̄nnịm ikọ iban̄a mi edi esisụk etịn̄ idiọk+—Micaiah eyen Imlah.” Edi Jehoshaphat ọbọrọ ete: “Yak edidem okûtịn̄ utọ ikọ oro.”+
9 Ntre edidem Israel okot adaidaha+ kiet ke okụre onyụn̄ ọdọhọ ete: “Wara ka kada Micaiah eyen Imlah di.”+
10 Ndien edidem Israel ye Jehoshaphat edidem Judah ẹsịne ọfọn̄ ubọn̄+ ẹtie ke ebekpo mmọ kiet kiet, ke ọtọ udịghi wheat ke nto-ndụk inuaotop Samaria; kpukpru mme prọfet ẹnyụn̄ ẹtịn̄ ntịn̄nnịm ikọ ke iso mmọ.+
11 Ndien Zedekiah eyen Chenaanah anam mme nnụk ukwak ọnọ idemesie onyụn̄ ọdọhọ ete: “Jehovah ọdọhọ ete,+ ‘Emi ke afo edida onụk mbon Syria tutu afo ọsọhi mmọ efep.’”+
12 Kpukpru mme prọfet eken ẹnyụn̄ ẹtịn̄ ukem ntịn̄nnịm ikọ oro, ẹte: “Dọk ka Ramoth-gilead kan̄wana kan; ndien Jehovah ayada enye esịn edidem ke ubọk.”+
13 Ndien isụn̄utom oro akakade ndikot Micaiah ọdọhọ enye ete: “Sese, kpukpru mme prọfet ẹtịn̄ se ifọnde ye uyo kiet ẹnọ edidem. Mbọk, yak ikọ fo etie nte eke owo mmọ kiet, afo nyụn̄ tịn̄ se ifọnde.”+
14 Edi Micaiah ọdọhọ enye ete: “Ma uwem Jehovah,+ se Jehovah edidọhọde mi, kpa oro ke nditịn̄.”+
15 Ekem enye odụk okosobo ye edidem, ndien edidem obụp enye ete: “Micaiah, nte nnyịn idọk ika ekọn̄ ye Ramoth-gilead, m̀mê ikûka?” Ndien enye ọsọsọp ọbọrọ enye ete: “Dọk ka kan̄wana kan; ndien Jehovah ayada enye esịn edidem ke ubọk.”+
16 Ntre edidem obụp enye ete: “Ikafan̄ ke ami n̄wụk fi nte okûtịn̄ baba n̄kpọ kiet ke enyịn̄ Jehovah+ unọ mi ke mîbọhọke se idide akpanikọ?”
17 Ndien enye ọdọhọ enye ete: “Mmokụt kpukpru nditọ Israel ẹsuanade+ ke mme obot nte mme erọn̄ eke mînyeneke andikpeme.+ Ndien Jehovah ọdọhọ ete: ‘Mmọ emi inyeneke mme adausụn̄. Yak mmọ kiet kiet ẹfiak ẹnyọn̄ọ ufọk mmọ ke emem.’”+
18 Ndien edidem Israel ọdọhọ Jehoshaphat ete: “Nte n̄kọdọhọke fi, ‘Enye iditịn̄ke eti ntịn̄nnịm ikọ iban̄a mi edi editịn̄ idiọk’?”+
19 Ndien enye ọdọhọ ete: “Kop se Jehovah ọdọhọde:+ Mmokụt Jehovah etiede ke ebekpo+ esie, ofụri udịm enyọn̄ ẹnyụn̄ ẹda enye ke nnasia ye ke ufien.+
20 Ndien Jehovah obụp ete, ‘Anie edika akabian̄a Ahab, man enye ọdọk akakpa ke Ramoth-gilead?’ Ndien enye emi etịn̄ ntem, ke adan̄aemi enye eken etịn̄de ntem.+
