Exodus 10;1-29
10 Ekem Jehovah ọdọhọ Moses ete: “Ka ke ọtọ Pharaoh, koro mmayak enye ye mme asan̄autom esie ẹsọn̄ esịt,+ man nnam mme idiọn̄ọ mi emi ke iso esie,+
2 man afo ekpetịn̄ ọnọ nditọ fo ye nditọ nditọ fo nte n̄kamiade Egypt ọkpọsọn̄ ufen ye mme idiọn̄ọ emi n̄kanamde ke otu mmọ;+ ndien mbufo ẹyefiọk ẹte ke ami ndi Jehovah.”+
3 Ntre Moses ye Aaron ẹka ke ọtọ Pharaoh ẹkedọhọ enye ẹte: “Ntem ke Jehovah Abasi mme Hebrew ọdọhọ ete, ‘Adan̄a didie ke afo edisịn ndisụk ibuot nnọ mi?+ Yak ikọt mi ẹnyọn̄ọ man mmọ ẹkenam n̄kpọ ẹnọ mi.
4 Koro edieke afo osụk esịnde ndiyak ikọt mi ẹnyọn̄ọ, sese ami mmọn̄ nda n̄kukun̄kpọyọriyọ nyọhọ obio fo n̄kpọn̄.+
5 Ndien mmọ ẹyefụk ofụri iso isọn̄ ndien owo idikemeke ndikụt isọn̄; mmọ ẹyenyụn̄ ẹta se ikosụhọde, se edịm itiat akabiatde osụhọ ọnọ mbufo, ndien mmọ ẹyeta kpukpru eto eke ẹtịbede ẹnọ mbufo ke in̄wan̄.+
6 Ndien mmọ ẹyeyọhọ ufọk fo ye ufọk kpukpru mme asan̄autom fo ye ufọk kpukpru owo ke Egypt ke udomo oro mme ete fo ye mme ete ete fo mîkekwe toto ke usen emi mmọ ẹkedude ke isọn̄ tutu esịm mfịn emi.’”+ Ndien enye ọwọrọ ọkpọn̄ Pharaoh.+
7 Ekem mme asan̄autom Pharaoh ẹdọhọ enye ẹte: “Adan̄a didie ke owo emi edidi afia ọnọ nnyịn?+ Yak mbon emi ẹnyọn̄ọ man mmọ ẹkenam n̄kpọ ẹnọ Jehovah Abasi mmọ. Nte afo ufiọkke tutu emi ete ke Egypt amatak?”+
8 Ntre ẹfiak ẹda Moses ye Aaron ẹsọk Pharaoh, ndien enye ọdọhọ mmọ ete: “Ẹka, ẹkenam n̄kpọ ẹnọ Jehovah Abasi mbufo.+ Edi, mmanie ẹdika?”
9 Ekem Moses ọdọhọ ete: “Nnyịn ye nditọwọn̄ nnyịn ye n̄kani owo nnyịn idika. Nnyịn idisan̄a ye nditọiren nnyịn ye nditọiban nnyịn,+ ye mme erọn̄ nnyịn ye mme enan̄ nnyịn ika,+ koro nnyịn inyenede usọrọ ndinam nnọ Jehovah.”+
10 Edi enye ọdọhọ mmọ ete: “Edieke nyakde mbufo ye n̄kpri nditọ mbufo ẹnyọn̄ọ, ẹfiọk ẹte ke Jehovah odu ye mbufo!+ Sese, mbufo ẹnyene idiọk uduak.+
11 Baba-o! Mbufo mme okopidem irenowo ẹkam ẹka, ẹnyụn̄ ẹkenam n̄kpọ ẹnọ Jehovah, koro se mbufo ẹyomde edi oro.” Ndien ẹbịn mmọ ẹfep ke iso Pharaoh.+
12 Ndien Jehovah ọdọhọ Moses ete: “Nyan+ ubọk fo ke isọn̄ Egypt man n̄kukun̄kpọyọriyọ ẹdọk ẹdi isọn̄ Egypt ẹdita kpukpru ikọn̄ emi edịm itiat akabiatde osụhọ ke isọn̄.”+
13 Ndien Moses emen esan̄ esie inikiet inikiet anyan ke isọn̄ Egypt, ndien Jehovah anam ofụm edem usiahautịn+ efịme ke isọn̄ ke ofụri usen oro ye ke ofụri okoneyo. Ke eyo esierede, ofụm edem usiahautịn emen n̄kukun̄kpọyọriyọ edi.
