Exodus 1;1-22
1 Ndien mmọ emi ẹdi enyịn̄ nditọiren Israel, emi ẹketienede Jacob ẹdi Egypt; owo kiet kiet asan̄a ye mbonufọk esie:+
2 Reuben+ ye Simeon+ ye Levi+ ye Judah,+
3 Issachar+ ye Zebulun+ ye Benjamin,+
4 Dan+ ye Naphtali,+ Gad+ ye Asher.+
5 Ndien kpukpru ukpọn̄ emi ẹkewọn̄ọde Jacob ke n̄kpatian̄ ukot+ ẹkedi ukpọn̄ ata ye duop, edi Joseph ama ododu ke Egypt ini oro.+
6 Ekem Joseph akpa,+ n̄ko ye kpukpru nditọete esie ye ofụri emana oro.
7 Ndien nditọ Israel ẹtọt ẹnyụn̄ ẹsiaha; mmọ ẹdọdiọn̄ ẹwak ẹnyụn̄ ẹkop odudu etieti ke usụn̄ oro akpade owo idem, tutu mmọ+ ẹyọhọ ke isọn̄ oro.
8 Ekem obufa edidem emi mîkọfiọkke Joseph+ adaha ada ke Egypt.
9 Ndien enye ọdọhọ ikọt esie ete: “Sese! Nditọ Israel ẹmewak ẹnyụn̄ ẹkop odudu ẹkan nnyịn.+
10 Mbufo ẹdi! Ẹyak nnyịn inam n̄kpọ n̄kari n̄kari ye mmọ,+ mbak mmọ ẹdiwak, ndien ekem, edieke ekọn̄ etịbede, mmọ ẹyediana ye mme asua nnyịn ẹn̄wana ye nnyịn, ẹnyụn̄ ẹwọn̄ọ ke idụt emi.”
11 Ndien mmọ ẹnịm mme etubom oro ẹnyịkde mme owo ẹnam ọkpọsọn̄ utom ẹte ẹse mmọ ẹnyụn̄ ẹfịk mmọ ke utom ubiom mbiomo;+ ndien mmọ ẹbọp mme obio Pithom ye Raamses+ nte mme itie ubonn̄kpọ ẹnọ Pharaoh.
12 Edi adan̄a nte ẹfefịk mmọ, ntre ke mmọ ẹdọdiọn̄ ẹwak ẹnyụn̄ ẹsiaha, tutu ndịk nditọ Israel anam mmọ.+
13 Ntem nditọ Egypt ẹsịn nditọ Israel ẹnam utom ke idak ufịk.+
14 Ndien mmọ ẹnam uwem odorode mmọ ke ndisịn mmọ ke ọkpọsọn̄ ufụn edinam mbat ukọkufọk+ ye kọrikọri ye kpukpru orụk utom ufụn ke in̄wan̄,+ ih, kpukpru orụk utom ufụn eke mmọ ẹsịnde mmọ ẹnam ke idak ufịk nte ifịn.+
15 Ekem edidem Egypt ọdọhọ mme omụm-uman+ emi ẹdide mme Hebrew, emi kiet ekerede Shiphrah, enye eken onyụn̄ ekerede Puah,
16 ete: “Ke ini mbufo ẹmụmde iban Hebrew uman, ẹnyụn̄ ẹkụtde mmọ ke ifịm uman, edieke edide eyeneren, mbufo ẹwot enye; edi edieke edide eyenan̄wan, enye enyene ndidu uwem.”
17 Edi, mme omụm-uman emi ẹbak ata Abasi,+ ndien mmọ inamke nte edidem Egypt ọkọdọhọde mmọ,+ edi mmọ ẹnịm nditọiren uwem.+
18 Ekem edidem Egypt okot mme omụm-uman oro ẹdi onyụn̄ ọdọhọ mmọ ete: “Ntak emi mbufo ẹnamde n̄kpọ emi ẹnyụn̄ ẹnịmde nditọiren uwem?”+
19 Ndien mme omụm-uman ẹbọrọ Pharaoh ẹte: “Koro iban mme Hebrew mîbietke iban Egypt. Koro mmọ ẹsọn̄ idem, ẹsinyụn̄ ẹman nditọ mbemiso mme omụm-uman ẹsịmde mmọ.”
20 Ntre Abasi ọfọn ido ye mme omụm-uman oro;+ ndien mbon oro ẹdọdiọn̄ ẹwak ẹnyụn̄ ẹkop odudu etieti.
21 Edikem koro mme omụm-uman oro ẹbakde ata Abasi, enye anam mmọ ẹnyene mme ubon.+
22 Ekem Pharaoh owụk kpukpru ikọt esie ete: “Mbufo ẹmen kpukpru nditọiren eke ẹmanade ẹduọn̄ọ ke Akpa Nile, edi ẹnịm kpukpru nditọiban uwem.”+