21 Ekem spirit+ kiet ọwọrọ edida ke iso Jehovah onyụn̄ ọdọhọ ete, ‘Ami nyaka n̄kabian̄a enye.’ Ndien Jehovah obụp enye ete, ‘Edisan̄a didie abian̄a enye?’+
22 Ndien enye ọbọrọ ete, ‘Nyọwọrọ n̄kakabade ndi spirit abian̄a ke inua kpukpru mme prọfet esie.’+ Ntre enye ọdọhọ ete, ‘Afo ayabian̄a enye, ndien n̄ko afo ayakan+ enye. Wọrọ ka kanam kpa ntre.’+
23 Ndien, ke emi, sese Jehovah emesịn spirit abian̄a ke inua kpukpru mme prọfet fo emi;+ ndien Jehovah emetịn̄ afanikọn̄ eke edisịmde fi.”+
24 Ndien Zedekiah eyen Chenaanah asan̄a akasiak Micaiah ufia ke mban̄+ onyụn̄ obụp ete: “Spirit Jehovah akasan̄a didie ọkpọn̄ mi ebe editịn̄ ikọ ye afo?”+
25 Ndien Micaiah ọbọrọ ete: “Sese! Afo ọyọfiọk ke usen oro nte akasan̄ade ke ini emi afo edidụkde ata esịt esịt+ ubet ekedịbe.”+
26 Ndien edidem Israel ọdọhọ ete: “Da Micaiah, fiak kayak nọ Amon etubom obio ye Joash eyen edidem.+
27 Ndien dọhọ mmọ ete, ‘Edidem ọdọhọ ntem ete:+ “Mbufo ẹsịn owo emi ke ufọk n̄kọbi-ntem+ ẹnyụn̄ ẹnọ enye esisịt uyo+ ye esisịt mmọn̄ tutu ami nnyọn̄ ndi ke emem.”’”+
28 Ndien Micaiah ọdọhọ ete: “Edieke afo ọnyọn̄de edi ke emem, fiọk ete ke idịghe Jehovah eketịn̄ ikọ ye ami.”+ Enye onyụn̄ adian do ete: “Kpukpru mbufo ẹkop ikọ emi.”+
29 Ndien edidem Israel ye Jehoshaphat edidem Judah ẹdọk ẹka Ramoth-gilead.+
30 Ekem edidem Israel ọdọhọ Jehoshaphat ete: “Ami mmọn̄ n̄kpụhọ idem nnam nte ndi owo efen ndien ndụk ekọn̄,+ edi afo sịne ọfọn̄ ubọn̄ fo.”+ Ntem edidem Israel okpụhọ idem+ anam nte idi owo efen onyụn̄ odụk ekọn̄.+
31 Edi edidem Syria ama ọnọ mme etubom+ mme chariot esie owo edịp ye duopeba uyo ete: “Mbufo ẹkûn̄wana ye n̄kpri m̀mê ye ikpọ, edi ẹn̄wana ye edidem Israel kpọt.”+
32 Edikem ke ndondo oro mme etubom mme chariot ẹkụtde Jehoshaphat, mmọ ẹkere ke esịt mmọ ẹte: “Ke akpanikọ edidem Israel edi emi.”+ Ntre mmọ ẹwọn̄ọde ẹda ndin̄wana ye enye; ndien Jehoshaphat ofiori oyom un̄wam.+
33 Ndien ke ndondo oro mme etubom mme chariot ẹkụtde ke idịghe edidem Israel edi oro, mmọ ẹfiak edem inikiet inikiet ẹtre ndibịne enye.+
34 Ndien owo kiet otop utịgha esie, edi ikohokoi, ndien enye atịgha edidem Israel ke ọtọ isobo kod ukwak esie, ndien enye ọdọhọ andiwat chariot esie ete:+ “Wọn̄ọde ubọk, men mi wọrọ ke otu mbonekọn̄, koro mmada unan idiọk idiọk.”
