2 Samuel 3;1-39
3 Ndien ufọk Saul ye ufọk David ẹn̄wana ekọn̄ ẹbịghi;+ ndien David ọdọdiọn̄ okop odudu,+ edi ufọk Saul etetịm emem.+
2 Ke ini emi, nditọiren+ ẹmana ẹnọ David ke Hebron,+ ndien akpan esie edi Amnon+ emi Ahinoam+ n̄wan emi otode Jezreel akamande.
3 Ndien udọ esie edi Chileab+ emi Abigail+ n̄wan Nabal owo Carmel akamande, ọyọhọ ita edi Absalom+ emi Maachah eyen Talmai+ edidem Geshur akamande.
4 Ọyọhọ inan̄ edi Adonijah+ eyen Haggith,+ ndien ọyọhọ ition edi Shephatiah+ eyen Abital.
5 Ndien ọyọhọ itiokiet edi Ithream+ emi Eglah n̄wan David akamande. Mmọ emi ẹkemana ẹnọ David ke Hebron.
6 Edikem ke adan̄aemi ufọk Saul ye ufọk David ẹsụk ẹn̄wanade ekọn̄, Abner+ etetịm ọsọn̄ọ itie esie ke ufọk Saul.
7 Ndien Saul ama enyene n̄wanesa emi ekerede Rizpah,+ eyen Aiah.+ Ekem Ish-bosheth+ obụp Abner ete: “Ntak emi afo ekenyenede ebuana ye n̄wanesa+ ete mi?”
8 Ndien Abner ayat esịt+ etieti aban̄a ikọ Ish-bosheth, onyụn̄ ọdọhọ ete: “Ndi ami ndi ibuot ebua+ nnọ Judah? Mmowụt ima-mfọnido mfịn emi nnọ ufọk Saul ete fo, ye nditọete esie, ye mme n̄kpet n̄kpet ufan esie, nnyụn̄ nyakke fi nsịn David ke ubọk; ndien afo odori mi ikọ mfịn emi aban̄a n̄wan.
9 Abasi akpakam anam ntem ye ami Abner onyụn̄ ọdọdiọn̄ anam,+ edieke mmenamke ye David kpa nte Jehovah ọkọn̄wọn̄ọde+ ọnọ enye,
10 ndimen ubọn̄ mfep ke ufọk Saul nnyụn̄ n̄wụk ebekpo David ke Israel ye ke Judah ọtọn̄ọde ke Dan tutu esịm Beer-sheba.”+
11 Enye inyụn̄ ikemeke ndibọrọ Abner baba ikọ kiet efen koro okopde ndịk aban̄a enye.+
12 Ntem Abner ọdọn̄ mme isụn̄utom ọnọ David kpa ke ebe oro, ete: “Anie enyene obio emi?” onyụn̄ adian do ete: “Nam ediomi ye ami, ndien, sese! ami nyadiana ye afo nnam ofụri Israel ẹkabade ẹda ye afo.”+
13 Ndien enye ọdọhọ ete: “Ọfọn! Ami nyanam ediomi ye afo. N̄kukụre se nyomde nto fi edi, ‘Afo udukwe mi iso ibọhọke afo+ ebem iso ada Michal+ eyen Saul edi, ke adan̄aemi afo edidide ndikụt mi.’”
14 N̄ko, David ọdọn̄ mme isụn̄utom ọnọ Ish-bosheth,+ eyen Saul, ete: “Nọ Michal n̄wan mi ẹsọk mi, emi n̄kadade edụt mbon Philistia ikie+ ndọ.”
15 Ntre Ish-bosheth ọdọn̄ ẹkebọ enye ke ubọk ebe esie, Paltiel+ eyen Laish, ẹdi.
16 Edi ebe esie osụk asan̄a ye enye, atua etiene enye ke edem tutu edisịm Bahurim.+ Ndien Abner ọdọhọ enye ete: “Fiak nyọn̄!” Ndien enye afiak ọnyọn̄.
17 Mbemiso ini oro, Abner ama enyenyene nneme ye mbiowo Israel, ete: “N̄kpọn̄ emi ekebede ye mbemiso oro,+ mbufo ẹma ẹyoyom David edi edidem mbufo.
18 Ndien ke emi, mbufo ẹnam n̄kpọ koro Jehovah ama ọdọhọ David ete, ‘Ndida ubọk David+ kpa asan̄autom mi nnyan̄a ikọt mi Israel nsio ke ubọk mbon Philistia ye ke ubọk kpukpru mme asua mmọ.’”
19 Ndien Abner etịn̄ n̄ko ọnọ mbon Benjamin,+ ekem enye emen kpukpru se Israel ye ofụri ufọk Benjamin ẹmade eketịn̄ ọnọ David ke Hebron.
20 Ke ini Abner asan̄ade ye irenowo edịp edisịm David ke Hebron, David esịn usọrọ+ ọnọ Abner ye irenowo emi ẹsan̄ade ye enye.
