Deuteronomy 12;1-32
12 “Mmọ emi ẹdi mme ewụhọ+ ye mme ubiereikpe+ emi mbufo ẹdikpemede ndinam+ ke isọn̄ emi Jehovah Abasi mme ete ete mbufo ọnọde mbufo ete ẹda ẹnyene, ke ofụri ini emi mbufo ẹdidude uwem ke isọn̄ oro.+
2 Mbufo ẹkûtre ndisobo+ kpukpru ebiet eke mme idụt emi mbufo ẹdibọde mmọ isọn̄ ẹsituakde ibuot ẹnọ mme abasi mmọ, ke enyọn̄ ikpọ obot ye ke enyọn̄ n̄kpri obot ye ke idak kpukpru eto eke ẹsehede.+
3 Mbufo ẹnyụn̄ ẹwụri mme itieuwa+ mmọ ẹnyụn̄ ẹbom mme adaha utuakibuot+ mmọ, ẹnyụn̄ ẹfọp mme eto utuakibuot+ mmọ ke ikan̄ ẹnyụn̄ ẹkpi ndisọi mbiet+ mme abasi mmọ ẹduọn̄ọ, ẹnyụn̄ ẹsọhi enyịn̄ mmọ ke ebiet oro ẹfep.+
4 “Ẹkûnam ntre ye Jehovah Abasi mbufo,+
5 edi mbufo ẹyom ebiet emi Jehovah Abasi mbufo edimekde ke otu kpukpru mme esien mbufo ete inịm enyịn̄ imọ, man enye odu do, ẹnyụn̄ ẹka do.+
6 Mbufo ẹnyụn̄ ẹda mme edifọp uwa+ mbufo ẹka do ye mme uwa mbufo ye mme ọyọhọ mbak duop+ ye etịbe ubọk mbufo+ ye mme uwa akan̄a+ mbufo ye mme uwa unyịmesịt+ mbufo ye akpa ke otu enan̄ ye ke otu erọn̄ mbufo.+
7 Mbufo ẹnyụn̄ ẹdia n̄kpọ do ke iso Jehovah Abasi mbufo+ ẹnyụn̄ ẹdat esịt ke kpukpru n̄kpọ eke mbufo ẹnamde,+ mbufo ye mbonufọk mbufo, koro Jehovah Abasi fo ọdiọn̄de fi.
8 “Mbufo ẹkûnam nte nnyịn inamde mi mfịn emi, emi owo kiet kiet anamde se ededi eke enende enye ke enyịn,+
9 koro mbufo mîsịmke kan̄a ebiet nduọkodudu+ ye udeme emi Jehovah Abasi mbufo ọnọde mbufo.
10 Ndien mbufo ẹyebe Jordan+ ẹkedụn̄ ke isọn̄ emi Jehovah Abasi mbufo ọnọde mbufo ete ẹda ẹnyene,+ enye oyonyụn̄ ọnọ mbufo nduọkodudu anam ẹbọhọ kpukpru mme asua mbufo emi ẹkande mbufo ẹkụk, mbufo ẹyenyụn̄ ẹdụn̄ ke ifụre.+
11 Ndien ama ekem, mbufo ẹda kpukpru se ntemede mbufo, kpa edifọp uwa+ mbufo ye mme uwa mbufo, mme ọyọhọ mbak duop,+ ye etịbe+ ubọk mbufo, ye kpukpru akan̄a eke mbufo ẹdimekde ndikan̄a+ nnọ Jehovah, ẹka ke ebiet+ emi Jehovah Abasi mbufo edimekde ndinam enyịn̄ esie odu do.