35 Ndien ekọn̄ ọdọdiọn̄ ọsọn̄ ke usen oro, ẹnyụn̄ ẹnam edidem adada ke chariot asak iso ese mbon Syria, ndien etisịm mbubreyo enye akpa;+ iyịp onyụn̄ ọwọrọ ke nde unan oro ọduọhọ ke esịt chariot ekọn̄.+
36 Ekem ke ini utịn osopde, ẹkop ọkpọsọn̄ mfiori ke itienna, ẹte: “Mbufo kpukpru ẹnyọn̄ọ obio mbufo ye isọn̄ mbufo!”+
37 Ntre ke edidem akakpa. Ndien ẹmen enye ẹdisịm Samaria, ndien mmọ ẹbụk enye ke Samaria.+
38 Ekem mmọ ẹyet chariot ekọn̄ oro ke n̄kpọdiọhọ mmọn̄ Samaria, mme ebua ẹnyụn̄ ẹdi ẹdidei iyịp+ esie, (ndien mme akpara ẹdi ẹdiyere mmọn̄ do), kpa nte uyo Jehovah ọkọdọhọde.+
39 Amaedi mme n̄kpọ en̄wen emi ẹban̄ade Ahab ye kpukpru se enye akanamde ye ufọk nnụkenen+ oro enye ọkọbọpde ye kpukpru obio oro enye ọkọbọpde, nte owo iwetke mmọ isịn ke n̄wed+ n̄kpọntịbe eyo ndidem Israel?
40 Ekem Ahab osụhọde ana ye mme ete ete+ esie; ndien Ahaziah+ eyen esie akara ke itie esie.
41 Amaedi Jehoshaphat+ eyen Asa, enye akakabade edi edidem Judah ke ọyọhọ isua inan̄ emi Ahab akakarade nte edidem Israel.
42 Jehoshaphat ekedi isua edịp ye efịt ke ini enye ọtọn̄ọde ndikara, enye onyụn̄ akara ke Jerusalem ke isua edịp ye ition; ndien ẹka esie ekekere Azubah eyen Shilhi.
43 Ndien enye asan̄a ke ofụri usụn̄ emi Asa ete esie akasan̄ade. Enye inyụn̄ iwọn̄ọkede ikpọn̄ enye, edi anam se inende ke enyịn Jehovah.+ N̄kukụre edi nte ke mme edikon̄ ebiet ẹkesụk ẹdodu. Ndien mme owo ke ẹkesụk ẹwa uwa ẹnyụn̄ ẹnam nsụn̄ikan̄ uwa ọwọrọ ọdọk ke mme edikon̄ ebiet.+
44 Jehoshaphat onyụn̄ odu ke emem ye edidem Israel.+
45 Amaedi mme n̄kpọ en̄wen emi ẹban̄ade Jehoshaphat ye n̄kpọsọn̄ utom emi enye akanamde ye nte enye akan̄wanade ekọn̄, nte owo iwetke mmọ isịn ke n̄wed+ n̄kpọntịbe eyo ndidem Judah?
46 Ndien enye ọkpọri iren akpara temple+ oro ẹkesụhọde ke eyo Asa ete esie efep ke isọn̄+ oro.
47 Edidem ikonyụn̄ idụhe ke Edom;+ adaidaha ekedi edidem.+
48 Jehoshaphat ama anam mme nsụn̄ikan̄ Tarshish+ ọnọ idemesie man ẹka Ophir ẹkeda gold ẹdi; edi mmọ ikakaha, koro mme nsụn̄ikan̄ oro ẹkewụrede ke Ezion-geber.+
49 Adan̄aoro ke Ahaziah eyen Ahab ọkọdọhọ Jehoshaphat ete: “Yak mme asan̄autom mi ẹsan̄a ye mme asan̄autom fo ke mme nsụn̄ikan̄ oro,” edi Jehoshaphat ikenyịmeke.+
50 Ke akpatre Jehoshaphat osụhọde ana ye mme ete ete+ esie, ẹnyụn̄ ẹbụk enye ye mme ete ete esie ke Obio David+ ete ete esie; ndien Jehoram+ eyen esie akara ke itie esie.
51 Amaedi Ahaziah+ eyen Ahab, enye akakabade edi edidem Israel ke Samaria ke ọyọhọ isua efịteba emi Jehoshaphat akarade nte edidem ke Judah, ndien enye akakara Israel ke isua iba.
52 Ndien enye anam se idiọkde+ ke enyịn Jehovah onyụn̄ asan̄a ke usụn̄ ete+ esie ye ke usụn̄ eka+ esie ye ke usụn̄ Jeroboam+ eyen Nebat, emi ekesịnde Israel ẹnam idiọkn̄kpọ.+
53 Ndien enye aka iso anam n̄kpọ Baal+ onyụn̄ onụhọ ọnọ enye, onyụn̄ ayat+ Jehovah Abasi Israel esịt ukem nte kpukpru se ete esie akanamde.
