Daniel 12;1-13
12 “Ndien ke ini oro, Michael+ akwa ọbọn̄+ emi adade+ ọnọ nditọ orụk fo,+ ayadaha ada. Ndien ini nnanenyịn oyodu emi akanam orụk esie mîdụhe toto nte idụt okodu tutu esịm ini oro.+ Ndien ke ini oro orụk fo ẹyebọhọ,+ kpukpru owo emi ẹwetde enyịn̄ ẹsịn ke n̄wed.+
2 Ndien ediwak ke otu mbon emi ẹdede ke ntan isọn̄ ẹyedemede,+ ndusụk ẹyedemede ẹdụk ke nsinsi uwem,+ ndusụk ẹyedemede ẹdụk ke bụt ye nsinsi esuene.+
3 “Ndien mbon oro ẹnyenede ikike ẹyeyama nte un̄wana ikpaenyọn̄;+ ndien mbon oro ẹnamde ediwak owo ẹkabade ẹdi ndinen+ owo ẹyebiet mme ntantaọfiọn̄ ke nsinsi nsinsi.
4 “Ndien afo, O Daniel, dịp ikọ emi nyụn̄ fịk ufịkn̄kpọ ke n̄wed,+ tutu esịm utịt ini.+ Ediwak owo ẹyeyọrọ ẹdi ẹnyụn̄ ẹyọrọ ẹka, ndien ata ifiọk oyokpon.”+
5 Ndien ami Daniel n̄kụt, ndien sese! owo iba en̄wen ẹda+ ke mben akpa, kiet ke edem emi, kiet ke edem oko.+
6 Ekem owo mmọ kiet obụp eren emi esịnede linen,+ emi adade ke enyọn̄ mmọn̄ akpa ete: “Edibịghi adan̄a didie mbemiso mme utịben̄kpọ emi ẹsịmde utịt?”+
7 Ndien n̄kop eren emi esịnede linen, emi adade ke enyọn̄ mmọn̄, emi onyụn̄ emenerede ubọk nnasia esie ye ubọk ufien esie ke enyọn̄, nte otomode+ Enye emi odude uwem ke nsinsi+ ete: “Edidi ke ini kiet ye mme ini ye ubak ini,+ oro ẹkenịmde. Ndien ke ndondo oro ẹkụrede ndinuak+ odudu edisana ikọt Abasi, kpukpru n̄kpọ emi ẹyesịm utịt mmọ.”
8 Ndien ami n̄kop, edi mfiọkke;+ ntre ami mbụp nte: “O ọbọn̄ mi, nso ididi ata utịt n̄kpọ emi?”+
9 Ndien enye ọdọhọ mi ete: “Daniel, ka okwo, koro ẹmedịp ikọ emi ẹnyụn̄ ẹfịk ufịkn̄kpọ ke esịt tutu esịm utịt ini.+
10 Ediwak owo ẹyenam idem asana+ ẹnyụn̄ ẹnam idem afia+ ẹnyụn̄ ẹsion̄o mmọ ndek ke idem ẹfep.+ Ndien mme idiọkowo ẹyedọdiọn̄ ẹdiọk,+ ndien baba idiọkowo kiet idifiọkke;+ edi mbon oro ẹnyenede ikike ẹyefiọk.+
11 “Ndien ọtọn̄ọde ke ini oro ẹmende uwa ofụri ini+ ẹfep+ ẹnyụn̄ ẹnịmde mbubiam n̄kpọ+ oro adade nsobo edi, edidi usen tọsịn kiet ikie iba ye anan̄ ye duop.
12 “Owo eke ebetde onyụn̄ esịmde usen tọsịn kiet ikie ita ye edịp ye efịt oyokop inemesịt!+
13 “Amaedi afo, ka okwo tutu esịm utịt;+ ndien afo ọyọduọk odudu,+ edi afo ayadaha ada ọbọ udeme fo ke utịt mme usen.”+
