2 Chronicle 36;1-23
36 Ekem mbio obio ẹmen Jehoahaz+ eyen Josiah ẹnịm ke edidem ke itie ete esie ke Jerusalem.+
2 Jehoahaz ekedi isua edịp ye ita ke ini enye ọtọn̄ọde ndikara, enye onyụn̄ akara ọfiọn̄ ita ke Jerusalem.+
3 Ekem edidem Egypt emen enye osio ke Jerusalem+ onyụn̄ anam isọn̄ oro ekpe isop talent silver+ ikie ye talent gold kiet.
4 N̄ko-n̄ko edidem+ Egypt anam Eliakim+ eyeneka esie edi edidem Judah ye Jerusalem onyụn̄ okpụhọ enye enyịn̄ okot Jehoiakim; edi Necho+ emen Jehoahaz eyeneka esie ọnyọn̄ Egypt.+
5 Jehoiakim+ ekedi isua edịp ye ition ke ini enye ọtọn̄ọde ndikara, enye onyụn̄ akara isua duopekiet ke Jerusalem;+ ndien enye aka iso anam se idiọkde ke enyịn Jehovah Abasi esie.+
6 Ndien Nebuchadnezzar+ edidem Babylon ọdọk edi+ man edikọbi enye ke ebuka okpoho iba ada ọnyọn̄ Babylon.+
7 Ndien Nebuchadnezzar+ atan̄ ndusụk n̄kpoduoho+ ufọk Jehovah ọnyọn̄ Babylon ọkọdọn̄ ke ufọk ubọn̄ esie ke Babylon.+
8 Amaedi mme n̄kpọ efen+ emi ẹban̄ade Jehoiakim ye mme mbubiam+ n̄kpọ oro enye akanamde ye ndiọi edinam esie, sese, ẹwet mmọ ẹsịn ke N̄wed+ Ndidem Israel ye Judah; ndien Jehoiachin+ eyen esie akara ke itie esie.
9 Jehoiachin+ ekedi isua efịteta ke ini enye ọtọn̄ọde ndikara, enye onyụn̄ akara ọfiọn̄ ita+ ye usen duop ke Jerusalem; ndien enye aka iso anam se idiọkde ke enyịn Jehovah.+
10 Ndien ke ini isua akabarede,+ Edidem Nebuchadnezzar ọdọn̄+ ẹkeda enye ẹnyụn̄ ẹtan̄ ndiye n̄kpọ ufọk Jehovah+ ẹdi Babylon.+ N̄ko-n̄ko, enye anam Zedekiah+ eyeneka ete esie edi edidem ke Judah ye Jerusalem.+
11 Zedekiah+ ekedi isua edịp ye kiet ke ini enye ọtọn̄ọde ndikara, enye onyụn̄ akara isua duopekiet ke Jerusalem.+
12 Ndien enye aka iso anam se idiọkde+ ke enyịn Jehovah Abasi esie. Enye ikonyụn̄ isụhọkede+ idemesie ke iso prọfet+ Jeremiah+ emi eketịn̄de ikọ nte Jehovah okowụkde enye.
13 Ndien enye ọsọn̄ ibuot+ ye Edidem Nebuchadnezzar, emi akanamde enye ada un̄wọn̄ọ ke enyịn̄ Abasi;+ enye onyụn̄ ọsọn̄+ obotitọn̄ onyụn̄ ọsọn̄+ esịt, ndien ifiakke itiene Jehovah Abasi Israel.
14 Kpukpru mbọn̄ oku+ ye kpukpru owo ẹnam idiọkn̄kpọ ke akamba udomo, nte ekemde ye kpukpru mbubiam+ n̄kpọ mme idụt, tutu mmọ ẹsabade ufọk Jehovah emi enye akanamde asana ke Jerusalem.+
15 Ndien Jehovah Abasi mme ete ete mmọ ọdọn̄ mme isụn̄utom esie ọnọ mmọ,+ ọdọn̄ afiak ọdọn̄, koro enye okokopde mbọm aban̄a ikọt esie+ ye ebietidụn̄ esie.+
16 Edi mmọ ẹka iso ndida mme isụn̄utom ata Abasi nnam mbubru+ ẹnyụn̄ ẹsịn ikọ esie ke ndek+ ẹnyụn̄ ẹsak+ mme prọfet esie nsahi, tutu ifụtesịt+ Jehovah etiene ikọt esie, usọbọ inyụn̄ idụhe.+
17 Ntre enye ada edidem mbon Chaldea+ ọdọk etiene mmọ, emi okowotde n̄kparawa mmọ ke akan̄kan̄+ ke edisana ebiet+ mmọ, enye ikenyeneke mbọm inọ akparawa m̀mê n̄kaiferi, akani owo m̀mê owo usọn̄ emi idem ememde.+ Enye ada kpukpru mmọ esịn enye ke ubọk.
18 Ndien enye atan̄ kpukpru n̄kpoduoho,+ n̄kpri ye ikpọ,+ ke ufọk ata Abasi ye ke mme itie ubon n̄kpọuto+ ufọk Jehovah ye ke mme itie ubon n̄kpọuto edidem+ ye eke mbọn̄ esie, enye atan̄ kpukpru n̄kpọ edi Babylon.
19 Ndien enye ọfọp ufọk ata Abasi+ onyụn̄ owụri mme ibibene+ Jerusalem; mmọ ẹnyụn̄ ẹfọp kpukpru mme tọwa ufọkidụn̄ esie ke ikan̄ ọkọrọ ye kpukpru ndiye n̄kpọ+ esie, man osobo mmọ efep.+
20 N̄ko-n̄ko, enye atan̄ mbon oro akan̄kan̄ okowotde osụhọ ọnyọn̄ Babylon+ nte mbuotekọn̄, ndien mmọ ẹkabade ẹdi mme asan̄autom esie+ ye eke nditọ esie tutu esịm ini emi edidem Persia+ ọtọn̄ọde ndikara;
21 man osu ikọ Jehovah oro enye akadade inua Jeremiah etịn̄,+ tutu isọn̄ ekpe isọn mme sabbath esie.+ Isọn̄ onyụn̄ enịm sabbath ke ofụri ini emi enye anade ndon, tutu isua ata ye duop ọyọhọ.+
22 Ndien ke akpa isua Cyrus+ edidem Persia,+ man ikọ emi Jehovah+ akadade inua Jeremiah+ etịn̄ okposu, Jehovah edemede spirit+ Cyrus edidem Persia, ntre enye anam ẹtan̄a ke ofụri obio ubọn̄ esie, onyụn̄ anam ẹwet+ ẹte:
23 “Ntem ke Cyrus edidem Persia+ ọdọhọ ete, ‘Jehovah Abasi enyọn̄ ọmọnọ mi kpukpru mme obio ubọn̄ isọn̄,+ enye omonyụn̄ ọdọn̄ mi ete mbọp ufọk nnọ imọ ke Jerusalem, emi odude ke Judah.+ Owo ekededi emi odude ke otu mbufo ke otu kpukpru ikọt esie,+ Jehovah Abasi esie akpakam odu ye enye.+ Ntre yak enye ọdọk aka.’”+
