Amos 9;1-15
9 Mma n̄kụt Jehovah adade ke enyọn̄ itieuwa,+ ndien enye ọdọhọ ete: “Yịbi ibuot adaha, man asan̄udọk ẹnyek. Nyụn̄ sịbe kpukpru mmọ ibuot fep.+ Ndien nyowot se isụhọde ke otu mmọ ke akan̄kan̄. Baba owo mmọ kiet eke etịbede itọk idibọhọke, baba owo mmọ kiet eke onyụn̄ ọbọhọde efehe idibọhọke.+
2 Mmọ ẹkpetịbi Udi* ẹdụk, ubọk mi oyodụk okosio mmọ do;+ mmọ ẹkpenyụn̄ ẹdọk ẹka heaven, nyada mmọ nto do nsụhọde.+
3 Ndien mmọ ẹkpedịbe ke obot Carmel, nyetịn̄ enyịn nyom mmọ nnyụn̄ nsion̄o mmọ ndi.+ Mmọ ẹkpenyụn̄ ẹdụk isọn̄ inyan̄ man ẹdịbe mi ke enyịn,+ nyọdọn̄ urụkikọt osụhọde aka do okodom mmọ.
4 Mmọ ẹkpetiene mme asua mmọ ẹka ntan̄mfep, nyọdọn̄ akan̄kan̄ aka do okowot mmọ;+ ndien nyowụk enyịn mi nse mmọ ke idiọk, nsehe ke eti.+
5 Jehovah mme udịm, Akakan Ọbọn̄ Andikara, edi Enye emi otụkde isọn̄, anam eyemede;+ ndien kpukpru mme andidụn̄ ke esịt ẹyetuan̄a;+ ndien kpukpru emi iditreke ndidọk ndi kpa nte Nile, onyụn̄ osụhọde ana nte Nile Egypt.+
6 “‘Enye emi ọbọpde mme udịghiukot esie ke heaven,+ onyụn̄ ọbọpde ufọk esie odori ke isọn̄ emi enye akanamde;+ enye emi okotde mmọn̄ inyan̄+ edi man akpan̄wan̄a ọduọk ke iso isọn̄+—Jehovah edi enyịn̄ esie.’+
7 “‘O nditọ Israel, ndi ami mbatke mbufo nte nditọ Cush?’ emi edi uyo Jehovah. ‘Nte n̄kosioho Israel ke isọn̄ Egypt+ ndọk ndi, n̄konyụn̄ nsioho mbon Philistia+ ke Crete, ye Syria ke Kir?’+
8 “‘Sese! Enyịn Jehovah Akakan Ọbọn̄ Andikara ke ẹse obio ubọn̄ emi anamde idiọk,+ ndien enye iditreke ndisobo enye mfep ke iso isọn̄.+ Edi, ndisoboke ufọk Jacob ofụri ofụri,’+ uyo Jehovah edi emi.
9 ‘Koro, sese! ami mmowụk, nyonyụn̄ nsak ufọk Israel ke otu kpukpru mme idụt,+ kpa nte emi owo asakde n̄kpọ ke usakn̄kpọ, edi baba n̄kwaitiat kiet iduọhọ ke isọn̄.
10 Mmọ ẹyekpan̄a ke akan̄kan̄—kpukpru ikọt mi oro ẹnamde idiọk,+ kpa mmọ emi ẹdọhọde ẹte: “Afanikọn̄ idisan̄ake ikpere, idinyụn̄ isịmke nnyịn.”’+
11 “‘Ke usen oro nyemenede+ ataya+ David emi ọduọde,+ nnyụn̄ nsịri mme ebiet oro ẹkesiahade. Nyọdiọn̄ n̄wụre esie, nnyụn̄ mbọp enye kpa nte ekedide toto ke eyo oko,+
12 man mmọ ẹkpeda ubak Edom emi osụhọde ẹnyene,+ ye kpukpru mme idụt emi ẹkotde ẹdian enyịn̄ mi,’+ uyo Jehovah edi emi, emi anamde n̄kpọ emi.
13 “‘Sese! Mme usen ke ẹdi,’ emi edi uyo Jehovah, ‘ndien owo emi ofụn̄de isọn̄ eyesịm owo ukpen̄e,+ owo emi edịghide grape* oyonyụn̄ esịm owo emi asuande n̄kpasịp;+ ndien ikpọ obot ẹyetọi edinem wine,+ kpukpru n̄kpri obot ẹyenyụn̄ ẹtara.+
14 Ndien nyada mbon oro ẹkemụmde nte mbuotekọn̄ ke otu ikọt mi Israel nnyọn̄ ndi,+ ndien mmọ ẹyebọp mme obio oro ẹkenade ndon ẹnyụn̄ ẹdụn̄ ke mmọ,+ ẹtọ in̄wan̄ vine ẹnyụn̄ ẹn̄wọn̄ wine eke ẹtode ke mmọ, mmọ ẹyenyụn̄ ẹtọ in̄wan̄ ẹnyụn̄ ẹdia mfri mmọ.’+
15 “‘Ndien nyọtọ mmọ ke isọn̄ mmọ, owo idinyụn̄ idịbekede mmọ aba ifep ke isọn̄ mmọ oro nnọde mmọ,’+ Jehovah Abasi fo ọdọhọ.”
