3 John 1;1-14
1 Ami ebiowo+ n̄wet n̄wed emi nnọ ẹsọk edima Gaius, emi mmade etieti.+
2 Edima,+ mbọn̄ akam nte n̄kpọ ọfọn+ ye afo ke kpukpru usụn̄, afo onyụn̄ okop nsọn̄idem,+ kpa nte ọfọnde ye afo ke ukpọn̄.+
3 Koro mma n̄kop idatesịt etieti ke ini nditọete ẹkedide ẹditie ntiense ẹban̄a akpanikọ oro afo omụmde akama, kpa nte afo akade iso asan̄a ke akpanikọ.+
4 Nnyeneke ntak eke okponde akan emi ndiwụt esịtekọm, nte ndikop ke nditọ mi ke ẹsasan̄a ke akpanikọ.+
5 Edima, afo ke anam utom akpanikọ ke se ededi oro afo anamde ọnọ nditọete,+ emi ẹdide isenowo,+
6 emi ẹtịn̄de ikọ ntiense ẹnọ esop ẹban̄a ima fo. Mbọk sio mmọ emi unyọn̄ ke ido nte odotde ke iso Abasi.+
7 Koro mmọ ẹkewọn̄ọ ke ntak enyịn̄ Abasi, inyụn̄ ibọhọ mbon idụt n̄kpọ ndomokiet.+
8 Ke ntre, nnyịn inyene ndidara utọ mbon emi esen,+ man nnyịn ikpakabade idi nsan̄autom ke akpanikọ.+
9 Mma n̄wet n̄kpọ nnọ ẹsọk esop, edi Diotrephes, emi amade ndidi ebeiso+ ke otu mmọ, ibọhọ n̄kpọ ekededi+ eke otode nnyịn ye ukpono.+
10 Ntak edi oro, edieke ami ndide, nyanam ẹti mme utom eke enye anamde,+ nte enye asan̄ade akprak inua etịn̄ ndiọi ikọ adian nnyịn.+ N̄ko, sia emi mîkemke enye, enye ke idemesie inyụn̄ idarake nditọete+ ye ukpono, ndien mbon oro ẹyomde ndidara+ mmọ, enye odomo ndibiọn̄ọ+ mmọ nnyụn̄ mbịn mmọ nsion̄o+ ke esop.
11 Edima, kûkpebe se idiọkde, edi kpebe se ifọnde.+ Owo eke anamde se ifọnde oto Abasi.+ Edi owo eke anamde se idiọkde ikwe Abasi.+
12 Kpukpru+ mmọ ẹma ẹtie ntiense ẹban̄a Demetrius, akpanikọ ke idemesie etie ntiense n̄ko. Nnyịn n̄ko ke itie ntiense,+ ndien afo ọmọfiọk ete ikọ ntiense oro inọde edi akpanikọ.+
13 Mma nnyene ediwak n̄kpọ ndiwet nnọ fi, edi nyomke ndisụk nda mmọn̄n̄wed ye eton̄wed n̄wet.+
14 Edi mmodori enyịn ndikụt fi ke mîbịghike, ndien nnyịn iyetịn̄ ikọ iso ye iso.+
Emem akpakam odu ye afo.+
Nditọete ẹte n̄kọm fi.+ Kọm+ nditọete kiet kiet nọ mi.
