2 Ndidem 19;1-37
19 Edikem ke ndondo oro Edidem Hezekiah+ okopde, enye ọsọsọp awak ọfọn̄idem+ esie onyụn̄ emen ọfọn̄ ntuan̄a+ esịne ndien odụk edi ufọk Jehovah.+
2 N̄ko-n̄ko, enye ọdọn̄ Eliakim,+ emi edide etubom mbonufọk, ye Shebnah+ ewetn̄wed ye mbiowo ke otu mme oku, ndien mmọ ẹsịne ọfọn̄ ntuan̄a, ẹka ke ọtọ prọfet Isaiah+ eyen Amoz.+
3 Ndien mmọ ẹkedọhọ enye ẹte: “Ntem ke Hezekiah ọdọhọ ete, ‘Mfịn edi usen nnanenyịn+ ye nduari+ ye emiom;+ koro nditọ ẹmekpere ndimana,+ edi odudu idụhe ndiman.+
4 Ekeme ndidi Jehovah Abasi fo oyokop+ kpukpru ikọ Rabshakeh, emi edidem Assyria kpa ọbọn̄ esie ọdọn̄de enye ete edisụn̄i+ odu-uwem Abasi, ndien enye iditreke ndikot enye edinam ibat aban̄a mme ikọ emi Jehovah Abasi fo okopde.+ Afo nyụn̄ bọn̄ akam+ ban̄a nsụhọ+ oro ẹdude.’”
5 Ntre mme asan̄autom Edidem Hezekiah ẹdụk ẹdi ke ọtọ Isaiah.+
6 Ndien Isaiah ọdọhọ mmọ ete: “Ntem ke mbufo ẹdidọhọ ọbọn̄ mbufo ete, ‘Ntem ke Jehovah ọdọhọ ete:+ “Kûkop ndịk+ uban̄a ikọ emi afo okopde, emi mme asan̄autom edidem Assyria ẹtịn̄de ẹsụn̄i mi.+
7 Sese, ami mmọn̄ nsịn enye spirit+ ke idem, ndien enye oyokop etop+ onyụn̄ afiak ọnyọn̄ idụt esie; ami nyonyụn̄ nnam ẹwot enye ke akan̄kan̄ ke idụt esie.”’”+
8 Ekem Rabshakeh+ afiak ọnyọn̄ ndien okokụt edidem Assyria an̄wanade ye Libnah;+ koro enye okokopde ete ke enye ama ọkpọn̄ Lachish.+
9 Enye okop nte ẹdọhọde ẹban̄a Tirhakah edidem Ethiopia, ẹte: “Sese enye ọmọwọrọ edi ndin̄wana ye afo.” Ntre ke enye afiak ọdọn̄ mme isụn̄utom+ ọnọ Hezekiah, ete:
10 “Ntem ke mbufo ẹdidọhọ Hezekiah edidem Judah ete, ‘Kûyak Abasi fo emi afo ọbuọtde idem abian̄a fi,+ ete: “Owo ididaha Jerusalem+ isịn edidem Assyria ke ubọk.”+
11 Sese! Afo omokop se ndidem Assyria ẹkenamde kpukpru mme idụt ke ndisobo mmọ mfep;+ nte afo ndien ke ẹdinyan̄a?+
12 Nte mme abasi+ mme idụt oro mme ete ete mi ẹkesobode, oro edi, Gozan+ ye Haran+ ye Rezeph ye nditọ Eden+ emi ẹkedude ke Tel-assar,+ ẹma ẹnyan̄a mmọ?
13 Enye edidem Hamath+ ye edidem Arpad+ ye edidem mme obio Sepharvaim, Hena ye Ivvah?’”+
14 Ndien Hezekiah ọbọ mme isụn̄utom esie leta oro ke ubọk okot,+ ekem Hezekiah ọdọk aka ufọk Jehovah akatat enye enịm ke iso Jehovah.+
15 Ndien Hezekiah ọbọn̄ akam+ ke iso Jehovah ete: “O Jehovah Abasi Israel,+ emi etiede ke mme cherub,+ afo ikpọn̄ edi ata Abasi ke kpukpru mme obio ubọn̄+ isọn̄.+ Edi afo akanam enyọn̄+ ye isọn̄.+
16 Biọn̄ utọn̄, O Jehovah, nyụn̄ kop.+ Tat enyịn fo,+ O Jehovah, nyụn̄ se, nyụn̄ kop mme ikọ emi Sennacherib ọdọn̄de ete ẹdisụn̄i+ odu-uwem Abasi.
17 O Jehovah, edi akpanikọ nte ke ndidem Assyria ẹma ẹsobo mme idụt ye isọn̄ mmọ.+
18 Ndien mmọ ẹma ẹfọp mme abasi mmọ ke ikan̄, koro mmọ mîkedịghe mme abasi,+ edi, ẹkedi utom ubọk owo,+ eto ye itiat; ntak edi oro ẹkesobode mmọ.
19 Ndien, ke emi, O Jehovah Abasi nnyịn,+ mbọk nyan̄a nnyịn+ sio enye ke ubọk, man kpukpru mme obio ubọn̄ isọn̄ ẹkpefiọk ẹte ke afo ikpọn̄ O Jehovah, edi Abasi.”+
20 Ndien Isaiah eyen Amoz ọdọn̄ utom ọnọ Hezekiah, ete: “Ntem ke Jehovah Abasi Israel ọdọhọ ete,+ ‘Ami mmokop+ akam+ emi afo ọbọn̄de ọnọ mi aban̄a Sennacherib edidem Assyria.
