2 Samuel 24;1-25
24 Ndien Jehovah ọtọn̄ọ ntak+ ayat esịt ye Israel ke ini owo* okonụkde David ada afanikọn̄ ọsọk mmọ ke ndidọhọ enye ete: “Ka kabat+ Israel ye Judah.”
2 Ntre edidem ọdọhọ Joab+ etubom udịmekọn̄ emi odude ye enye ete: “Mbọk, ẹsan̄a ke ofụri Israel, ọtọn̄ọde ke Dan tutu esịm Beer-sheba,+ ẹnyụn̄ ẹsịn mme owo enyịn̄ ke n̄wed,+ man mfiọk ibat owo.”+
3 Edi Joab ọdọhọ edidem ete: “Jehovah Abasi fo akpakam anam mbon emi ẹwak utịm ike-ikie ẹkan nte mmọ ẹwakde man ọbọn̄ mi ada enyịn esie okụt. Edi ntak emi n̄kpọ emi enemde ọbọn̄ mi ndinam?”+
4 Ekem edidem etịn̄ ikọ akan+ Joab ye mme etubom udịmekọn̄ inua. Ntre Joab ye mme etubom udịmekọn̄ ẹwọn̄ọ ke iso edidem ẹka ndisịn mbon Israel enyịn̄ ke n̄wed.+
5 Ekem mmọ ẹbe akpa Jordan ẹnyụn̄ ẹkenam nna ke Aroer+ ke n̄kan̄ nnasia obio oro, emi odude ke ufọt itịghede mmọn̄, emi akade edem nditọ Gad+ ye Jazer.+
6 Ke oro ebede, mmọ ẹdi ke Gilead+ ye isọn̄ Tahtim-hodshi, ndien ẹbe ẹka Dan-jaan ẹnyụn̄ ẹwọn̄ọde ẹkesịm Sidon.+
7 Ekem mmọ ẹdisịm ebiet ubọhọ ke Tyre+ ye kpukpru mme obio mbon Hivite+ ye eke mbon Canaan, ẹnyụn̄ ẹdisịm akpatre itie isan̄ mmọ ke Beer-sheba+ ke Negeb+ ke Judah.
8 Ntem mmọ ẹsan̄a ẹkanade ofụri isọn̄ oro ẹnyụn̄ ẹdisịm Jerusalem ke utịt ọfiọn̄ usụkkiet ye usen edịp.
9 Ndien Joab ọnọ edidem ibat mbon oro ẹkesịnde enyịn̄ ke n̄wed;+ ndien mbon uko Israel emi ẹkamade akan̄kan̄ ẹwak ẹsịm owo tọsịn ikie itiaita, irenowo Judah ẹnyụn̄ ẹdi owo tọsịn ikie ition.+
10 Ndien esịt obiom+ David ke enye ama akabat mme owo ama. Ndien David ọdọhọ Jehovah ete: “Ami mmanam akwa idiọkn̄kpọ+ ke se n̄kanamde oro. Mbọk, ke emi, Jehovah fen ndudue+ asan̄autom fo; koro ami mmanam ata ndisịme.”+
11 Ke ini David adahade ada ke usenubọk, uyo Jehovah esịm prọfet Gad,+ owo n̄kukụt+ David, ete:
12 “Ka kọdọhọ David, ete, ‘Ntem ke Jehovah ọdọhọ ete: “Nnịm fi n̄kpọ ita ke iso.+ Mek kiet ke otu mmọ man nnam fi.”’”+
13 Ntem Gad odụk edisian David onyụn̄ ọdọhọ enye ete:+ “Ndi oyom akan̄ isua itiaba omụm isọn̄ fo,+ m̀mê emek ndifehe ke iso mme asua fo, ndien mmọ ẹbịne fi ke ọfiọn̄ ita,+ m̀mê oyom idiọk udọn̄ọ ọnọmọ isọn̄ fo ke usen ita?+ Ke emi, kere nyụn̄ tịn̄ se ndibọrọde Enye emi ọdọn̄de mi.”
14 Ntre David ọdọhọ Gad ete: “Edi ata n̄kpọ mfụhọ ọnọ mi. Mbọk, ẹyak nnyịn iduọ idụk ubọk Jehovah,+ koro enye awakde mbọm;+ edi kûyak nduọ ndụk ubọk owo.”+
15 Ekem Jehovah anam idiọk udọn̄ọ+ ọnọmọ Israel ọtọn̄ọde ke usenubọk tutu esịm ini emi ẹkenịmde, ndien owo tọsịn ata ye duop ẹkpan̄a ke ofụri Dan tutu esịm Beer-sheba.+
16 Ndien angel+ anyan ubọk ke Jerusalem man osobo enye; edi Jehovah okop mbọm*+ ke ntak afanikọn̄ emi, ntre enye ọdọhọ angel oro ekesịnde nsobo ke otu mme owo ete: “Ekem adan̄aoro! Ndien, ke emi, sụk ubọk fo ke isọn̄.” Ndien angel Jehovah oro ada ekpere ọtọ udịghi wheat Araunah+ owo Jebus.+
17 Ndien ke ini David okụtde angel oro okowotde mme owo, enye ọdọhọ Jehovah ete: “Sese, ami n̄kanam idiọkn̄kpọ, ami n̄konyụn̄ nnam se ikwan̄ade; edi nso ke mme erọn̄+ emi ẹnam? Mbọk, yak ubọk fo odoro mi+ ye ufọk ete mi.”
18 Ekem Gad edi edidọhọ David ke usen oro ete: “Daha ke enyọn̄, kowụk itieuwa nọ Jehovah ke ọtọ udịghi wheat Araunah owo Jebus.”+
19 Ndien David ọdọk aka kpa nte Gad ọkọdọhọde, nte ekemde ye se Jehovah okowụkde enye.+
20 Ke ini Araunah osụkde enyịn ada okụt edidem ye mme asan̄autom esie ẹsan̄ade ẹbịne enye, Araunah ọsọsọp ọwọrọ okonụhọ+ ọnọ edidem onyụn̄ ekịbi iso ke isọn̄.+
21 Ekem Araunah obụp ete: “Ntak emi ọbọn̄ mi edide ebịne asan̄autom esie?” Ndien David ọbọrọ ete: “Ndi man ndidep+ ọtọ udịghi wheat nda mbọp itieuwa nnọ Jehovah, man ẹnam ufen+ emi ọkpọn̄ mbon emi.”
22 Edi Araunah ọdọhọ David ete: “Yak ọbọn̄ mi edidem ada+ onyụn̄ awa se ifọnde enye ke enyịn. Sese enan̄ do ndida mfọp uwa ye n̄kpọ udịghi wheat ye mme n̄kpọ ukpeme enan̄ ndida nnam ifia.+
23 O edidem, Araunah ọmọnọ edidem kpukpru n̄kpọ.” Araunah onyụn̄ ọdọhọ edidem ete: “Jehovah Abasi fo akpakam enem esịt ye afo.”+
24 Edi, edidem ọdọhọ Araunah ete: “Ihih, ami nditreke-tre ndidep enye nto fi ke ekọmurua;+ ndinyụn̄ n̄waha edifọp uwa nnọ Jehovah Abasi mi ke mmen̄kpehe okụk.”+ Ntem David edep+ ọtọ udịghi wheat oro ye enan̄ ke shekel silver aba ye duop.
25 Ndien David anam itieuwa+ do ọnọ Jehovah onyụn̄ awa edifọp uwa ye uwa ebuana, ndien Jehovah okop n̄kpeubọk+ aban̄a isọn̄ oro, ndien ufen oro etre ke Israel.
