1 Samuel 12;1-25
12 Ekem Samuel ọdọhọ ofụri Israel ete: “Mmokop kpukpru se mbufo ẹdọhọde mi,+ ẹte nnam edidem akara mbufo.+
2 Ndien sese edidem oro asan̄ade mbufo mi ke iso!+ Amaedi ami, mmọsọn̄+ nnyụn̄ ntịbe iwat,+ ndien nditọ mi ẹdu mi ye mbufo,+ ami mmonyụn̄ nsan̄a ke iso mbufo toto ke uyen mi tutu esịm mfịn emi.+
3 Se mi mi. Edieke mbufo ẹnyenede ikọ nditịn̄ mban̄a mi, ẹtịn̄ ke iso Jehovah ye ke iso enye emi enye eyetde aran:+ N̄kọbọ anie enan̄ esie, n̄konyụn̄ mbọ+ anie ass esie, mîdịghe anie ke n̄kotụk, n̄konyụn̄ mfịk anie, anie ke n̄konyụn̄ mbọ okụk udịpinua man nda mfụk enyịn?+ Ndien nyọnọ mbufo usiene.”+
4 Ntem mmọ ẹbọrọ ẹte: “Afo utụkke nnyịn, unyụn̄ ufịkke nnyịn, unyụn̄ ubọhọ baba owo nnyịn kiet n̄kpọ ke ubọk.”+
5 Ntre enye ọdọhọ mmọ ete: “Jehovah edi ntiense mbufo, enye emi enye eyetde aran+ onyụn̄ edi ntiense mfịn emi nte ke mbufo ikwe mi baba n̄kpọ kiet ke ubọk.”+ Ntem mmọ ẹbọrọ ẹte: “Enye edi ntiense.”
6 Ndien Samuel ọdọhọ kpukpru owo ete: “Jehovah emi akadade Moses ye Aaron anam n̄kpọ, emi okonyụn̄ osion̄ode mme ete ete mbufo ke isọn̄ Egypt,+ edi ntiense.
7 Ke emi, mbufo ẹtuak ẹda, man n̄kpe ikpe mbufo ke iso Jehovah nnyụn̄ mbụk kpukpru ndinen edinam+ emi Jehovah akanamde ọnọ mbufo ye mme ete ete mbufo.
8 “Ke ndondo oro Jacob odụkde isọn̄ Egypt,+ ndien mme ete ete mbufo ẹsemede ẹkot Jehovah ẹyom un̄wam,+ Jehovah ọdọn̄ Moses+ ye Aaron, ete ẹda mme ete ete mbufo ẹwọrọ ke Egypt ẹnyụn̄ ẹnam mmọ ẹdidụn̄ ke ebiet emi.+
9 Edi mmọ ẹma ẹfre Jehovah Abasi mmọ,+ ndien enye anyam+ mmọ esịn ke ubọk Sisera+ kpa etubom ekọn̄ Hazor ye ke ubọk mbon Philistia+ ye ke ubọk edidem Moab,+ ndien mmọ ẹn̄wana ekọn̄ ye mmọ.
10 Ekem mmọ ẹseme ẹkot Jehovah ẹyom un̄wam+ ẹnyụn̄ ẹdọhọ ẹte, ‘Nnyịn imanam idiọkn̄kpọ,+ koro nnyịn ikpọn̄de Jehovah ikanam n̄kpọ inọ mme Baal+ ye mme mbiet n̄kpọ Ashtoreth;+ ndien, ke emi, nyan̄a+ nnyịn sio mme asua nnyịn ke ubọk man ikpanam n̄kpọ inọ fi.’
11 Ekem Jehovah ọdọn̄ Jerubbaal+ ye Bedan ye Jephthah+ ye Samuel,+ onyụn̄ anyan̄a mbufo osio ke ubọk mme asua oro ẹkekande mbufo ẹkụk, man mbufo ẹdụn̄ ke ifụre.+
12 Ke ini mbufo ẹkekụtde Nahash+ kpa edidem nditọ Ammon nte edide ndin̄wana ye mbufo, mbufo ẹdọdiọn̄ ẹdọhọ mi ẹte: ‘Ihih, nnyịn isụk iyom edidem akara nnyịn!’+ ke adan̄aemi Jehovah Abasi mbufo edide Edidem+ mbufo.