21 Ntem ke Jehovah etịn̄ aban̄a enye, ete:
“Eyenan̄wan Zion* esịn fi ke ndek,+ enye amasak fi nsahi.+Eyenan̄wan Jerusalem+ omonyụn̄ ada fi ke edem ofụn̄ ibuot.+
22 Anie ke afo osụn̄i onyụn̄ ọtọk?+Emenede uyo ke enyọn̄ etịn̄ ikọ ye anie+Onyụn̄ emenede enyịn ese anie?+
Edi Edisana Abasi Israel!+
23 Afo amada mme isụn̄utom+ fo osụn̄i Jehovah onyụn̄ ọdọhọ ete,+‘Nyada ediwak chariot ekọn̄ mi+Ndọk enyọn̄ obot obot ikpehe,+Kpa ata nsannsan ikpehe Lebanon;+Nyonyụn̄ n̄kpi nnyan cedar+ esie, ye nti eto juniper esie.+Ndien nyodụk n̄kesịm akpatre itie emi enye odude, kpa akai in̄wan̄ mfri esie.+
24 Ami nyetịbi nnyụn̄ n̄n̄wọn̄ esen mmọn̄,Nyonyụn̄ nda ekaikpat mi nnam kpukpru edịk Nile Egypt ẹsat.’+
25 Nte afo ukopke?+ Toto ko nte ke oro ke ami ndinam.+N̄kanam enye toto ke eyo oko.+Ke emi mmọn̄ nda enye ndi.+Ndien afo ayanam mme obio ibibene ẹkabade ẹna ndon nte mme ibombom n̄wụre.+
26 Ndien ubọk eyemem mmọ eke ẹdụn̄de ke esịt;+Idem eyenyek mmọ, bụt oyonyụn̄ anam mmọ.+Mmọ ẹyetie nte ikọn̄ ye nsehe awawa mbiet,+Etie nte mbiet ọkọmufọk+ ke ini ofụm edem usiahautịn ọfọpde enye.+
27 Ami mmetịm mfiọk ini emi afo etiede sụn̄ ye ini emi afo ọwọrọde+ ye ini emi afo odụkde,+Ye ini emi afo ayatde esịt ye ami,+
28 Koro iyatesịt emi afo ayatde ye ami+ ye uyom fo ẹmedọk ẹdụk mi utọn̄.+Ami nyesịn fi uwam mi ke ibuo nnyụn̄ nda n̄kpaha mi n̄kọbi fi n̄kpọkinua,+Ndien nyada fi mfiak ke usụn̄ emi afo okotode edi.”+
29 “‘Ndien emi edidi idiọn̄ọ ọnọ fi:+ Isua emi mbufo ẹdidia se itịbede ke n̄kpasịp oro ẹduọn̄ọde ke isọn̄,+ ndien ke ọyọhọ isua iba mbufo ẹdidia wheat oro ẹtịbede ke idemmọ; edi ke ọyọhọ isua ita mbufo ẹyetọ n̄kpasịp,+ ẹnyụn̄ ẹkpen̄e, ẹtọ in̄wan̄ vine ẹnyụn̄ ẹdia mfri mmọ.+
30 Ndien mbonufọk Judah oro ẹfen̄ede ẹbọhọ ye mbon oro ẹsụhọde+ ẹyedọn̄ n̄kam ke isọn̄ ẹnyụn̄ ẹsion̄o mbun̄wụm ke enyọn̄.+
31 Koro nsụhọ ẹyeto Jerusalem ẹwọn̄ọ,+ mme owo ẹyenyụn̄ ẹto Obot Zion ẹfen̄e ẹbọhọ.+ Ifịk+ Jehovah mme udịm ayanam n̄kpọ emi.
32 “‘Ntak edi oro Jehovah ọdọhọde aban̄a edidem Assyria,+ ete: “Enye ididụkke obio emi+ idinyụn̄ itopke idan̄+ isịn idinyụn̄ idaha otuekọn̄ idụk do, idinyụn̄ ikịbike ibombom+ ikanade enye.
33 Usụn̄ emi enye akasan̄ade edi ke enye edisan̄a ọnyọn̄, enye idinyụn̄ idụkke obio emi, uyo Jehovah edi emi.+
34 Ndien ami nyekpeme+ obio emi nnyụn̄ nnyan̄a enye ke ntak mi+ ye ke ntak David asan̄autom mi.”’”+
35 Edikem ke okoneyo oro, angel Jehovah ọwọrọ okowot owo tọsịn ikie ye anan̄ ye ition ke itienna+ mbon Assyria.+ Ke ini mme owo ẹdemerede ke usenubọk, sese, kpukpru mmọ ẹdidi okpo.+
36 Ntem Sennacherib+ edidem Assyria adaha ọnyọn̄,+ onyụn̄ aka okodụn̄ ke Nineveh.+
37 Edikem nte enye onụhọde ke ufọk Nisroch+ abasi esie,+ Adrammelech ye Sharezer, nditọiren esie, ẹkịm enye ke akan̄kan̄ ẹwot,+ ndien mmọ ẹfen̄e ẹnyọn̄ọ isọn̄ Ararat.+ Ndien Esar-haddon+ eyen esie akara ke itie esie.
Mme Ikọ Idakisọn̄
^ At. Ed., “eyenan̄wan emi mîfiọkke erenowo.”
