Amos 8;1-14
8 Emi edi se Jehovah Akakan Ọbọn̄ Andikara akanamde mi n̄kụt, ndien, sese! akpasa mfri ndaeyo.+
2 Ndien enye obụp ete: “Amos, nso ke afo okụt?”+ Ndien mbọrọ nte: “Akpasa mfri ndaeyo.”+ Ndien Jehovah ọdọhọ mi ete: “Utịt ikọt mi Israel emedi.+ Ndifenke mmọ aba.+
3 ‘Ndien ikwọ temple edidi ntuan̄a ke usen oro,’+ uyo Jehovah Akakan Ọbọn̄ Andikara edi emi. ‘Ediwak okpo ẹyedu.+ Ẹyeduọn̄ọ mmọ ke kpukpru ebiet—dop uyo!’
4 “Ẹkop, mbufo emi ẹdade inua ẹkpobi mme ubuene,+ man ẹnam mbon nsụkidem ke isọn̄ ẹtak,+
5 emi ẹdọhọde ẹte, ‘Edibịghi adan̄a didie mbemiso obufa ọfiọn̄ ebede+ man nnyịn ikpanyam udia?*+ N̄ko, ye sabbath,+ man ikpanyam wheat; man inam ephah ekpri+ inyụn̄ inam shekel okpon inyụn̄ ikwan̄a udomon̄kpọ abian̄a;+
6 man ikpedep mme usụhọde owo ke silver ye mme ubuene ke ekọmurua ikpaukot, ikponyụn̄ inyam mbio wheat?’+
7 “Jehovah omotomo Ubọn̄ Jacob+ ete, ‘Ndifreke kpukpru utom mmọ.+
8 Nte idịghe ntak emi edisịn isọn̄ enyek,+ edinyụn̄ anam kpukpru mme andidụn̄ ke esịt ẹtuan̄a;+ ndien emi, kpukpru emi, iditreke ndidọk ndi kpa nte Nile, idinyụn̄ itreke nditịmede nnyụn̄ nsụhọde nna nte Nile Egypt?’+
9 “‘Ndien ama ekem ke usen oro,’ uyo Jehovah Akakan Ọbọn̄ Andikara edi emi, ‘ami nyanam utịn osop ke ufọt uwemeyo,+ nnyụn̄ nnam isọn̄ ekịm ke uwemeyo.
10 Ndien nyakabade mme usọrọ mbufo nsịn ke ntuan̄a+ nnyụn̄ n̄kabade kpukpru ikwọ mbufo nsịn ke ikwọ mfụhọ, nyonyụn̄ nda ọfọn̄ ntuan̄a n̄kụne kpukpru isịn nnyụn̄ nnam kpukpru ibuot ẹkwọhọ ibọ;+ ndien nyanam n̄kpọ etie nte emi owo atuade ikpọn̄-ikpọn̄ eyen+ esie, ndien utịt esie editie nte ndotndot usen.’
11 “‘Sese! Mme usen ke ẹdi,’ uyo Jehovah Akakan Ọbọn̄ Andikara edi emi, ‘nyọdọn̄ akan̄ utom ke isọn̄, idịghe akan̄ uyo, inyụn̄ idịghe eke nsatitọn̄ mmọn̄, edi edi eke edikop ikọ Jehovah.+
12 Ndien mmọ ẹyeten̄ ẹsan̄a ọtọn̄ọde ke inyan̄ kiet esịm eken, onyụn̄ ọtọn̄ọde ke edem edere esịm edem usiahautịn. Mmọ ẹyeyọrọ ẹdi ẹnyụn̄ ẹyọrọ ẹka ke adan̄aemi ẹyomde ikọ Jehovah, edi mmọ idikwe.+
13 Ke usen oro ndiye nditọiban emi mîfiọkke erenowo, ọkọrọ ye n̄kparawa, ẹyesụhọ ke ntak nsatitọn̄;+
14 mmọ emi ẹtomode ubiomikpe Samaria,+ ẹnyụn̄ ẹdọhọde ẹte: “Ma uwem abasi fo, O Dan!”+ ẹnyụn̄ ẹdọhọde ẹte, “Ma usụn̄ Beer-sheba!”+ Ndien mmọ iditreke ndiduọn̄ọ, idinyụn̄ idahake aba ida.’”+
Mme Ikọ Idakisọn̄
^ Eyedi wheat m̀mê barley.
