Mme N̄ke 24;1-34
24 Kûfịbe mme idiọkowo ufụp,+ kûnyụn̄ uyak ọdọn̄ fi ndidu ye mmọ.+
2 Koro esịt mmọ osụk etie ekere ndibụme mbụme, n̄kpọkinua mmọ onyụn̄ etịn̄ afanikọn̄.+
3 Ẹda ọniọn̄ ẹbọp ufọk,+ ẹnyụn̄ ẹda mbufiọk ẹnam enye ọsọn̄ọ ada.+
4 Ndien ẹda ifiọk ẹdọn̄ kpukpru ọsọn̄urua n̄kpọ ye nti n̄kpọ emi ẹnyenede ufọn ẹyọhọ mme ubet esie.+
5 Owo eke adade odudu esie anam n̄kpọ ke ọniọn̄ okop odudu,+ owo eke onyụn̄ enyenede ifiọk ọsọn̄ọ odudu+ esie.
6 Koro eti ndausụn̄ ke afo edida an̄wana ekọn̄ fo,+ ndien edinyan̄a odu ke ini mme ọnọitem ẹwakde.+
7 Ata ọniọn̄ okokon̄ akaha ọnọ ndisịme owo;+ enye iditatke inua esie ke inuaotop.
8 Amaedi owo ekededi emi aduakde ndinam idiọk, ẹdikot enye etubom ndiọi uduak.+
9 Obukpo ido ndisịme owo edi idiọkn̄kpọ,+ ndien ubonowo ẹse asak-nsahi ke mbubiam.+
10 Nte idem emem fi ke usen nnanenyịn?+ Odudu fo oyosụhọde.
11 Nyan̄a mbon oro ẹtan̄de ẹka ndiwot; ndien amaedi mbon oro ẹfụmde ẹka n̄kpa, mbọk nyan̄a mmọ.+
12 Edieke afo ọdọhọde ete: “Sese! Nnyịn ikọfiọkke emi,”+ nte enye emi odomode esịt idifiọkke,+ nte enye emi esede ukpọn̄ fo idifiọkke,+ idinyụn̄ inọhọ owo utịp nte ekemde ye edinam esie?+
13 Eyen mi, dia aranọkwọk, koro enye ọfọnde; ndien yak obukpa ọkwọk enịn̄e fi ke nsịn̄.+
14 Kpasụk ntre, nyene ọniọn̄ ke ufọn ukpọn̄ fo.+ Edieke afo okụtde enye, afo eyenyene ini iso, ndien owo idisịbeke idotenyịn fo ifep.+
15 Kûdịbe nte idiọkowo ubet ke ebietidụn̄ edinen owo;+ kûbiat ebiet nduọkodudu esie.+
16 Koro edinen owo ekeme ndiduọ utịm ikatiaba, onyụn̄ adaha ada;+ edi afanikọn̄ ayanam mme idiọkowo ẹtuak ukot ẹduọn̄ọ.+
17 Kûdara ke ini asua fo ọduọde; kûnyụn̄ udat esịt ke ini ẹnamde enye atuak ukot ọduọ,+
18 mbak Jehovah edikụt emi ndien ọdiọk enye ke enyịn tutu enye ọwọn̄ọde iyatesịt esie ọkpọn̄ enye.+
19 Kûyat esịt uban̄a mme anamidiọk. Kûfịbe mme idiọkowo ufụp.+
20 Koro ini iso mîdụhe inọ idiọkowo ekededi;+ ẹyenịme utuenikan̄ mme idiọkowo.+
21 Eyen mi, bak Jehovah nyụn̄ bak edidem.+ Kûbuak idem ye mbon nsọn̄ibuot.+
22 Koro afanikọn̄ mmọ editịbe ke mbuari,+ ndien anie ọfiọk nsobo oro edisịmde mbon nsọn̄ibuot?+
23 Mme ikọ emi n̄ko ẹnyene mbon ọniọn̄:+ Ifọnke ndinam asari ke ikpe.+
24 Owo eke ọdọhọde idiọkowo ete: “Afo edi edinen,”+ mme owo ẹyesụn̄i enye, mme idụt ẹyekan̄ enye.
25 Edi ọyọfọn ye mmọ eke ẹsuade ẹnọ enye,+ ndien ẹyeda eti n̄kpọ ẹdiọn̄ mmọ.+
26 Owo eke ọbọrọde ke nnennen usụn̄, eyetịm owo inua.+
27 Tịm nam utom fo ke an̄wa, nyụn̄ tịm n̄kpọ nọ idemfo ke in̄wan̄.+ Ke oro okụrede, bọp ufọk fo.
28 Kûtie ntiense nsu uban̄a ekemmọ owo ke unana ntak.+ Do, n̄kpọkinua fo ayanam fi edi ndisịme.+
29 Kûdọhọ ete: “Nyanam enye kpa nte enye akanamde mi.+ Nyosio owo kiet kiet usiene nte ekemde ye edinam esie.”+
30 N̄kasan̄a mbe ke in̄wan̄ owo ifu+ ye ke in̄wan̄ vine owo emi ananade ibuot.+
31 Ndien, sese! mbiet ama ọyọhọ kpukpru.+ Ntán ofụk enye, ọkọ itiat esie ama onyụn̄ owụre.+
32 Ntre ami n̄kụt; ndien ntọn̄ọ ndikere;+ ami n̄kụt nnyụn̄ n̄kpep n̄kpọ emi: +
33 Idap esisịt, ediyet idap esisịt, edikpan̄ ubọk nnana esisịt,+
34 ndien ubuene fo eyedi nte owo n̄wo ye unana fo nte owoekọn̄.+