21 Ndien Abner ọdọhọ David ete: “Yak n̄ka n̄kanam ofụri Israel ẹsop idem ọtọkiet ẹnọ ọbọn̄ mi edidem, man mmọ ẹnam ediomi ye afo, ndien afo eyedi edidem ọnọ kpukpru mbon emi ọdọn̄de ukpọn̄ fo.”+ Ntre David osio Abner unyọn̄, enye onyụn̄ ọnyọn̄ ke emem.+
22 Ndien, sese! ikọt David, ye Joab ẹtode ekọn̄ ẹnyọn̄ ẹdi mi, mmọ ẹnyụn̄ ẹda ediwak n̄kpọ mbụme+ ẹnyọn̄ ẹdi. Edi Abner ikodụhe ye David ke Hebron, koro David ama osio enye unyọn̄, enye ama onyụn̄ ọnyọn̄ ke emem.
23 Ndien Joab+ ye ofụri udịmekọn̄ emi ẹdude ye enye ẹnyọn̄ ẹdi, mmọ ẹnyụn̄ ẹtịn̄ ẹnọ Joab, ẹte: “Abner+ eyen Ner+ ama edi ebịne edidem, ndien edidem osio enye unyọn̄ ke emem, enye ke ọnyọn̄ esie ke emem.”
24 Ntre Joab aka okobụp edidem ete: “Nso ke afo anam emi?+ Sese! Abner ama edi ebịne fi. Ntak emi afo okosiode enye unyọn̄ ke emem?
25 Afo emetịm ọfiọk Abner eyen Ner, ete ke enye ekedi man edibian̄a fi onyụn̄ ọfiọk ediwọrọ fo ye edidụk+ fo ye kpukpru se afo anamde.”+
26 Mmọdo Joab ọwọrọ ọkpọn̄ David, onyụn̄ ọdọn̄ mme isụn̄utom ẹbịne Abner, ndien mmọ ẹkesịm enye ke obube udọn̄ mmọn̄ Sirah ẹda enye ẹfiak ẹdi;+ edi David ifiọkke iban̄a n̄kpọ emi.
27 Ke ini Abner afiakde edisịm Hebron,+ Joab ada enye ebe odụk inuaotop, esịk akada, etịn̄ ikọ ye enye ke sụn̄sụn̄ uyo.+ Ndien enye ekịm Abner idịbi,+ enye onyụn̄ akpa ke usiene iyịp Asahel+ eyeneka esie.
28 Ekem ke ndondo oro David okopde n̄kpọ emi, enye ọdọhọ ete: “Ami ye obio ubọn̄ mi imasana ke iso Jehovah ibọhọ ubiomikpe iyịp+ Abner eyen Ner ke nsinsi.
29 Yak iyịp esie akabade ọkọbọ+ Joab ye ofụri ufọk ete esie, yak eren emi n̄kpọ ọwọrọde enye ke idem+ m̀mê owo akpamfia+ m̀mê eren emi ọfiọkde sụk edikama eto ndọk n̄kpọ+ m̀mê eren emi ọduọde ke akan̄kan̄ m̀mê eren emi ananade udia+ okûtre ndidu ke ufọk Joab!”+
30 Ndien Joab ye Abishai+ eyeneka esie ẹkewot Abner+ ke ntak emi enye okowotde Asahel eyeneka mmọ ke ekọn̄ ke Gibeon.+
31 Ekem David ọdọhọ Joab ye kpukpru owo oro ẹdude ye enye ete: “Ẹwak ọfọn̄idem mbufo+ ẹnyụn̄ ẹsịne ọfọn̄ ntuan̄a+ ẹnyụn̄ ẹtua Abner.” Edidem David onyụn̄ asan̄a etiene ubiomokpo ke edem.
32 Ndien mmọ ẹkebụk Abner ke Hebron; edidem onyụn̄ emenede uyo esie atua eyet ke ebiet emi ẹbụkde Abner, kpukpru owo ẹnyụn̄ ẹtuan̄a.+
33 Ndien edidem ọkwọ ikwọ aban̄a Abner ete:“Nte Abner ekpenyene ndikpa nte owo emi ananade ibuot?+
34 Owo ikọbọpke fi ubọk,+Owo ikonyụn̄ idọn̄ke fi ebuka okpoho ke ukot.+Ndien afo ọmọduọ ke ubọk nditọ ukwan̄ido.”+Ntem kpukpru owo ẹtọn̄ọ ntak ẹtua+ enye.
35 Ekem kpukpru owo ẹdi ndinọ David uyo+ ndọn̄esịt ke usen oro, edi David ọn̄wọn̄ọ ete: “Yak Abasi anam ntem ye ami+ onyụn̄ ọdọdiọn̄ anam, edieke ami nditabide uyo m̀mê n̄kpọ ekededi mbemiso utịn osopde!”+
36 Ndien kpukpru owo ẹkụt, emi onyụn̄ ọfọn mmọ ke enyịn. Kpa nte edide ye kpukpru se edidem anamde, emi onyụn̄ ọfọn ke enyịn kpukpru owo.+
37 Ntem kpukpru owo ye ofụri Israel ẹdifiọk ke usen oro ẹte ke idịghe edidem akanam ẹwot Abner eyen Ner.+
38 Ndien edidem ọdọhọ mme asan̄autom esie ete: “Nte mbufo ifiọkke ite ke ọbọn̄ ye akwa owo ọduọ emi ke Israel mfịn emi?+
39 Ndien idem emem mi mfịn emi okposụkedi ẹkeyetde mi aran+ nte edidem, ndien iren emi, kpa nditọ Zeruiah,+ ẹsọn̄ ido ẹkan nte n̄kemede ndiyọ.+ Jehovah akpakam osio anamidiọk usiene idiọkn̄kpọ esie.”+