12 Mbufo ẹnyụn̄ ẹdara ke iso Jehovah Abasi mbufo,+ mbufo ye nditọiren mbufo ye nditọiban mbufo ye ifịn iren mbufo ye ifịn iban mbufo ye eyen Levi emi odude ke obio mbufo, koro enye mînyeneke udeme m̀mê n̄kpọ-akpa ke otu mbufo.+
13 Kpeme mbak afo uduwa mme edifọp uwa fo ke ebiet efen ekededi emi afo edikụtde.+
14 Edi afo ediwa mme edifọp uwa fo ke ebiet emi Jehovah edimekde ke kiet ke otu mme esien fo, ndien do ke afo enyene ndinam kpukpru se ami n̄wụkde fi.+
15 “Afo ediwot unam ini ekededi emi ọdọn̄de ukpọn̄ fo,+ onyụn̄ ata unam nte Jehovah Abasi fo ọdiọn̄de fi, ke obio fo. Owo emi edehede+ ye owo emi asanade ẹkeme ndita, nte akan̄ ye edop.+
16 Mbufo ẹkûdia iyịp.+ Duọk enye ke isọn̄ nte mmọn̄.+
17 Owo idiyakke fi etie ke obio fo adia ọyọhọ mbak duop ke wheat*+ m̀mê ke obufa wine fo m̀mê ke aran fo m̀mê akpa ke otu enan̄ fo ye ke otu erọn̄+ fo m̀mê uwa akan̄a fo ekededi emi afo edikan̄ade m̀mê uwa unyịmesịt+ fo m̀mê etịbe ubọk fo.+
18 Edi afo edidia ke iso Jehovah Abasi fo, ke ebiet emi Jehovah Abasi fo edimekde,+ afo ye eyeneren fo ye eyenan̄wan fo ye ofụn eren fo ye ofụn an̄wan fo ye eyen Levi emi odude ke obio fo; nyụn̄ dara+ ke iso Jehovah Abasi fo ke kpukpru se afo anamde.
19 Kpeme mbak afo udufre nditọ Levi+ ke ofụri ini emi afo odude ke isọn̄ fo.
20 “Ke ini Jehovah Abasi fo edinamde mme adan̄a fo ẹtara,+ kpa nte enye ọkọn̄wọn̄ọde ọnọ fi,+ afo ọyọdọhọ ete, ‘Yak nta unam,’ koro ukpọn̄ fo oyomde ndita unam, ta unam ini ekededi emi ukpọn̄ fo oyomde ndita unam.+
21 Edieke ebiet emi Jehovah Abasi fo edimekde ndinịm enyịn̄ esie+ oyomde fi usụn̄, da enan̄ fo ye erọn̄ fo eke Jehovah ọnọde fi wot kpa nte n̄ketemede fi, nyụn̄ ta ke obio fo ini ekededi emi ọdọn̄de ukpọn̄ fo.+
22 Kpa nte atade akan̄ ye edop,+ kpa ntre ke afo edita enye: owo eke edehede+ ye owo eke asanade ẹkeme ndita enye.
23 Edi nen̄ede biere nditre ndidia iyịp,+ koro iyịp edide uwem,+ kûnyụn̄ uta ukpọn̄* ukọrọ ye obụk.
24 Kûdia iyịp. Duọk enye ke isọn̄ nte mmọn̄.+
25 Kûdia enye, man ọfọn ye afo+ ye nditọ fo emi ẹditienede fi, koro ntem ke afo edinam se inende ke enyịn Jehovah.+
26 Edi afo edimen sụk ndisana n̄kpọ+ fo eke afo edinyenede, ye mme uwa akan̄a+ fo, edi ke ebiet emi Jehovah edimekde.+
27 Nyụn̄ wa edifọp uwa fo,+ unam ye iyịp,+ ke itieuwa Jehovah Abasi fo; nyụn̄ n̄wan̄a iyịp uwa fo duọk ke itieuwa Jehovah+ Abasi fo, edi ta obụk esie.
28 “Kpeme, nyụn̄ nam kpukpru se ntemede fi,+ man ọfọn ye afo+ ye nditọ fo emi ẹditienede fi ke nsinsi, koro ntem ke afo edinam se ifọnde ye se inende ke enyịn Jehovah Abasi fo.+
29 “Ke ini Jehovah Abasi fo edisịbede mme idụt emi afo akade ndida nnyene efep ke iso fo,+ afo n̄ko enyene ndibọ mmọ itie nnyụn̄ ndụn̄ ke isọn̄ mmọ.+
30 Kpeme idem mbak ẹditap fi etiene mmọ,+ ke ẹma ẹkesobo mmọ ẹfep ke iso fo, n̄ko mbak afo udubụp uban̄a mme abasi mmọ, ute, ‘Ewe usụn̄ ke mme idụt emi ẹkenam n̄kpọ mme abasi mmọ? Ami nyanam kpa ntre n̄ko.’
31 Kûnam ntre ye Jehovah Abasi fo,+ koro kpukpru mbubiam n̄kpọ emi Jehovah asuade ke mmọ ẹnam ẹnọ mme abasi mmọ, koro mmọ ẹkam ẹfọpde nditọiren mmọ ye nditọiban mmọ ẹnọ mme abasi mmọ.+
32 Mbufo ẹkpeme ndinam kpukpru ikọ emi ami ntemede mbufo.+ Ẹkûdian n̄kpọ, ẹkûnyụn̄ ẹsio n̄kpọ ẹfep ke esịt.+
