2 Thessalonica 1;1-12
1 Ami Paul ye Silvanus ye Timothy+ inọ n̄wed emi ẹsọk esop mbon Thessalonica emi ẹbuanade n̄kpọ ye Abasi Ete nnyịn ye Ọbọn̄ Jesus Christ:
2 Mfọnido oro owo mîdotke ye emem emi ẹtode Abasi Ete ye Ọbọn̄ Jesus Christ ẹkpekam ẹdu ye mbufo.+
3 Nditọete, obiomo nnyịn ndinọ Abasi ekọm kpukpru ini mban̄a mbufo,+ nte odotde, koro mbuọtidem mbufo ke ọkọri+ etieti ndien ima oro kpukpru mbufo ẹmade kiet eken omokpon.+
4 Oro anam nnyịn ibụre mbụre+ iban̄a mbufo ke mme esop Abasi ke ntak ime ye mbuọtidem oro mbufo ẹnyenede ke ukọbọ ye ukụt oro mbufo ẹyọde.+
5 Emi edi uyarade edinen ubiereikpe Abasi,+ emi anamde ẹbat ẹte mbufo ẹmedot ndidụk obio ubọn̄ Abasi,+ emi mbufo ẹkụtde ndutụhọ ẹban̄a.+
6 Emi ọwọrọ ke enen Abasi ndida ukụt nsio mbon oro ẹnamde mbufo ẹkụt ukụt usiene,+
7 ndinyụn̄ nda nduọkodudu nnọ mbufo emi ẹkụtde ukụt ye nnyịn ke ediyarade+ Ọbọn̄ Jesus emi editode heaven edi ye mme okopodudu angel esie+
8 ke ikan̄ eke asakde, nte enye adade usiene+ ọsọk mmọ eke mîfiọkke Abasi+ ye mmọ eke mîsụkke ibuot+ inọ eti mbụk Ọbọn̄ nnyịn Jesus.+
9 Mmọ emi ẹyebọ ufen+ nsinsi nsobo+ ke iso Ọbọn̄ ye ubọn̄ ubọn̄ ukeme esie,+
10 ke ini enye edide ndida ubọn̄ ye ndisana ikọt esie,+ ndien ke usen oro kpukpru mmọ oro ẹbuọtde idem ẹyese enye ke n̄kpaidem, koro mbufo ẹma ẹbuọt idem ke ikọ ntiense oro nnyịn ikọnọde.
11 Ke ntak emi, nnyịn imesibọn̄ akam kpukpru ini iban̄a mbufo, ite Abasi nnyịn akpakam abat ete mbufo ẹmedot ikot esie+ onyụn̄ ada odudu esie okụre kpukpru nti ido ye utom mbuọtidem eke ẹnemde enye esịt:
12 man ẹkpenọ enyịn̄ Ọbọn̄ nnyịn Jesus ubọn̄ ke idem mbufo,+ ẹkpenyụn̄ ẹnọ mbufo ubọn̄+ ye enye, nte asan̄ade ekekem ye mfọnido Abasi nnyịn oro owo mîdotke+ ye eke Ọbọn̄ Jesus Christ.
