1 Timothy 5;1-25
5 Kûsọn̄ọ uyo usua unọ ebiowo.+ Edi nọ enye item nte ete, nọ n̄kparawa iren item nte nditọeka iren,
2 nọ n̄kani iban+ item nte mme eka, nọ n̄kparawa iban item nte nditọeka iban+ ke ata edisana ido.
3 Kpono mme ebeakpa emi ẹdide ata mme ebeakpa.+
4 Edi edieke ebeakpa enyenede nditọ m̀mê nditọ nditọ, yak mmọ emi ẹkpep ndibem iso nten̄e Abasi ke ufọk+ mmọ ẹnyụn̄ ẹka iso ẹsio usiene oro ekemde ẹnọ mme ete ye mme eka+ ye mme ete ete ye mme eka eka mmọ, koro emi enende Abasi ke enyịn.+
5 N̄wan emi edide ata ebeakpa onyụn̄ odude ke unana+ odori enyịn ke Abasi+ onyụn̄ ọkọbọ ke n̄kpeubọk ye akam okoneyo ye uwemeyo.+
6 Edi enye emi ọwọrọde ebịne ndiyụhọ udọn̄ obụkidem+ amakpa+ okposụkedi enye osụk odude uwem.
7 Ntre ka iso nọ mme ewụhọ+ emi, man ẹkûnyene se ẹdoride+ mmọ.
8 Ke akpanikọ edieke owo ekededi mîtịmke n̄kpọ inọ ikọt esie,+ akpan akpan mbonufọk+ esie, enye akan̄+ mbuọtidem+ onyụn̄ ọdiọk akan owo eke mînịmke ke akpanikọ.
9 Yak ẹsịn enyịn̄ ebeakpa emi mîsụhọkede ikan isua ata ke n̄wed, n̄wan emi ọkọdọde ebe kiet,+
10 emi ẹtiede ntiense ẹban̄a nti utom+ esie, edieke enye ọkọbọkde nditọ,+ edieke enye akakamade isenowo,+ edieke enye ekeyetde ukot ndisana owo,+ edieke enye akan̄wamde mmọ oro ẹdude ke ukụt,+ edieke enye ekesịnde ifịk anam kpukpru nti utom.+
11 Edi, kûsịn enyịn̄ mme ebeakpa emi ẹdide n̄kaiferi, koro ke ini udọn̄ idan̄ mmọ ọwọrọde ada ke ufọt mmọ ye Christ,+ mmọ ẹyeyom ndidọ ndọ,
12 ẹnyụn̄ ẹnyene ubiomikpe koro mmọ ẹfụmide mbuọtidem oro mmọ ẹkenyenede ke akpa.+
13 Ke ukem ini oro mmọ n̄ko ẹkpep ndifu ifu, ẹsan̄a ke ufọk ke ufọk; ih, idịghe ifu kpọt, edi ẹdi n̄ko mme etịn̄ ikọ-edem ye mme esịn idem ke mbubehe mbon en̄wen,+ ẹtịn̄ mme n̄kpọ oro mmọ mîkpetịn̄ke.
14 Ke ntre nyom mme ebeakpa emi ẹdide n̄kaiferi ẹdọ ndọ,+ ẹman nditọ,+ ẹkama ufọk, ẹkûnọ andibiọn̄ọ n̄kpọ ndida nsụn̄i nnyịn.+
15 Ke akpanikọ, ndusụk ẹkam ẹwọwọn̄ọde ẹtiene Satan.
16 Edieke n̄wan oro enịmde ke akpanikọ enyenede iman emi ẹdide mme ebeakpa, yak enye an̄wam mmọ,+ yak okûbiom esop mbiomo. Do esop ekeme ndin̄wam mbon oro ẹdide ata mme ebeakpa.+
17 Yak ẹbat ke mbiowo emi ẹtịmde ẹda usụn̄+ ẹdot se ẹnen̄erede ẹkpono,+ akpan akpan mmọ oro ẹnamde utom ọkpọsọn̄ ke utịn̄ikọ ye ukpepn̄kpọ.+
18 Koro N̄wed Abasi ọdọhọ ete: “Kûbọp enan̄ inua ke ini enye edịghide wheat”;+ n̄ko: “Anamutom odot n̄kpọ eyenutom.”+
19 Kûnyịme edori ikọ oro ẹdoride ebiowo, ibọhọke oto ke inua ntiense iba m̀mê ita.+
20 Sua nọ+ mbon oro ẹkade iso ndinam idiọkn̄kpọ+ ke iso kpukpru mme andida nse, man ndịk akpanam mmọ eken.+
21 Mmọsọn̄ọ n̄wụk fi ke iso Abasi ye ke iso Christ Jesus+ ye ndimek angel nte enịm mme n̄kpọ emi ye unana edibem iso mbiom owo ikpe, kûnyụn̄ unam baba n̄kpọ kiet ke uma.+
22 Kûsọsọp udori owo+ ekededi ubọk;+ kûnyụn̄ utiene ubuana ke idiọkn̄kpọ mbon en̄wen;+ nịm idem edisana edisana.+
23 Kûn̄wọn̄ mmọn̄ aba, edi da esisịt wine+ ke ntak idịbi fo ye uyịre uyịre udọn̄ọ fo.
24 Idiọkn̄kpọ ndusụk owo ayarade,+ ọsọsọp ada esịm ubiomikpe, edi idiọkn̄kpọ mbon efen ayarade ke ukperedem.+
25 Kpasụk ntre n̄ko ke nti utom ẹyarade,+ ndien mmọ oro mîyarakede ikemeke ndidịbe.+
