Deuteronomy 9;1-29
9 “O Israel, kop, afo ọmọn̄ ebe Jordan+ mfịn emi odụk ekebịn mme idụt emi ẹkponide ẹnyụn̄ ẹsọn̄de odudu ẹkan fi,+ mme obio oro ẹkon̄de ẹnyụn̄ ẹbọpde ibibene ẹsịm enyọn̄,+
2 mbio emi ẹkponide ẹnyụn̄ ẹniọn̄de, nditọ Anak,+ emi mbufo ẹdiọn̄ọde ẹnyụn̄ ẹkopde nte ẹtịn̄de ẹban̄a mmọ ẹte, ‘Anie ekeme ndisọn̄ọ nda ke iso nditọ Anak?’
3 Ndien afo emetịm ọfiọk mfịn emi ete ke Jehovah Abasi fo ọmọn̄ ebem fi iso ebe.+ Enye edi ikan̄ eke atade-ta.+ Enye oyosobo+ mmọ, enye oyonyụn̄ akan mmọ ke iso fo; afo enyene ndisọsọp mbịn mmọ mfep nnyụn̄ nsobo mmọ, kpa nte Jehovah ọkọdọhọde fi.+
4 “Ke ini Jehovah Abasi fo ebịnde mmọ efep ke iso fo, kûdọhọ ke esịt fo ete, ‘Edinen ido mi anam Jehovah ada mi edi ete ndida isọn̄ emi nnyene,’+ koro edi idiọkido mme idụt emi anam Jehovah ebịn mmọ efep ke iso fo.+
5 Idịghe edinen ido fo+ m̀mê eti esịt fo+ anam fi odụk akada isọn̄ mmọ enyene; ke akpanikọ, edi idiọkido mme idụt emi esịn Jehovah Abasi fo ebịn mmọ efep ke iso fo,+ man Jehovah anam ikọ oro enye ọkọn̄wọn̄ọde ọnọ mme ete ete fo, Abraham+ ye Isaac+ ye Jacob.+
6 Nyụn̄ fiọk ete ke idịghe edinen ido fo esịn Jehovah Abasi fo ọnọ fi eti isọn̄ emi ada enyene; koro afo ọsọn̄de obotitọn̄.+
7 “Ti: Kûfre nte afo akayatde Jehovah Abasi fo esịt ke wilderness.+ Toto ke usen emi afo ọkọwọrọde ke isọn̄ Egypt tutu mbufo ẹdisịm ebiet emi, mbufo ẹmesọn̄ ibuot ye Jehovah.+
8 N̄ko ke Horeb mbufo ẹma ẹnam esịt ayat Jehovah, tutu Jehovah ayat esịt ye mbufo onyụn̄ oyom ndisobo mbufo mfep.+
9 Ke ini n̄kọdọkde obot n̄ka ndibọ mme itiatn̄wed+ oro, kpa mme itiatn̄wed ediomi oro Jehovah akanamde ye mbufo,+ nnyụn̄ ndude ke obot oro uwemeyo aba ye okoneyo aba,+ (n̄kadiaha udia n̄konyụn̄ n̄n̄wọn̄ke mmọn̄,)
10 ekem Jehovah ọnọ mi itiatn̄wed iba oro nnuenubọk Abasi+ ekewetde; ndien kpukpru ikọ oro Jehovah eketịn̄de ye mbufo ke obot oro ke ufọt ikan̄ ke usen esop ẹma ẹdu ke itiat oro.+
11 Edikem ke uwemeyo aba ye okoneyo aba oro ẹbede, Jehovah ọnọ mi itiatn̄wed iba oro, kpa itiatn̄wed ediomi;+
12 ndien Jehovah ọdọhọ mi ete, ‘Daha ke enyọn̄, sọsọp sụhọde ka, koro ikọt fo emi afo akadade ọwọrọ ke Egypt ẹmenam se idade nsobo idi.+ Mmọ ẹmesọp ẹwaha ẹkpọn̄ usụn̄ emi n̄ketemede mmọ. Mmọ ẹmenam editara mbiet ẹnọ idemmọ.’+
13 Ndien Jehovah ọdọhọ mi ete, ‘Mmokụt mbio emi, ndien sese! mmọ ẹdi mbon oro ẹsọn̄de obotitọn̄.+
