1 Peter 4;1-19
4 Mmọdo sia Christ ama okokụt ukụt ke obụkidem,+ mbufo n̄ko ẹnyene ukem edu ukere n̄kpọ oro;+ koro owo emi okụtde ukụt ke obụkidem etre ndinam idiọkn̄kpọ,+
2 man enye okûda aba ini emi osụhọde ọnọ enye ke obụkidem+ odu uwem ndinam se idọn̄de owo, edi anam uduak Abasi.+
3 Koro ini+ emi ekebede ama ekem mbufo ndida nnam se idide uduak mme idụt,+ ini emi mbufo ẹkesan̄ade ke obukpo ido,+ ye ọkpọsọn̄ idiọk udọn̄, ye ediyụhọ mmịn,+ ye uyom uyom usọrọ, ye mbuba edin̄wọn̄ mmịn, ye obukpo edikpono ndem.+
4 Sia mbufo mîsan̄ake aba ye mmọ ke usụn̄ emi idụk ukem okpụk etịme etịme uwem oro,+ idem akpa mmọ, mmọ ẹnyụn̄ ẹka iso ẹsụn̄i mbufo.+
5 Edi mmọ ẹyenam ibat ẹnọ enye+ emi eben̄ede idem ndikpe ikpe nnọ mme odu-uwem ye mme akpan̄kpa.+
6 Koro ẹketan̄a eti mbụk n̄ko ẹnọ mme akpan̄kpa+ kaban̄a uduak emi, man ẹkpekpe ikpe mmọ nte mbon emi ẹdude ke obụkidem ke ekikere owo,+ edi ẹkpedu uwem ke spirit+ ke ekikere Abasi.
7 Edi utịt kpukpru n̄kpọ amasan̄a ekpere.+ Mmọdo, ẹnyene eti ibuot+ ẹnyụn̄ ẹtịn̄ enyịn ẹkpeme man ẹkeme ndibọn̄ akam.+
8 Akan kpukpru n̄kpọ, ẹnyene ufiop ufiop ima ẹnọ kiet eken,+ koro ima ofụkde ekese idiọkn̄kpọ.+
9 Ẹma ndikama kiet eken esen ẹkûnyụn̄ ẹnam emi ye n̄kụni.+
10 Adan̄a nte mbufo owo kiet kiet ẹbọde enọ, ẹda emi ẹnam n̄kpọ ẹnọ kiet eken nte nti mme akama-ukpọhọde mfọnido Abasi eke owo mîdotke emi ẹwụtde ke nsio nsio usụn̄.+
11 Edieke owo ekededi etịn̄de ikọ, yak enye etịn̄ nte etịn̄ edisana ikọ+ Abasi; edieke owo ekededi asan̄ade utom,+ yak enye asan̄a nte eberi edem ke ukeme emi Abasi ọnọde;+ man ẹkpenọ Abasi ubọn̄+ ke kpukpru n̄kpọ ebe ke Jesus Christ. Ubọn̄+ ye odudu ẹnyene enye ke nsinsi nsinsi. Amen.
12 Ndima, ẹkûyak idem akpa mbufo aban̄a ikan̄-ikan̄ nnanenyịn emi odude ke otu mbufo, emi esịmde mbufo man odomo mbufo,+ nte n̄kpọ eke edide esen n̄kpọ ọwọrọ mbufo.
13 Utu ke oro, ẹka iso ẹdat esịt+ adan̄a nte mbufo ẹdide mme andibuana ke ukụt Christ,+ man mbufo ẹkpedara ẹnyụn̄ ẹkop akwa idatesịt n̄ko ke ini emi ẹdiyararede+ ubọn̄ esie.
14 Edieke ẹsuenede mbufo ke ntak enyịn̄ Christ,+ mbufo ẹkop inemesịt,+ koro spirit ubọn̄, kpa spirit Abasi, omodoro mbufo ke idem.+
15 Nte ededi, yak owo mbufo ekededi okûkụt ukụt+ nte owotowo m̀mê inọ m̀mê anamidiọk m̀mê andinọhọ+ ke mbubehe mbon en̄wen.
16 Edi edieke enye okụtde ukụt+ nte Christian, yak enye okûkop bụt,+ edi yak enye aka iso ọnọ Abasi ubọn̄ ke enyịn̄ emi.
17 Koro ekem ini nte ikpe editọn̄ọde ke ufọk Abasi.+ Edi edieke enye ebemde iso ọtọn̄ọ ye nnyịn,+ nso ididi utịt mbon emi mîsụkke ibuot inọ eti mbụk Abasi?+
18 “Ndien edieke edide ọkpọsọn̄ n̄kpọ edinen owo ndibọhọ,+ nso idiwọrọ owo eke mîten̄eke Abasi ye anamidiọk?”+
19 Ntre, ndien, ẹyak mbon oro ẹkụtde ukụt ke ndinam uduak Abasi ẹka iso ẹyak ukpọn̄ mmọ ẹsịn anam-akpanikọ Andibot ke ubọk ke adan̄aemi mmọ ẹnamde se ifọnde.+
