1 Thessalonica 5;1-28
5 Nditọete, ufọn idụhe ndiwet baba n̄kpọ kiet nnọ mbufo mban̄a mme ini ye mme eyo.+
2 Koro mbufo ẹmetịm ẹfiọk ẹte ke usen Jehovah+ edidi nte inọ ke okoneyo.+
3 Ini ekededi emi mmọ+ ẹdọhọde: “Emem+ ye ifụre!” adan̄aoro nsobo+ ayabuat mmọ kpa nte uman abuatde n̄wan idịbi;+ ndien mmọ idikwe usụn̄ ubọhọ.+
4 Edi mbufo, nditọete, mbufo idụhe ke ekịm,+ emi akpanamde usen oro abuat mbufo nte inọ,+
5 koro kpukpru mbufo ẹdi nditọ un̄wana+ ye nditọ uwemeyo.+ Nnyịn idịghe mbon okoneyo inyụn̄ idịghe mbon ekịm.+
6 Ntre, ndien, ẹyak nnyịn ikûde idap+ nte mmọ eken ẹdede,+ edi ẹyak nnyịn itaba idap+ inyụn̄ inyene ikike.+
7 Koro edi ido mmọ eke ẹdede idap+ ndide ke okoneyo,+ mmọ eke ẹkpade mmịn ẹsinyụn̄ ẹwak ndikpa mmịn ke okoneyo.
8 Edi amaedi nnyịn emi idide mbon uwemeyo, ẹyak nnyịn inyene ikike inyụn̄ isịne mbuọtidem+ ye ima nte ukwak ikpanesịt+ inyụn̄ iyara idotenyịn edinyan̄a+ nte ndụn;+
9 koro Abasi ikenịmke nnyịn inọ iyatesịt,+ edi ekenịm nnyịn ete inyene edinyan̄a+ ebe ke Ọbọn̄ nnyịn Jesus Christ,+
10 emi akakpade ọnọ nnyịn,+ man, ke idude uwem m̀mê ikpade, nnyịn ikpodu uwem ye enye.+
11 Ke ntre ẹka iso ẹdọn̄ kiet eken esịt ẹnyụn̄ ẹbọp kiet eken ọkọri,+ kpa nte mbufo ẹsụk ẹnamde.+
12 Edi nnyịn iben̄e mbufo, nditọete, ite ẹkpono mbon oro ẹnamde utom ọkpọsọn̄ ke otu mbufo ẹnyụn̄ ẹdade mbufo usụn̄+ ke Ọbọn̄ ẹnyụn̄ ẹnọde mbufo item;
13 ẹnyụn̄ ẹtịm ẹkere ẹban̄a mmọ ke ima ke ntak utom mmọ.+ Ẹtie emem emem ye kiet eken.+
14 Ke n̄kan̄ eken, nnyịn iteme mbufo, nditọete, ite ẹnọ mbon oro ẹsan̄ade etịme etịme item,+ ẹtịn̄ ikọ ẹsọn̄ọ ukpọn̄ eke ofụhọde esịt,+ ẹn̄wam mbon mmemidem, ẹnyene anyanime+ ye kpukpru owo.
15 Ẹkụt ẹte baba owo kiet idaha idiọk isio owo ekededi usiene idiọk,+ edi kpukpru ini ẹbịne ndinam se ifọnde ye kiet eken ẹnyụn̄ ẹnam ntre ye kpukpru owo eken.+
16 Ẹdat esịt kpukpru ini.+
17 Ẹkûdop ndibọn̄ akam.+
18 Ẹnọ ekọm ke kpukpru n̄kpọ.+ Koro emi edi uduak Abasi ọnọ mbufo emi ẹdide mme anditiene Christ Jesus.
19 Ẹkûnịme ikan̄ spirit.+
20 Ẹkûsịn ikọ prọfesi ke ndek.+
21 Ẹdụn̄ọde kpukpru n̄kpọ ẹfiọk;+ ẹsọn̄ọ ẹmụm se ifọnde ẹkama.+
22 Ẹbet kpukpru orụk idiọkido.+
23 Abasi emem+ akpakam anam mbufo ẹsana ofụri ofụri.+ Ẹkpekam ẹkpeme spirit ye ukpọn̄ ye idem mbufo, nditọete, man mbufo ẹnana ndo ke kpukpru usụn̄ ẹkûnyụn̄ ẹnyene nduduọhọ ke ini edidu Ọbọn̄ nnyịn Jesus Christ.+
24 Enye emi okotde mbufo edi anam-akpanikọ, ndien enye ayanam oro n̄ko.
25 Nditọete, ẹka iso ẹbọn̄ akam ẹban̄a nnyịn.+
26 Ẹda edisana ntịminua ẹkọm kpukpru nditọete.+
27 Mmọsọn̄ọ ndọhọ mbufo ke Ọbọn̄ nte ẹkot leta emi ẹnọ kpukpru nditọete.+
28 Yak mfọnido Ọbọn̄ nnyịn Jesus Christ oro owo mîdotke+ odu ye mbufo.
