1 Timothy 3;1-16
3 Ikọ emi edi akpanikọ.+
Edieke owo ekededi anyanarede ebịne itieutom esenyịn,+ enye oyom eti utom.
2 Ntre esenyịn ekpenyene ndidi owo emi owo mîkemeke ndidori ikọ,+ ebe n̄wan kiet, afara ke idem,+ enyene eti ibuot,+ anam n̄kpọ ke nde ke nde,+ akama isenowo,+ odot ndikpep owo n̄kpọ,+
3 idịghe owo mmịn ye owo utọk,+ idịghe owo mfiomo,+ idịghe itụn,+ idịghe owo en̄wan,+ idịghe ama okụk,+
4 edi owo emi akamade mbonufọk esie ke eti usụn̄,+ emi enyenede nditọ eke ẹsụkde ibuot ẹnyụn̄ ẹdade n̄kpọ ke akpan n̄kpọ;+
5 (edieke owo ekededi mîfiọkke ndikama mbonufọk esie, didie ke enye edise aban̄a esop Abasi?)
6 idịghe owo emi akabarede esịt obufa,+ mbak enye edikohode idem+ ndien ọduọ odụk ubiomikpe oro ẹbiomde Devil.+
7 Akan oro, enye n̄ko ekpenyene ndidi owo oro mbon an̄wa ẹtịn̄de nti ikọ ẹban̄a,+ mbak enye ediduọ odụk esuene ye ekpọ+ Devil.
8 Kpasụk ntre, mme asan̄autom unamutom+ ẹkpenyene ndidi mbon emi ẹdade n̄kpọ ke akpan n̄kpọ, inyeneke edeme ikọ iba, isịnke idem ke edin̄wọn̄ ediwak mmịn, idiọkke itọn̄ ibịne idiọk udori,+
9 ẹmụm edisana ndịben̄kpọ+ mbuọtidem ẹkama ye edisana ubieresịt.+
10 N̄ko, yak ẹbem iso ẹdomo+ mmọ emi ẹse m̀mê ẹdot, ekem yak mmọ ẹnam utom nte mme asan̄autom, adan̄a nte owo mînyeneke se ẹtịn̄de ẹdian mmọ.+
11 Kpasụk ntre, iban ẹkpenyene ndidi mbon oro ẹdade n̄kpọ ke akpan n̄kpọ, idọkke edidọk,+ ẹfara ke idem,+ ẹnam akpanikọ ke kpukpru n̄kpọ.+
12 Yak mme asan̄autom unamutom ẹdi mme ebe n̄wan kiet+ ẹnyụn̄ ẹtịm ẹkama nditọ ye mbonufọk mmọ.+
13 Koro mbon oro ẹtịmde ẹsan̄a utom ẹnyene eti idaha+ ye akwa ifụre nditịn̄ ikọ+ mban̄a mbuọtidem mmọ ke Christ Jesus.
14 N̄wet fi mme n̄kpọ emi, okposụkedi ndoride enyịn ndidi ke mîbịghike,+
15 edi edieke mbịghide ndidi, man ọkpọfiọk nte odude uwem ke otu mbonufọk Abasi,+ kpa esop odu-uwem Abasi, emi edide adaha ye ukpeme+ ọnọ akpanikọ.
16 Ke akpanikọ, edisana ndịben̄kpọ+ uten̄e Abasi emi okpon nte owo mîkemeke ndineni: ‘Ẹma ẹyarade enye ke obụkidem,+ ẹbat enye ke edinen ke spirit,+ enye owụt mme angel idem,+ ẹkwọrọ enye ke otu mme idụt,+ ẹbuọt idem ye enye ke ererimbot,+ ẹmen enye ẹdọk ke ubọn̄.’+