14 Yak mi man nsobo+ mmọ nnyụn̄ nsọhi enyịn̄ mmọ mfep ke idak ikpaenyọn̄,+ ndien nyanam fi akabade edi idụt eke okopde odudu onyụn̄ awakde akan mmọ.’+
15 “Ndien nsụhọde ke obot oro, ke adan̄aemi ikan̄ asakde ke obot oro;+ itiatn̄wed ediomi iba ẹnyụn̄ ẹdu mi ke ubọk mbiba.+
16 Ndien ke ini nsede, sese mbufo ẹma ẹnam idiọkn̄kpọ ẹdue Jehovah Abasi mbufo! Mbufo ẹma ẹnam editara mbiet eyen enan̄ ẹnọ idem mbufo.+ Mbufo ẹma ẹsọsọp ẹwaha ẹkpọn̄ usụn̄ emi Jehovah eketemede mbufo.+
17 Ntre mma ntop itiatn̄wed mbiba oro n̄kakamade ke ubọk nduọk nnyụn̄ mbom mmọ ke iso mbufo.+
18 Ndien mma nduọ ke isọn̄ ke iso Jehovah, nte n̄kanamde ke akpa, uwemeyo aba ye okoneyo aba. N̄kadiaha udia n̄konyụn̄ n̄n̄wọn̄ke mmọn̄,+ ke ntak ofụri idiọkn̄kpọ oro mbufo ẹkenamde ke ndinam idiọk ke iso Jehovah nnyụn̄ nyat enye esịt.+
19 Koro ndịk ama anam mi ke ntak emi Jehovah akayatde esịt etieti ye mbufo oyom ndisobo mbufo mfep.+ Edi, Jehovah ama akpan̄ utọn̄ ọnọ mi ini oro n̄ko.+
20 “Jehovah ama ayat esịt ye Aaron n̄ko onyụn̄ oyom ndisobo enye mfep;+ edi mma nnam n̄kpeubọk+ n̄ko mban̄a Aaron ke ini oro.
21 Ndien mma mmen idiọkn̄kpọ oro mbufo ẹkenamde, kpa eyen enan̄+ oro, mfọp ke ikan̄ nnyụn̄ nnuak enye, nnen̄ede n̄kọk enye akabade ntọn̄; ekem ntop ntọn̄ oro ndọn̄ ke idịm oro okotode obot oro osụhọde.+
22 “N̄ko, mbufo ẹma ẹnam Jehovah ayat esịt+ ke Taberah+ ye ke Massah+ ye ke Kibroth-hattaavah.+
23 Ndien ke ini Jehovah okosiode mbufo ke Kadesh-barnea+ ete, ‘Ẹdọk ẹkeda isọn̄ oro ndinọde mbufo!’ mbufo ẹma ẹsọn̄ ibuot ẹbiat ewụhọ Jehovah Abasi mbufo,+ inyụn̄ ibuọtke idem+ ye enye inyụn̄ ikopke uyo esie.+
24 Mbufo ẹmesọn̄ ibuot ye Jehovah+ toto ke usen emi n̄kọfiọkde mbufo.
25 “Ntre ke nsụk nduọ ke isọn̄ ke iso Jehovah uwemeyo aba ye okoneyo aba,+ ntem ke n̄kọduọ ke isọn̄ ke ntak emi Jehovah ọkọdọhọde ete iyosobo mbufo.+
26 Ndien n̄kpe Jehovah ubọk+ nnyụn̄ ndọhọ nte, ‘O Jehovah, Akakan Ọbọn̄ Andikara, kûsobo ikọt fo, kpa inyene fo,+ emi afo akadade akwa odudu fo afak, okonyụn̄ adade ọkpọsọn̄ ubọk+ osio mmọ ke Egypt.+
27 Ti mme asan̄autom fo, Abraham ye Isaac ye Jacob.+ Kûwọn̄ọde iso use nsọn̄esịt mbon emi ye idiọkido mmọ ye idiọkn̄kpọ mmọ,+
28 mbak idụt+ emi afo okosiode nnyịn ke esịt ẹdidọhọ ẹte: “Koro Jehovah mîkemeke ndida mmọ ndụk isọn̄ oro enye ọkọn̄wọn̄ọde ndinọ mmọ, n̄ko koro enye asuade mmọ ekesịn enye osio mmọ man ediwot ke wilderness.”+
29 Mmọ n̄ko ẹdi ikọt fo ye ọkpọkpọ inyene fo+ emi afo akadade akwa odudu fo ye edinyanade ubọk fo osion̄o.’+
