Mme N̄ke 3;1-35
3 Eyen mi, kûfre+ ibet mi, yak esịt fo onyụn̄ ekpeme+ mme ewụhọ mi,
2 koro ẹyekọrọ ediwak usen ye isua uwem+ ye emem ẹnọ fi.+
3 Kûyak ima-mfọnido ye akpanikọ ẹkpọn̄ fi.+ Tebe mmọ ke itọn̄ fo.+ Wet mmọ ke ọwọn̄esịt fo,+
4 ndien afo oyokụt mfọn oyonyụn̄ enyene ikike ke iso Abasi ye ke iso owo.+
5 Buọt idem ye Jehovah ke ofụri esịt+ fo kûnyụn̄ uberi edem ke asian+ fo.
6 Diọn̄ọ enye ke kpukpru usụn̄ fo,+ ndien enye eyenen̄ede usụn̄ fo enịm.+
7 Kûse idemfo ke owo ọniọn̄.+ Bak Jehovah nyụn̄ wọn̄ọde kpọn̄ idiọk.+
8 Enye akpakam edi usọbọ+ ọnọ ekop fo onyụn̄ ebịt mme ọkpọ+ fo.
9 Da ọsọn̄urua inyene+ fo ye kpukpru akpa mbun̄wụm+ fo kpono Jehovah.
10 Ndien ufọk ubonn̄kpọ fo ọyọyọhọ kpak;+ obufa wine oyonyụn̄ ọyọhọ mme aban̄ wine fo ọduọhọ.+
11 O eyen mi, kûsịn ntụnọ+ Jehovah; kûnyụn̄ uyak nsuannọ+ esie efek fi,
12 koro Jehovah asuade ọnọ+ owo eke enye amade, kpa nte ete anamde ye eyen eke enemde enye esịt.+
13 Owo emi okụtde ọniọn̄+ ye owo emi enyenede mbufiọk,+ okop inemesịt,
14 koro ndinyene enye nte udori ọfọn akan ndinyene silver nte udori, ndinyene enye nte mbun̄wụm onyụn̄ ọfọn akan ndinyene gold.+
15 Enye ọsọn̄ urua akan eme,+ owo inyụn̄ ikemeke ndimen kpukpru n̄kpọ inemesịt fo eken ndomo ye enye.
16 Ediwak usen ẹdu enye ke ubọk nnasia;+ inyene ye ubọn̄ ẹdu enye ke ubọk ufien.+
17 Usụn̄ esie edi usụn̄ inemesịt, ofụri ọkpọusụn̄ esie onyụn̄ edi emem.+
18 Enye edi eto uwem+ ọnọ mmọ eke ẹmụmde enye ẹkama, ndien mbon oro ẹsọn̄ọde ẹmụm enye ẹkama+ ẹkop inemesịt.+
19 Jehovah akada ọniọn̄ obot isọn̄.+ Enye akada mbufiọk ọsọn̄ọ owụk enyọn̄.+
20 Ada ifiọk esie abahade mme udem,+ onyụn̄ anam ikpaenyọn̄ afiari edịm.+
21 Eyen mi, kûyak mmọ ẹsop fi ke enyịn.+ Kpeme ata ọniọn̄ ye ukeme ukere n̄kpọ,+
22 ndien mmọ ẹyedi uwem ẹnọ ukpọn̄+ fo ye mbana ke itọn̄+ fo.
23 Ndien afo ayasan̄a ke ifụre+ ke usụn̄ fo, ukot fo idinyụn̄ ituahake baba n̄kpọ kiet.+
24 Ke ini afo osụhọrede ana, afo udukopke ndịk ndomokiet;+ ndien afo oyosụhọde ana, idap oyonyụn̄ enem fi.+
25 Mbabuat n̄kpọndịk+ ekededi m̀mê oyobio emi esịmde mme idiọkowo idinamke fi ndịk, ke ini enye edide.+
26 Koro Jehovah eyedi ibetedem+ fo, ndien enye eyekpeme ukot fo mbak owo edimụm.+
27 Kûtre ndinam eti n̄kpọ nnọ mbon oro ẹyomde un̄wam,+ ke ini ubọk fo ekemede ndinam.+
28 Kûdọhọ ekemmọ owo ete: “Ka fiak di, ndien nyọnọ fi n̄kpọn̄,” ke ini n̄kpọ oro odude ye afo.+
29 Kûtịbi idiọk+ ndomokiet udian ekemmọ owo, ke ini enye odụn̄de ye afo ke ndueidem.+
30 Kûtọhọ ye owo ke unana ntak,+ edieke enye mînamke fi idiọk+ ndomokiet.
31 Kûfịbe owo afai+ ufụp, kûnyụn̄ umek usụn̄ esie+ baba kiet.
32 Koro owo abian̄a+ edide mbubiam ke iso Jehovah,+ edi Enye edi ata ufan ye ndinen owo.+
33 Isụn̄i Jehovah odoro ke ufọk idiọkowo,+ edi enye ọdiọn̄+ ebietidụn̄ ndinen owo.
34 Amaedi mbon nsahi,+ enye ayasak mmọ;+ edi enye oyowụt mbon nsụkidem mfọn.+
35 Mbon ọniọn̄ ẹyebọ ukpono,+ edi mme ndisịme ẹnọ n̄kpọ esuene ubọn̄.+
