1 Samuel 2;1-36
2 Ndien Hannah ọbọn̄ akam+ ete:“Esịt mi adara ke Jehovah,+Nnụk* mi okon̄ ke Jehovah.+Inua mi atara man mbọrọ mme asua mi,Koro edinyan̄a fo adatde mi esịt.+
2 Baba owo kiet isanake nte Jehovah, koro owo efen idụhe ke mîbọhọke afo;+Baba itiat ibietke Abasi nnyịn.+
3 Mbufo ẹkûkọbọ nditịn̄ ikọ iseri iseri,Mbufo ẹfara ke ikọ inua mbufo,+Koro Jehovah edide Abasi ifiọk,+Enye onyụn̄ edi anditịm ndomo mme edinam owo.+
4 N̄kpọsọn̄ irenowo emi ẹfiọkde utịgha ẹkop ndịk,+Edi mbon oro ẹtuakde ukot ẹduọn̄ọ ẹda odudu ẹbọbọ ke idem.+
5 Mmọ eke ẹyụhọde ẹmekabade ẹdi mmọ eke ẹkpede utom man ẹnyene udia,+Edi owo ọbiọn̄ ikopke aba biọn̄.+Ada onyụn̄ aman itiaba,+Ndien n̄wan emi ekenyenede ediwak nditọ inyụn̄ inyeneke aba.+
6 Jehovah edi Andiwot ye Andinịm uwem,+Andida owo nsụhọde ke Udi,*+ ye Andida n̄wọrọ ndi.+
7 Jehovah edi Andinam owo ebuene+ ye Andinọ owo inyene,+Andisụhọde owo itie, ye Andimenede owo ke enyọn̄,+
8 Andimenede usụhọde owo nsio ke ntan;+Enye emenede ubuene osio ke obube ntọn̄,+Man anam mmọ ẹtie ye mbọn̄; ndien ọnọ mmọ ebekpo ubọn̄+ ẹda ẹnyene.+Koro mme adaha isọn̄+ ẹnyenede Jehovah,Enye onyụn̄ odori isọn̄ ke enyọn̄ mmọ.
9 Enye ekpeme ikpat mbon emi ẹsọn̄ọde ẹda ye enye;+Edi anam mme idiọkowo ẹdobo ke ekịm,+Koro owo mîkanke ke odudu idemesie.+
10 Idem eyenyek mmọ eke ẹn̄wanade ye Jehovah;+Enye ayanam obuma asiaha oto enyọn̄ editọ mmọ.+Jehovah eyekpe ikpe ọnọ mme utịt isọn̄,+Man enye ọkpọnọ edidem esie odudu,+Man enye ekpemenede nnụk owo emi enye eyetde aran ke enyọn̄.”+
11 Ekem Elkanah ọnyọn̄ ufọk esie ke Ramah; edi eyen oro akabade edi asan̄autom+ Jehovah ke iso Eli kpa oku.
12 Ndien nditọ Eli ẹkedi mbukpo owo;+ mmọ ikọdiọn̄ọke Jehovah.+
13 Kaban̄a se mme oku ẹkpebọde mbio obio,+ ke ini owo ekededi awade uwa, ke ini unam osụk ofụtde+ ke ikan̄, asan̄autom oku ayakama fork emi enyenede edet ita ke ubọk edi,
14 onyụn̄ anyan esịn ke besịn m̀mê eso utemudia enyene-ubọk iba m̀mê akwa eso m̀mê eso utemudia enyene-ubọk kiet. Ndien oku ayada se ededi oro fork ekịmde osio. Ntem ke mmọ ẹkesinam ye kpukpru nditọ Israel emi ẹdide ke Shiloh.+
15 N̄ko, mbemiso mmọ ẹfọpde ikpọn̄,+ asan̄autom oku eyedi edidọhọ owo emi awade uwa ete: “Nọ ndisi unam ẹda ẹkefọp ẹnọ oku, koro enye mîdibọhọ fi unam emi ẹtemde-tem.”+
16 Ndien ke ini owo oro ọdọhọde enye ete: “Yak ẹbem iso ẹfọp ikpọn̄ kan̄a,+ ekem afo ayada se ededi oro ukpọn̄ fo oyomde.”+ Edi enye ọyọbọrọ ete: “Ihih, nọ mi idahaemi; mîdịghe mmọn̄ nda ke n̄kanubọk!”+
17 Ndien idiọkn̄kpọ mme asan̄autom emi okpon etieti ke iso Jehovah;+ koro mmọ ẹsịnde uwa Jehovah ke ndek.+
18 Ndien Samuel asan̄a utom+ ke iso Jehovah nte eyenọwọn̄, esịne ephod emi ẹnamde ke linen.+
19 N̄ko, eka esie esinam anana-ubọk kod, ada ọsọk enye ke isua ke isua, ke ini enye asan̄ade ye ebe esie ọdọk edi ndiwa uwa eke isua ke isua.+
20 Ndien Eli ọdiọn̄+ Elkanah ye n̄wan esie onyụn̄ ọdọhọ ete: “Jehovah akpakam anam n̄wan emi aman eyen ọnọ fi ke itie ebuọt emi mbufo ẹbuọtde Jehovah.”+ Ndien mmọ ẹnyọn̄ọ ebiet mmọ.
