2 Samuel 13;1-39
13 Edikem ke mme n̄kpọ emi ẹma ẹkebe, Absalom+ eyen David enyene ediye eyeneka an̄wan emi ekerede Tamar,+ ndien Amnon+ eyen David ama+ Tamar etieti.
2 Ndien n̄kpọ emi afịna Amnon etieti tutu enye ọduọ udọn̄ọ+ aban̄a Tamar eyenete esie an̄wan, koro akanam enye mîfiọkke erenowo, okonyụn̄ ọsọsọn̄+ Amnon ndinam n̄kpọ ekededi ye enye.+
3 Ndien Amnon ama enyene ufan kiet emi ekerede Jehonadab,+ eyen Shimeah,+ eyeneka David; ndien Jehonadab ekedi ata ọfiọkn̄kpọ owo.
4 Ntre enye obụp Amnon ete: “Nso inam fi emi edide eyen edidem etiede mfụhọ mfụhọ ntem kpukpru usen? Ntak mûtịn̄ke unọ mi?”+ Ntem Amnon ọbọrọ enye ete: “Mmama Tamar eyeneka+ Absalom eyenete mi.”+
5 Ntem Jehonadab ọdọhọ enye ete: “Sụhọde na ke bed fo nam nte ọdọdọn̄ọ.+ Ndien ete fo eyedi edise fi, afo nyụn̄ dọhọ enye ete, ‘Mbọk, yak Tamar eyenete mi odụk edinọ mi uyo nte owo udọn̄ọ, onyụn̄ anam uyo ndọn̄esịt ke iso mi man n̄kụt, nnyụn̄ mbọ enye ke ubọk nta.’”+
6 Ntem Amnon osụhọde ana, anam nte idọdọn̄ọ,+ ndien edidem edi edise enye. Ndien Amnon ọdọhọ edidem ete: “Mbọk, yak Tamar eyenete mi odụk edisan̄ uyo iba ke iso mi, man mbọ enye ke ubọk nta nte owo udọn̄ọ.”
7 Ntem David ọdọn̄ ẹkedọhọ Tamar ke ufọk, ete: “Mbọk, ka ufọk Amnon eyenete fo, kanam uyo ndọn̄esịt nọ enye.”
8 Ntre, Tamar adaha aka ufọk Amnon+ eyenete esie ke adan̄aemi enye anade-na. Ndien enye ada ndomuyo abuak onyụn̄ anam uyo ke iso esie onyụn̄ asan̄ uyo.
9 Ekem enye emen ntotụn̄ọ usan an̄wan̄a uyo oro ọdọn̄ onyụn̄ enịm enye ke iso, edi Amnon inyịmeke ndita, edi ọdọhọ ete: “Mbufo ẹnam kpukpru owo ẹwọrọ ẹkpọn̄ mi!”+ Ndien kpukpru owo ẹwọrọ ẹkpọn̄ enye.
10 Ndien Amnon ọdọhọ Tamar ete: “Men uyo ndọn̄esịt oro dụk di esịt ubet, man ami mbọ fi ke ubọk nte owo udọn̄ọ nta.” Ntre Tamar emen uyo oro enye akasan̄de odụk ọsọk Amnon eyenete esie ke esịt ubet.
11 Ke ini Tamar asan̄ade ekpere enye ete ata, Amnon omụm+ enye inikiet inikiet onyụn̄ ọdọhọ enye ete: “Di didan̄ ye ami,+ eyenete mi.”+
12 Edi Tamar ọdọhọ enye ete: “Ihih, eyenete mi! Kûsuene+ mi; koro owo mîsinamke ntem ke Israel.+ Kûnam utọ esuene esuene ido emi.+
13 Ndimen utọ esuene emi ndụk m̀mọ̀n̄? Afo edinyụn̄ akabade etie nte kiet ke otu mme anana-ibuot owo ke Israel. Mbọk, ke emi, neme ye edidem; koro enye mîditreke ndiyak mi nnọ fi.”
14 Edi enye inyịmeke ndikop uyo esie, edi ada odudu esie akan enye ubọk, esuene+ enye onyụn̄ adan̄ enye.+
15 Ndien Amnon akabade asua enye ata ọkpọsọn̄ usua, ndien usua emi enye asuade enye okpon akan ima emi enye akamade enye, ntre Amnon ọdọhọ enye ete: “Daha da wọrọ nyọn̄!”
16 Ntem Tamar ọdọhọ enye ete: “Ihih, eyenete mi; koro afo ndibịn mi nnyọn̄ ọdiọk akan se afo ama akananam mi!” Edi enye inyịmeke ndikop se enye etịn̄de.
17 Ndien Amnon okot asan̄autom oro anamde n̄kpọ ọnọ enye onyụn̄ ọdọhọ ete: “Mbọk sio owo emi ke an̄wa nyụn̄ kọbi usụn̄ baha enye.”
18 (Ndien enye ekesịne n̄wet-n̄wet+ ewụra; koro ntem ke nditọiban edidem, emi mîfiọkke erenowo ẹkesisịne mme anana-ubọk kod.) Ntre asan̄autom Amnon ada enye ọwọrọ an̄wa, onyụn̄ ọkọbi usụn̄ abaha enye.
19 Ntem Tamar ọduọk ntọn̄+ ke ibuot onyụn̄ awak n̄wet-n̄wet ewụra oro enye ekesịnede; onyụn̄ obiom ubọk ke ibuot+ adaha ọwọrọ, asan̄a atua.
