2 Samuel 8;1-18
8 Ndien edikem David an̄wana ye mbon Philistia+ onyụn̄ akan mmọ,+ David onyụn̄ ọbọ Metheg-ammah ke ubọk mbon Philistia.
2 Ndien enye owot mbon Moab+ onyụn̄ ada urụk odomo mmọ, anam mmọ ẹsụhọde ẹna ke isọn̄, man enye okpodomo urụk iba emi enye ediwotde, onyụn̄ odomo urụk kiet emi enye edinịmde uwem;+ ndien mbon Moab ẹkabade ẹdi mme asan̄autom David+ emi ẹkpede utomo.+
3 Ndien David owot Hadadezer+ eyen Rehob kpa edidem Zobah+ nte enye akade nditọn̄ọ ntak nsọn̄ọ odudu esie ke Akpa Euphrates.+
4 Ndien David ọbọ enye mme awat enan̄-mbakara tọsịn kiet ikie itiaba ye owo tọsịn edịp emi ẹsan̄ade ke ukot;+ David onyụn̄ okpok akpan esịp+ ke kpukpru enan̄-mbakara chariot,+ edi enye osụhọ enan̄-mbakara chariot ikie ke otu mmọ.
5 Ke ini Syria eke Damascus+ edide ndin̄wam Hadadezer edidem Zobah, David owot mbon Syria owo tọsịn edịp ye iba.+
6 Ndien David obon mbonekọn̄ emi ẹdade ẹkpeme+ ke Syria eke Damascus; ndien mbon Syria ẹkabade ẹdi mme asan̄autom David emi ẹkpede utomo.+ Jehovah onyụn̄ anyan̄a David ke ebiet ekededi emi enye akade.+
7 N̄ko, David atan̄ mme ekara otuekọn̄+ gold oro mme asan̄autom Hadadezer ẹkekamade edi Jerusalem.
8 Edidem David onyụn̄ atan̄ ata ediwak okpoho ke Betah ye Berothai, kpa mme obio Hadadezer.+
9 Ndien Toi edidem Hamath+ okop ke David ama akan ofụri udịmekọn̄ Hadadezer.+
10 Ntre Toi osio Joram eyen esie ọdọn̄ ke ọtọ Edidem David ete okobụp nte n̄kpọ etiede+ ye enye onyụn̄ ọkọm enye ke ndikan̄wana ye Hadadezer nnyụn̄ n̄wot enye (koro Hadadezer ọkọbọde ukpep ekọn̄ man an̄wana ye Toi); enye onyụn̄ akama mme n̄kpọ silver ye mme n̄kpọ gold ye mme n̄kpọ okpoho.+
11 Edidem David onyụn̄ anam mme n̄kpọ emi n̄ko ẹdi ndisana n̄kpọ ọnọ Jehovah ọkọrọ ye silver ye gold emi enye akanamde asana emi enye akatan̄de ke mme idụt oro enye akakande,+
12 kpa mme n̄kpọ oro enye akatan̄de ke Syria ye ke Moab,+ ye ke otu nditọ Ammon ye ke otu mbon Philistia+ ye ke Amalek,+ ọkọrọ ye mme n̄kpọ mbụme Hadadezer eyen Rehob edidem Zobah.+
13 Ndien David ọwọrọ etop ke ini enye otode ndiwot mbon Edom ke Itịghede Inụn̄+ ọnyọn̄ edi—owo tọsịn efịteta.+
14 Ndien enye obon mbonekọn̄ emi ẹdade ẹkpeme ke Edom.+ Enye obon mbonekọn̄ emi ẹdade ẹkpeme ke ofụri Edom, ndien ofụri mbon Edom ẹkabade ẹdi mme asan̄autom David;+ Jehovah onyụn̄ anyan̄a David ke ebiet ekededi eke enye akaka.+
15 Ndien David akara ke ofụri Israel;+ David onyụn̄ ekpe edinen ikpe+ ọnọ kpukpru ikọt esie.+
16 Ndien Joab+ eyen Zeruiah ekedi etubom udịmekọn̄; Jehoshaphat+ eyen Ahilud onyụn̄ edi andiwet n̄kpọ nnịm.
17 Ndien Zadok+ eyen Ahitub ye Ahimelech+ eyen Abiathar ẹkedi mme oku, Seraiah onyụn̄ edi ewetn̄wed.
18 Benaiah+ eyen Jehoiada ekedi etubom mme Cherethite+ ye mme Pelethite.+ Ndien nditọ David ẹkabade ẹdi mme oku.+