14 Ndien n̄kukun̄kpọyọriyọ ẹtọn̄ọ ndidọk ndi ofụri isọn̄ Egypt ẹnyụn̄ ẹdidu ke ofụri isọn̄ Egypt.+ Mmọ ẹfịna owo etieti.+ N̄kukun̄kpọyọriyọ eke ẹtiede ntem akanam idụhe, idinyụn̄ idụhe aba.
15 Ndien mmọ ẹfụk ofụri iso isọn̄,+ ndien isọn̄ ekịm;+ mmọ ẹnyụn̄ ẹta kpukpru ikọn̄ ke isọn̄ ye kpukpru mfri ke eto emi edịm itiat okosụhọde;+ ndien awawa ikọn̄ ndomokiet isụhọke ke eto, ikọn̄ ndomokiet inyụn̄ isụhọke ke in̄wan̄ ke ofụri isọn̄ Egypt.+
16 Ntre Pharaoh ọsọsọp okot Moses ye Aaron ẹdi onyụn̄ ọdọhọ ete: “Mmanam idiọkn̄kpọ ndue mbufo ye Jehovah Abasi mbufo.+
17 Ndien ke emi, mbọk, ẹdahado ẹnọ+ mi ke idiọkn̄kpọ mi ini kiet emi ẹnyụn̄ ẹkpe+ Jehovah Abasi mbufo ubọk ẹte emen ufen n̄kpa emi ọkpọn̄ mi.”
18 Ntre enye ọwọrọ ọkpọn̄ Pharaoh onyụn̄ ekekpe Jehovah ubọk.+
19 Ekem Jehovah ọwọn̄ọde anam ata ọkpọsọn̄ ofụm edem usoputịn efịme, emen n̄kukun̄kpọyọriyọ emi efep onyụn̄ ọkpọri mmọ ọkọdọn̄ ke Ididuot Inyan̄. N̄kukun̄kpọyọriyọ ndomokiet ikosụhọke ke ofụri isọn̄ Egypt.
20 Edi Jehovah ayak esịt Pharaoh ọsọn̄,+ enye inyụn̄ iyakke nditọ Israel ẹnyọn̄ọ.
21 Ekem Jehovah ọdọhọ Moses ete: “Menede ubọk fo ke enyọn̄+ man ekịm ofụk isọn̄ Egypt—makmak ekịm.”
22 Moses ọsọsọp emenede ubọk ke enyọn̄ ndien makmak ekịm ofụk ofụri isọn̄ Egypt ke usen ita.+
23 Mmọ ikwe kiet eken, owo mmọ ndomokiet inyụn̄ idahake ikpọn̄ ebiet esie ke usen ita; edi kpukpru nditọ Israel ẹnyene un̄wana ke ebietidụn̄ mmọ.+
24 Ekem Pharaoh okot Moses onyụn̄ ọdọhọ ete: “Ẹka, ẹkenam n̄kpọ ẹnọ Jehovah.+ Mme erọn̄ mbufo ye mme enan̄ mbufo kpọt ẹdisụhọ. N̄kpri nditọ mbufo n̄ko ẹkeme nditiene mbufo n̄ka.”+
25 Edi Moses ọdọhọ ete: “Afo n̄ko ọyọnọ nnyịn mme uwa ye mme edifọp uwa, koro idida mmọ ifọp uwa inọ Jehovah Abasi nnyịn.+
26 Mme ufene nnyịn n̄ko ẹyetiene nnyịn ẹka.+ Nnyịn idisụhọke baba ufene kiet, koro nnyịn idida ndusụk ke otu mmọ inam n̄kpọ inọ Jehovah Abasi nnyịn,+ nnyịn inyụn̄ ifiọkke se ididade inam n̄kpọ inọ Jehovah ibọhọke nnyịn isịm do.”+
27 Ntem Jehovah ayak esịt Pharaoh ọsọn̄, ndien enye inyịmeke ndiyak mmọ ẹnyọn̄ọ.+
28 Ntre Pharaoh ọdọhọ enye ete: “Daha mi ke iso!+ Kpeme idemfo! Kûdomo ndikụt mi iso aba, koro ke usen eke afo edikụtde mi iso, afo ayakpa.”+
29 Ndien Moses ọbọrọ ete: “Yak edi nte afo ọdọhọde. Ndidomoke ndikụt fi iso aba.”+
