Esther 5;1-14
5 Edikem ke ọyọhọ usen ita,+ Esther esịne ọfọn̄ ke ido ọbọn̄ an̄wan,+ odụk edida ke okụre+ emi odude ke esịt esịt ufọk edidem emi asakde iso ese ufọk edidem, ke adan̄aemi edidem etiede ke ebekpo ubọn̄ esie ke ufọk ubọn̄ emi asakde iso ese enyịnusụn̄ ufọk.
2 Ndien edikem ke ndondo oro edidem okụtde Esther ọbọn̄ an̄wan adade ke okụre, enye okụt mfọn+ ke iso edidem, ntre edidem anyan esan̄ ubọn̄+ gold emi enye akamade ke ubọk ọnọ Esther. Ndien Esther asan̄a ekpere okotụk iso esan̄ ubọn̄ oro.
3 Ndien edidem ọdọhọ enye ete: “O Esther ọbọn̄ an̄wan, nso itịbe, nso inyụn̄ idi eben̄e fo?+ Ẹyenọ fi—idem ekpedi ubọn̄+ ubak edem kiet!”
4 Ntem Esther ọbọrọ ete: “Edieke ọfọnde edidem ke enyịn, yak edidem asan̄a ye Haman+ mfịn emi edi ndia+ eke nnamde nnọ enye.”
5 Ndien edidem ọdọhọ ete: “Mbufo ẹnam Haman awara+ anam se Esther ọdọhọde.” Ekem edidem ye Haman ẹdi ndia oro Esther akanamde.
6 Ekem edidem ọdọhọ Esther ke ini un̄wọn̄ wine ete: “Nso ke afo ekpe ubọk oyom?+ Ẹyenọ fi! Nso inyụn̄ idi eben̄e fo? Ẹyenam ẹnọ fi—idem ekpedi ubọn̄ ubak edem kiet!”
7 Ndien Esther ọbọrọ ete: “Se n̄kpede ubọk nyom nnyụn̄ mben̄ede edi,
8 Edieke n̄kụtde mfọn ke iso edidem,+ onyụn̄ edieke enemde edidem ndinam n̄kpeubọk mi ye eben̄e mi, yak edidem ye Haman ẹdi ndia emi ndinamde nnọ mmọ n̄kpọn̄, ndien n̄kpọn̄ nyanam nte edidem ọdọhọde.”+
9 Mmọdo, Haman ọwọrọ ke usen oro, adara+ onyụn̄ enem esịt; edi ke ndondo oro Haman okụtde Mordecai ke inuaotop+ edidem ndien enye mîdahake ke enyọn̄,+ mînyụn̄ inyekke idem iban̄a enye,+ kpa idaha oro esịt ofụt+ Haman etieti aban̄a Mordecai.
10 Edi, Haman omụm idem akama onyụn̄ edisịm ufọk esie. Ekem enye ọdọn̄ ẹkekot mme ufan esie ye Zeresh+ n̄wan esie ẹdi;
11 ndien Haman obụk ubom inyene+ esie ye nte nditọiren+ esie ẹwakde ọnọ mmọ, ye kpukpru se edidem akadade okpono enye ye nte edidem ekemenerede enye akan mbọn̄ ye mme asan̄autom edidem.+
12 Haman onyụn̄ ọdọhọ ete: “Ikụreke ke oro, Esther ọbọn̄ an̄wan ikokotke baba owo kiet etiene edidem edi ndia emi enye akanamde ke mîbọhọke ami,+ ndien enye omokot mi ete ntiene edidem ndi ke ọtọ imọ n̄kpọn̄+ n̄ko.
13 Edi kpukpru emi inemke mi adan̄a nte nsụk n̄kụtde Mordecai eyen Jew oro etiede ke inuaotop edidem.”
14 Ntre Zeresh n̄wan esie ye kpukpru mme ufan esie ẹdọhọ enye ẹte: “Yak mmọ ẹnam eto+ eke okon̄de cubit aba ye duop. Ndien ke usenubọk+ dọhọ edidem ete anam mmọ ẹyịri Mordecai ke eto oro.+ Ndien tiene edidem ka ndia ye idatesịt.” Ntre n̄kpọ emi enem+ Haman, enye onyụn̄ ọdọhọ ẹnam eto oro.+