20 Ntem Absalom+ eyeneka esie obụp enye ete: “Ndi Amnon+ eyenete fo okodu ye afo? Eyeneka mi, dop uyo. Enye edi eyenete fo.+ Kûyak n̄kpọ emi afịna fi.” Ndien Tamar odụn̄ ke ufọk Absalom eyeneka esie, inyụn̄ idụkke nsan̄a ye mme owo.
21 Edidem David onyụn̄ okop kpukpru n̄kpọ emi+ ndien ayat esịt etieti.+
22 Ndien Absalom itịn̄ke baba ikọ kiet ye Amnon edide eti m̀mê idiọk; edi Absalom asua+ Amnon koro enye akasabarede Tamar eyeneka esie.
23 Edikem ke isua iba ẹma ẹkebe, Absalom enyene mme andifat erọn̄ idet+ ke Baal-hazor, emi ekperede Ephraim;+ ndien Absalom okot kpukpru nditọiren edidem+ ẹdi.
24 Ntre Absalom odụk ọkọdọhọ edidem ete: “Sese, asan̄autom fo enyene mme andifat idet erọn̄! Mbọk, yak edidem ye mme asan̄autom esie ẹsan̄a ye owo fo ẹka.”
25 Edi edidem ọbọrọ Absalom ete: “Ihih, eyen mi! Mbọk, yak okûdi kpukpru nnyịn itiene fi ika mbak nnyịn ididi mbiomo inọ fi.” Okposụkedi enye ọsọn̄ọde eyịre,+ edidem inyịmeke nditiene n̄ka, edi ọdiọn̄+ enye.
26 Ke akpatre Absalom ọdọhọ ete: “Edieke afo mûdịghe, mbọk, yak Amnon eyenete mi asan̄a ye nnyịn aka.”+ Ntem edidem obụp enye ete: “Ntak emi enye akpasan̄ade ye afo aka?”
27 Ndien Absalom ọsọn̄ọ eyịre+ enye, tutu enye ọnọ Amnon ye kpukpru nditọiren edidem ẹsan̄a ye enye ẹka.
28 Ndien Absalom owụk mme asan̄autom esie ete: “Mbọk, mbufo ẹtịm ẹse, ke ndondo oro wine anamde esịt adat Amnon,+ nyọdọhọ mbufo nte, ‘Ẹwot Amnon!’ Do, mbufo ẹnyene ndiwot enye. Ẹkûfehe ndịk.+ Nte idịghe ami n̄wụk mbufo? Mbufo ẹkop odudu ẹnyụn̄ ẹnyene uko.”
29 Ndien mme asan̄autom Absalom ẹnam ye Amnon kpa nte Absalom okowụkde mmọ;+ ndien kpukpru nditọiren edidem eken ẹdaha ke enyọn̄, mmọ kiet kiet ẹnyụn̄ ẹdọk mule mmọ ẹfen̄e.
30 Edikem ke adan̄aemi mmọ ẹsụk ẹkade ke usụn̄, etop ekesịm David, ete: “Absalom omowot kpukpru nditọiren edidem, baba owo mmọ kiet ibọhọke.”
31 Ntem edidem adaha ke enyọn̄, awak edisịnen̄kpọ esie+ onyụn̄ osụhọde ana ke isọn̄,+ ndien kpukpru mme asan̄autom esie emi ẹdade ẹkpere, ẹwak ọfọn̄idem+ mmọ.
32 Nte ededi, Jehonadab+ eyen Shimeah,+ eyeneka David, ọbọrọ onyụn̄ ọdọhọ ete: “Yak ọbọn̄ mi okûkere ke kpukpru n̄kparawa nditọ edidem ke ẹwot, koro edi Amnon kpọt akpa,+ koro Absalom ọkọnọde uyo ete ẹwot enye, ndien emi etie nte n̄kpọ emi enye akaduakde-duak enịm+ toto ke usen emi Amnon ekesuenede+ Tamar eyeneka esie.+
33 Ndien ke emi yak ọbọn̄ mi edidem okûkop ikọ emi ẹtịn̄de, ẹte, ‘Kpukpru nditọiren edidem ẹmekpan̄a’; koro edi Amnon kpọt akpa.”
34 Ndien Absalom efehe.+ Ekem, akparawa kiet, owo ukpeme,+ emenede enyịn okụt, ndien, sese! ediwak owo ke ẹto ke n̄kan̄ obot emi odude enye ke edem ẹdi.
35 Ndien Jehonadab+ ọdọhọ edidem ete: “Sese! Nditọiren edidem ẹmedụk ẹdi. Emi edi kpa nte asan̄autom fo eketịn̄de.”+
36 Edikem ke ndondo oro enye osụk okụrede nditịn̄ n̄kpọ emi, sese nditọiren edidem ẹdụk ẹdi, ndien mmọ ẹmenede uyo ẹtua eyet; ndien edidem ye kpukpru mme asan̄autom esie ẹtua eyet ata etieti.
37 Edi Absalom efehe ebịne Talmai+ eyen Ammihud kpa edidem Geshur.+ Ndien David atua+ eyen esie kpukpru usen.
38 Ndien Absalom efehe ekesịm Geshur;+ enye onyụn̄ odu do isua ita.
39 Ekem, ọdọn̄ ukpọn̄ David ndikụt Absalom; koro enye ama ọkọdọn̄ idemesie esịt aban̄a Amnon oro ama akakpa.
