2 Samuel 9;1-13
9 Ekem David obụp ete: “Nte odu owo emi osụhọde ke ufọk Saul, man n̄wụt enye ima-mfọnido+ ke ntak Jonathan?”+
2 Asan̄autom kiet ama odu ke ufọk Saul emi ekekerede Ziba.+ Ntre mmọ ẹkot enye ẹnọ David, ndien edidem obụp enye ete: “Ndi afo edi Ziba?” ndien enye ọbọrọ ete: “Ami ndi asan̄autom fo.”
3 Ndien edidem obụp ete: “Nte owo ndomokiet isụhọke aba ke ufọk Saul, man n̄wụt enye ima-mfọnido Abasi?”+ Ndien Ziba ọbọrọ edidem ete: “Eyen Jonathan kiet ke ododu emi edide mbụn̄ọ.”+
4 Ndien edidem obụp enye ete: “Enye odu m̀mọ̀n̄? Ntre Ziba ọbọrọ edidem ete: “Sese! Enye odu ke ufọk Machir+ eyen Ammiel ke Lo-debar.”+
5 Kpa idahaoro Edidem David ọdọn̄ ẹkeda enye ke ufọk Machir eyen Ammiel ke Lo-debar ẹdi.
6 Ke ini Mephibosheth eyen Jonathan eyen Saul odụkde edisịm David, ke ndondo oro enye ọduọ ekịbi iso ke isọn̄.+ Ndien David okot enye: “Mephibosheth!” enye onyụn̄ eyere ete: “Se asan̄autom fo mi.”
7 Ndien David ọdọhọ enye ete: “Kûkop ndịk, koro mmenditreke ndiwụt fi ima-mfọnido+ ke ntak Jonathan ete fo;+ nyonyụn̄ n̄kpọn̄ kpukpru in̄wan̄+ ete ete fo Saul nnọ fi, afo oyonyụn̄ adia udia ke okpokoro mi kpukpru ini.”+
8 Ntem enye ọduọ ke isọn̄ onyụn̄ ọdọhọ ete: “Asan̄autom fo edi anie, eke afo ọwọn̄ọrede iso ese okpo ebua+ nte ami?”
9 Ndien edidem okot Ziba, asan̄autom Saul, onyụn̄ ọdọhọ enye ete: “Mmayak kpukpru se ikenyenede Saul eteufọk fo ye ofụri ufọk esie nnọ+ eyeyen esie.
10 Ndien afo ye nditọ fo ye mme asan̄autom fo ẹyetọ in̄wan̄ ẹnọ enye, ẹnyụn̄ ẹda mbun̄wụm in̄wan̄ ẹdi, ndien emi eyedi udia ọnọ mbon oro ẹdide ikọt eyeyen eteufọk fo, mmọ ẹyenyụn̄ ẹdia; edi Mephibosheth, eyeyen eteufọk fo ayadia udia ke okpokoro mi kpukpru ini.”+
Ziba ama onyụn̄ enyene nditọiren efịt ye mme asan̄autom edịp.+
11 Ndien Ziba ọdọhọ edidem ete: “Nyanam kpukpru se ọbọn̄ mi edidem owụkde asan̄autom esie ete anam; Mephibosheth+ edinyụn̄ adia n̄kpọ ke okpokoro edidem nte kiet ke otu nditọ edidem.”
12 Ndien Mephibosheth ama enyene ekpri eyeneren kiet emi ekekerede Mica,+ ndien kpukpru mbon oro ẹdụn̄de ke ufọk Ziba ẹkedi mme asan̄autom Mephibosheth.
13 Ndien Mephibosheth okodụn̄ ke Jerusalem, koro enye akadiade udia ke okpokoro edidem kpukpru ini;+ enye okonyụn̄ edi mbụn̄ọ ke ukot mbiba.+