21 Ntem Jehovah atua Hannah mbọm,+ ndien enye oyomo onyụn̄ aman nditọiren ita ye nditọiban iba.+ Ndien eyen oro Samuel ọkọri okpon ke iso Jehovah.+
22 Ekem Eli ọsọn̄ etieti, enye onyụn̄ okop+ kpukpru se nditọ esie ẹnamde+ ofụri Israel ye nte mmọ ẹdan̄de iban+ emi ẹnamde utom ke enyịnusụn̄ tent usopidem.+
23 Edi enye ọdọhọ mmọ ete:+ “Ntak emi mbufo ẹnamde mme n̄kpọ emi?+ Koro se n̄kopde mme owo ẹtịn̄de ẹban̄a mbufo ifọnke.+
24 Ihih,+ nditọ mi, etop oro ami n̄kopde, emi ikọt Jehovah ẹnamde asuana, ifọnke.+
25 Edieke owo anamde idiọkn̄kpọ edue owo,+ Abasi eyebiere ikọ ọnọ enye;+ edi edieke owo anamde idiọkn̄kpọ edue Jehovah,+ anie edikpe ubọk ọnọ enye?”+ Edi mmọ ikopke uyo ete mmọ,+ koro Jehovah okoyomde ndiwot mmọ ndien.+
26 Ke ofụri ini emi eyen oro Samuel ọdọdiọn̄ ọkọri, Jehovah ye owo ẹnyụn̄ ẹma enye.+
27 Ekem owo Abasi+ kiet edi etiene Eli edidọhọ enye ete: “Ntem ke Jehovah ọdọhọ ete, ‘Nte ami n̄kayarakede idemmi nnọ ufọk ete ete fo ke adan̄aemi mmọ ẹkedide ifịn ke ufọk Pharaoh ke Egypt?+
28 Ndien mma mmek enye nsio ke otu ofụri esien Israel nnọ idemmi,+ man edi oku, onyụn̄ esịne ephod ke iso mi aka itieuwa+ mi akanam nsụn̄ikan̄ uwa ọwọrọ ọdọk man ami n̄kpọnọ ufọk ete ete fo ofụri uwa emi nditọ Israel ẹfọpde ke ikan̄.+
29 Ntak emi mbufo ẹdade ikpat ẹtịgha uwa+ ye enọ mi emi ami n̄kowụkde nte ẹnọ ke ebietidụn̄ mi,+ afo onyụn̄ okponode nditọ fo akan mi ke ndida mfọnn̄kan ke otu uwa oro ikọt+ mi Israel ẹwade mbọk idem mbufo?+
30 “‘Ntak edi oro Jehovah Abasi Israel ọdọhọde ete: “Ke akpanikọ, mma ndọhọ nte, Ufọk fo ye ufọk ete ete fo, ẹyesan̄a ke iso mi ke nsinsi.”+ Edi, ke emi, Jehovah ọdọhọ ete: “Nsa mi-o! koro nyokpono+ mmọ eke ẹkponode mi,+ mmọ eke ẹsịnde mi ke ndek nyonyụn̄ nsịn mmọ ke ndek.”+
31 Sese! Usen ke edi oro ami ndisịbede fi ubọk mfep, ye ubọk ufọk ete ete fo, man akani eren okûdu ke ufọk fo.+
32 Ndien afo oyokụt asua ke ebietidụn̄ mi kpa ye kpukpru mfọn oro ẹfọnde ye Israel;+ tutu amama akani eren idinyụn̄ idụhe ke ufọk fo.
33 Edi odu owo fo kiet emi mmendisịbeke mfep ke itieuwa mi man enyịn ekịm fi, afo onyụn̄ okop mmemidem ke ukpọn̄; edi ẹyewot ediwak mbonufọk fo ke akan̄kan̄.+
34 Idiọn̄ọ emi oyonyụn̄ etiene nditọ fo mbiba, Hophni ye Phinehas:+ Mmọ mbiba ẹdikpa usen kiet.+
35 Ami nyonyụn̄ nnam oku emi anamde akpanikọ adaha ada ọnọ mi.+ Enye ayanam n̄kpọ ekekem ye se idude mi ke esịt ye se ukpọn̄ mi amade; ndien nyọbọp ufọk emi edibịghide ke nsinsi nnọ enye, enye oyonyụn̄ anam utom kpukpru ini ọnọ owo mi oro nyetde aran.+
36 Ndien owo ekededi eke osụhọde+ ke ufọk fo eyedi edinụhọ ọnọ enye man ọbọ okụk ukpeutom ye ekara uyo, enye oyonyụn̄ ọdọhọ ete: “Mbọk, sịn mi ke itieutom oku, man nnyene ekpri uyo nta.”’”+
Mme Ikọ Idakisọn̄
^ Ke Bible nnụk unam awak ndida mban̄a ukeme, odudu, m̀mê ukara.
^ Heb., “Sheol.” Se N̄w. Ik. 5.
