Esther 4;1-17
4 Ekem Mordecai+ edifiọk kpukpru se ẹkenamde;+ Mordecai onyụn̄ awak ọfọn̄idem esie, esịne ọfọn̄ ntuan̄a+ onyụn̄ ọduọk ntọn̄+ ke idem ndien ọwọrọ aka ufọt obio ekeseme ndotndot ye ọkpọsọn̄ eseme.+
2 Ke akpatre, enye asan̄a edida ke iso inuaotop+ edidem, koro baba owo kiet mîkenyeneke ndisịne ọfọn̄ ntuan̄a ndụk inuaotop edidem.
3 Ndien ke kpukpru ikpehe obio ukara,+ ebiet ekededi emi uyo edidem ye ibet esie ẹsịmde, mme Jew ẹfụhọ+ etieti, ẹtre udia,+ ẹtuan̄a, ẹnyụn̄ ẹseme. Ndien ediwak owo ẹna ke ọfọn̄ ntuan̄a+ ye ke ntọn̄.+
4 Ekem ifịn iban Esther ye mme eunuch+ esie ẹdi ẹditịn̄ n̄kpọ emi ẹnọ enye. Ndien n̄kpọ emi abiak ọbọn̄ an̄wan etieti. Ekem enye ọnọ ọfọn̄ ẹda ẹkesịne Mordecai ẹnyụn̄ ẹsio enye ọfọn̄ ntuan̄a ke idem ẹfep. Edi enye inyịmeke ndibọ.+
5 Ntem Esther okot Hathach,+ kpa kiet ke otu mme eunuch edidem, emi edidem ọkọdọhọde esinam n̄kpọ ọnọ enye, onyụn̄ ọdọn̄ enye utom ke ọtọ Mordecai ete okodụn̄ọde ọfiọk se n̄kpọ emi ọwọrọde ye se itịbede.
6 Ntre Hathach ọwọrọ aka okosobo ye Mordecai ke an̄wa obio, emi odude ke iso inuaotop edidem.
7 Ndien Mordecai emen kpukpru se iwọrọde enye+ etịn̄ ọnọ enye, ye nnennen ibatokụk oro Haman ọkọdọhọde ke iyodomo isịn ke itie unịm inyene edidem+ iban̄a mme Jew, man ẹsobo mmọ ẹfep.+
8 Enye onyụn̄ emen n̄wed+ ibet kiet emi ẹkenọde ke Shushan+ ẹte ẹsobo mmọ ọnọ enye, ete okowụt Esther onyụn̄ asian enye, onyụn̄ eteme enye+ ete yak enye odụk aka iso edidem ekekpe enye+ ubọk oyom mfọn onyụn̄ anam eben̄e aban̄a orụk+ esie.
9 Ndien Hathach+ odụk edi edimen ikọ Mordecai etịn̄ ọnọ Esther.
10 Ndien Esther etịn̄ ye Hathach, onyụn̄ ọdọn̄ enye utom ke ọtọ Mordecai+ ete:
11 “Kpukpru mme asan̄autom edidem ye mbon ikpehe obio ukara edidem ẹfiọk ẹte ke eren m̀mê n̄wan ekededi eke odụkde ọtọ edidem, ke okụre+ emi odude ke esịt esịt ke owo mîkotke enye, ibet+ esie kiet edi ke ẹnyene ndiwot owo oro; ibọhọke edidem anyan esan̄ ubọn̄ gold ọnọ enye, ke enye edidu uwem.+ Edi owo ikotke mi ndụk ke ọtọ edidem ke usen edịp ye duop idahaemi.”
12 Ndien mmọ ẹmen ikọ Esther ẹketịn̄ ẹnọ Mordecai.
13 Ekem Mordecai ọdọn̄ ẹkedọhọ Esther ẹte: “Kûyak ukpọn̄ fo ekere ke mbonufọk edidem ẹyebọhọ ke ini ẹsobode kpukpru mme Jew eken.+
14 Koro edieke afo odopde uyo ke ini emi, ubọhọ ye edinyan̄a ẹyeto ebiet efen ẹsịm mme Jew;+ edi afo ye ufọk usọ ẹyetak. Ndien anie ọfiọk m̀mê afo ekesịm itie ubọn̄ ọnọ utọ ini ntem?”+
15 Ndien Esther ọdọn̄ ẹkedọhọ Mordecai ẹte:
16 “Ka katan̄ kpukpru mme Jew emi ẹdude ke Shushan+ bon ọtọkiet ẹnyụn̄ ẹtre udia+ ẹban̄a mi, ẹkûdia n̄kpọ ẹkûnyụn̄ ẹn̄wọn̄ n̄kpọ ke usen ita,+ okoneyo ye uwemeyo. Ami ye nditọiban+ mi n̄ko iyetre udia kpa ntre, ndien ekem nyodụk n̄ka iso edidem, okposụkedi ibet mînyịmeke emi; ndien edieke anade n̄kpa, yak n̄kpa.”+
17 Ndien Mordecai ọnyọn̄ akanam kpukpru se Esther eketemede enye.