13 Ndien, ke emi, sese edidem emi mbufo ẹmekde mi, emi mbufo ẹkeben̄ede;+ ndien sese Jehovah ọmọnọ mbufo edidem.+
14 Edieke mbufo ẹdibakde Jehovah,+ ẹdinyụn̄ ẹnamde n̄kpọ esie+ ẹnyụn̄ ẹkopde uyo+ esie, mînyụn̄ isọn̄ke ibuot+ ye mme ewụhọ Jehovah, mbufo ye edidem emi akarade mbufo ẹyedi mme anditiene Jehovah Abasi mbufo.
15 Edi edieke mbufo mîdikopke uyo Jehovah,+ ẹdinyụn̄ ẹsọn̄de ibuot ẹbiat ewụhọ Jehovah,+ ubọk Jehovah oyodoro mbufo ye mme ete mbufo ke idem.+
16 Ndien, ke emi, mbufo ẹtuak ẹda ẹnyụn̄ ẹse akwa n̄kpọ emi Jehovah edinamde ke iso mbufo.
17 Nte mfịn idịghe usen ukpen̄e+ wheat? Mmọn̄ nseme n̄kot+ Jehovah man enye anam obuma otop, edịm onyụn̄ edep;+ do ke mbufo ẹdifiọk ẹnyụn̄ ẹkụt ke idiọkn̄kpọ mbufo omokpon+ ke iso Jehovah ke mbufo ndikeben̄e edidem nnọ idem mbufo.”
18 Ntem Samuel eseme okot Jehovah,+ Jehovah onyụn̄ anam obuma otop, edịm onyụn̄ edep ke usen oro,+ tutu ndịk anam kpukpru owo etieti aban̄a Jehovah ye Samuel.
19 Ndien kpukpru owo ẹdọhọ Samuel ẹte: “Bọn̄ akam+ nọ Jehovah Abasi fo ke ibuot mme asan̄autom fo koro nnyịn iyomke ndikpa; koro nnyịn imadian idiọkn̄kpọ ke kpukpru mme idiọkn̄kpọ nnyịn ke ndiben̄e edidem nnọ idem nnyịn.”
20 Ntre Samuel ọdọhọ mmọ ete: “Ẹkûfehe ndịk.+ Mbufo ẹmenam kpukpru idiọkn̄kpọ emi. Edi mbufo ẹkûwọn̄ọde ẹkpọn̄ nditiene Jehovah,+ mbufo ẹnyụn̄ ẹnam n̄kpọ Jehovah ke ofụri esịt+ mbufo.
21 Mbufo ẹkûnyụn̄ ẹwọn̄ọde ẹtiene ikpîkpu n̄kpọ+ emi mînyeneke ufọn,+ mînyụn̄ ikemeke ndinyan̄a, koro mmọ ẹdide mme ikpîkpu n̄kpọ.
22 Koro Jehovah mîdikpọn̄ke+ ikọt esie ke ntak akwa enyịn̄+ esie, koro Jehovah amada mbufo nte ikọt esie.+
23 Nsa mi-o! ndinamke idiọkn̄kpọ ndue Jehovah ke nditre ndibọn̄ akam ke ibuot mbufo;+ ndien nyeteme+ mbufo eti+ ye edinen usụn̄.
24 Edi mbufo ẹkam ẹbak+ Jehovah ẹnyụn̄ ẹnam n̄kpọ esie ke esịt akpanikọ ye ke ofụri esịt;+ koro mbufo ẹmekụt ikpọ n̄kpọ emi enye anamde ọnọ mbufo.+
25 Edi edieke mbufo ẹsụk ẹnamde se idiọkde, ẹyesọhi+ mbufo ye edidem mbufo+ ẹfep.”
