1 Samuel 11;1-15
11 Ndien Nahash eyen Ammon+ ọdọk akanam nnaekọn̄ ke Jabesh+ ke Gilead. Ndien kpukpru mbon Jabesh ẹdọhọ Nahash ẹte: “Nam ediomi ye nnyịn man nnyịn inam n̄kpọ inọ fi.”+
2 Edi Nahash eyen Ammon ọdọhọ mmọ ete: “Ami ndinam ediomi ye mbufo n̄kukụre edieke nditịbide+ mbufo owo kiet kiet enyịn nnasia, nnyụn̄ nnịm emi nte n̄kpọ esuene ke ofụri Israel.”+
3 Ntem mbiowo Jabesh ẹdọhọ enye ẹte: “Nọ nnyịn usen itiaba, ndien nnyịn iyọdọn̄ mme isụn̄utom ẹka ke kpukpru obio Israel, ndien edieke owo mîdụhe ndinyan̄a+ nnyịn, nnyịn iyọwọrọ itiene fi.”
4 Ekem mme isụn̄utom ẹdi Gibeah+ kpa obio Saul ẹnyụn̄ ẹditịn̄ ikọ emi ẹnọ kpukpru owo, ndien mmọ ẹmenede uyo ẹtua eyet.+
5 Edi, sese Saul mi otode in̄wan̄ asan̄a ye ufene ọnyọn̄ edi, ndien enye obụp ete: “Nso itịbe emi mme owo ẹtuade eyet?” Ndien mmọ ẹmen ikọ nditọ Jabesh ẹtịn̄ ẹnọ enye.
6 Ndien spirit+ Abasi odoro Saul ke idem ke ini enye okopde ikọ emi, enye onyụn̄ ayat esịt etieti.+
7 Ntre enye omụm nyara enan̄ iba, okpok mmọ mbai mbai onyụn̄ ọnọ mme isụn̄utom ẹda ẹsọk kpukpru obio Israel,+ ete: “Owo ekededi ke otu nnyịn eke mîdiwọrọke itiene Saul ye Samuel, ntem ke ẹdinam ye enan̄ esie!”+ Ndien ndịk+ Jehovah+ odoro kpukpru owo ke idem tutu mmọ ẹwọrọ ẹdi nte owo kiet.+
8 Ekem enye abat+ kpukpru owo ke Bezek, ndien nditọ Israel ẹsịm owo tọsịn ikie ita, nditọ Judah ẹnyụn̄ ẹdi owo tọsịn edịp ye duop.
9 Ndien mmọ ẹdọhọ mme isụn̄utom emi ẹkedide ẹte: “Ntem ke mbufo ẹdidọhọ mbon Jabesh ke Gilead, ‘Edinyan̄a eyesịm mbufo n̄kpọn̄ ke ini eyo ofiopde.’”+ Ekem mme isụn̄utom oro ẹditịn̄ ẹnọ mbon Jabesh, ndien mmọ ẹdat esịt.
10 Ndien mbon Jabesh ẹdọhọ ẹte: “N̄kpọn̄ nnyịn iyọwọrọ itiene mbufo, mbufo ẹnyụn̄ ẹnam ye nnyịn nte ọfọnde mbufo ke enyịn.”+
11 Edikem ke ndan̄nsiere, Saul+ abahade kpukpru owo esịn ke udịm ita;+ ndien mmọ ẹsan̄a ẹdụk ke ufọt itienna ke ini ukpeme usenubọk+ ẹnyụn̄ ẹwot mbon Ammon+ tutu esịm ata uwemeyo. Edikem mmọ ẹsuan ndusụk owo emi ẹkeyọhọde ẹsụhọ, tutu owo iba idụhe itie kiet.+
12 Ndien mmọ ẹbụp Samuel ẹte: “Anie ọdọhọ, ‘Saul okûdi edidem nnyịn?’+ Mbufo ẹsion̄o mmọ ẹdi nnyịn iwot mmọ.”+
13 Edi, Saul ọdọhọ ete: “Ẹkûwot baba owo kiet mfịn emi,+ koro Jehovah amanam edinyan̄a esịm Israel mfịn.”+
14 Ekem Samuel ọdọhọ kpukpru owo ete: “Mbufo ẹdi nnyịn ika Gilgal+ man ikọsọn̄ọ itie edidem do.”+
15 Ntre kpukpru owo ẹka Gilgal, ẹnyụn̄ ẹkenam Saul edidem ke iso Jehovah ke Gilgal. Ekem mmọ ẹwa uwa ebuana do ke iso Jehovah,+ ndien Saul ye kpukpru mbon Israel ẹdara do etieti.+
