2 Samuel 21;1-22
21 Ekem akan̄+ odu ke eyo David ke ofụri isua ita; ndien David oyom iso Jehovah. Ndien Jehovah ọdọhọ enye ete: “Saul ye ufọk esie ẹnyene ubiomikpe iyịp, koro enye okowotde mbon Gibeon.”+
2 Ntre edidem okot mbon Gibeon+ onyụn̄ enyene nneme ye mmọ. (Nte ededi, mbon Gibeon ikedịghe nditọ Israel, edi ẹkedi nsụhọ mme Amorite;+ ndien nditọ Israel ẹma ẹn̄wọn̄ọ ẹte mmimọ idiwotke mmọ,+ edi Saul ama oyom ndiwot+ mmọ koro enye ekefịbede ufụp+ ọnọ nditọ Israel ye Judah.)
3 Ndien David obụp mbon Gibeon ete: “Nso ke ndinam nnọ mbufo, nso ke ndinyụn̄ nda nsio isop,+ man mbufo ẹdiọn̄ udeme+ Jehovah?”
4 Ntre mbon Gibeon ẹbọrọ enye ẹte: “Ikọ emi inyenede ye Saul ye mbonufọk esie idịghe ikọ silver m̀mê gold+ inyụn̄ idịghe nnyịn ndiwot owo ke Israel.” Ntem David ọdọhọ ete: “Nyanam se ededi oro mbufo ẹdọhọde nnọ mbufo.”
5 Ntem mmọ ẹbọrọ edidem ẹte: “Owo oro okosobode+ nnyịn okonyụn̄ aduakde+ ndisọhi nnyịn mfep man ikûdu ke obio Israel ekededi,
6 yak ẹnọ nnyịn irenowo itiaba ke otu nditọ esie;+ ndien nnyịn iyeyịri+ mmọ inọ Jehovah ke Gibeah+ obio Saul emi Jehovah ekemekde.”+ Ndien edidem ọbọrọ ete: “Ami mmọn̄ nyak mmọ nnọ mbufo.”
7 Edi, mbọm Mephibosheth,+ eyen Jonathan kpa eyen Saul, anam edidem ke ntak un̄wọn̄ọ+ oro David ye Jonathan eyen Saul ẹkedade enyịn̄ Jehovah ẹn̄wọn̄ọ.
8 Ntem edidem emen nditọiren iba emi Rizpah+ eyen Aiah akamande ọnọ Saul, kpa Armoni ye Mephibosheth, ye nditọiren ition emi Michal*+ eyen Saul akamande ọnọ Adriel+ eyen Barzillai owo Meholath.
9 Ekem enye ayak mmọ esịn mbon Gibeon ke ubọk, ndien ẹyịri mmọ ke obot ke iso Jehovah,+ ndien mmọ mbitiaba ẹduọn̄ọ ọtọkiet; ndien ẹwot mmọ ke akpa usen ini ukpen̄e, ke ntọn̄ọ ini ukpen̄e barley.+
10 Ndien Rizpah eyen Aiah+ emen ọfọn̄ ntuan̄a+ ekebri ke enyọn̄ itiat ọnọ idemesie ke ntọn̄ọ ini ukpen̄e tutu mmọn̄ oto enyọn̄ edep ọbọn̄ mme okpo emi;+ enye inyụn̄ iyakke mme inuen+ enyọn̄ ẹsọrọ ke mme okpo emi ke uwemeyo inyụn̄ iyakke mme unam ikọt+ ẹta mme okpo emi ke okoneyo.
11 Ekem ẹketịn̄+ ẹnọ David se Rizpah eyen Aiah, n̄wanesa Saul anamde.
12 Ntre David adaha ọkọbọ mme enyene-isọn̄ Jabesh-gilead+ ọkpọ Saul+ ye ọkpọ Jonathan eyen esie emi mmọ ẹkeyịpde ke an̄wa Beth-shan,+ ke ebiet emi mbon Philistia ẹkeyịride+ mmọ ke usen oro mbon Philistia ẹkewotde Saul ke Gilboa.+
13 Ndien enye atan̄ ọkpọ Saul ye ọkpọ Jonathan eyen esie do ọdọk; mmọ ẹnyụn̄ ẹtan̄ ọkpọ mbon oro ẹkeyịride.+
14 Ndien mmọ ẹbụk ọkpọ Saul ye eke Jonathan eyen esie ke isọn̄ Benjamin ke Zela+ ke ebiet emi ẹkebụkde Kish+ ete esie, man mmọ ẹnam kpukpru se edidem okowụkde. Ke n̄kpọ emi ama ekebe, Abasi okop n̄kpeubọk oro ẹkpede enye ẹban̄a isọn̄ oro.+
15 Ekem mbon Philistia+ ẹtọn̄ọ ntak ẹn̄wana ekọn̄ ye Israel. Ndien David asan̄a ye ikọt esie osụhọde akan̄wana ye mbon Philistia; idem onyụn̄ emem David.
16 Ndien Ishbi-benob, emi ekesịnede ke otu mbon oro ẹkemanade ẹnọ nditọ Rephaim,+ emi udobi eduat+ esie ekedide shekel okpoho ikie ita, emi okonyụn̄ ọbọbọde obufa akan̄kan̄, aduak ndiwot David.
17 Inikiet inikiet, Abishai+ eyen Zeruiah edi edin̄wam+ David onyụn̄ ọtọ owo Philistia oro owot. Ekem, ikọt David ẹn̄wọn̄ọ ẹnọ enye ẹte: “Afo udutieneke nnyịn aba uka ekọn̄,+ mbak udunịme+ utuenikan̄+ Israel!”
18 Edikem ke n̄kpọ emi ama ekebe, ẹtọn̄ọ ntak ẹn̄wana ekọn̄ ye mbon Philistia ke Gob. Adan̄aoro ke Sibbecai+ owo Hushah+ okowot Saph, emi ekesịnede ke otu mbon oro ẹkemanade ẹnọ nditọ Rephaim.+
19 Ekem ẹtọn̄ọ ntak ẹn̄wana ekọn̄ ye mbon Philistia ke Gob, ndien Elhanan+ eyen Jaare-oregim owo Bethlehem owot Goliath owo Gath, emi eto eduat esie ebietde eto mme ọdọk-ọfọn̄.+
20 Ndien ẹtọn̄ọ ntak ẹn̄wana ekọn̄ ke Gath,+ ke ini ata anyan owo kiet okodude, emi ekenyenede nnuenubọk itiokiet itiokiet ye nnuenukot itiokiet itiokiet, kpukpru ẹdide edịp ye inan̄; ndien enye n̄ko akamana ọnọ nditọ Rephaim.+
21 Ndien enye osụn̄i+ Israel. Ekem Jonathan+ eyen Shimei,+ eyeneka David, owot enye.
22 Owo mbinan̄ emi ẹkemana ẹnọ nditọ Rephaim ke Gath;+ ndien mmọ ẹduọn̄ọ ke ubọk David ye ke ubọk mme asan̄autom esie.+
