Exodus 11;1-10
11 Ndien Jehovah ọdọhọ Moses ete: “Ufen kiet osụhọ ami ndimia Pharaoh ye Egypt. Enye oro ama ebe, enye ayayak mbufo ẹwọn̄ọ mi ẹnyọn̄ọ.+ Ke ini enye ediyakde mbufo ẹda ofụri se ẹnyenede ẹnyọn̄ọ, ke nditịm ntịn̄, enye edibebịn mbufo osion̄o ke ebiet emi.+
2 Tịn̄, ndien, nọ mbon oro ete yak eren eben̄e ufan esie, n̄wan onyụn̄ eben̄e ufan esie, n̄kpọ silver ye n̄kpọ gold.”+
3 Ndien Jehovah anam nditọ Egypt ẹfọn mmọ mfọn.+ Moses onyụn̄ okpon etieti ke isọn̄ Egypt, ke enyịn mme asan̄autom Pharaoh ye ke enyịn mme owo.+
4 Ndien Moses ọdọhọ ete: “Ntem ke Jehovah ọdọhọ ete, ‘Ke ufọt okoneyo ami nyọwọrọ nsan̄a ke Egypt,+
5 ndien kpukpru akpan+ ke isọn̄ Egypt ẹyekpan̄a, ọtọn̄ọde ke akpan Pharaoh emi etiede ke ebekpo esie tutu esịm akpan ofụn an̄wan emi ọkọkde n̄kpọ ke itiat ye kpukpru akpa nditọ ufene.+
6 Ndien akwa ntuan̄a oyodu ke ofụri isọn̄ Egypt, kpa orụk oro akanam mîdụhe, emi mîdinyụn̄ idụhe aba.+
7 Edi baba ebua kiet idikpọike nditọ Israel, ọtọn̄ọde ke owo tutu esịm unam;+ man mbufo ẹkpefiọk ẹte ke Jehovah ekeme ndinam ubahade odu ke ufọt nditọ Egypt ye nditọ Israel.’+
8 Ndien kpukpru mme asan̄autom fo emi ẹyesụhọde ẹtiene mi ẹnyụn̄ ẹdiduọ ke isọn̄ ẹnọ mi,+ ẹnyụn̄ ẹdọhọ ẹte, ‘Nyọn̄, afo ye kpukpru owo emi ẹtienede fi.’ Ndien ke oro ebede ami nyọnyọn̄.” Ndien enye ọwọrọ ọkpọn̄ Pharaoh ke ọkpọsọn̄ iyatesịt.
9 Ekem Jehovah ọdọhọ Moses ete: “Pharaoh idikpan̄ke utọn̄ inọ mbufo,+ man mme utịben̄kpọ mi ẹkpewak ke isọn̄ Egypt.”+
10 Ndien Moses ye Aaron ẹnam kpukpru mme utịben̄kpọ emi ke iso Pharaoh;+ edi Jehovah ayak esịt Pharaoh ọsọn̄, enye inyụn̄ iyakke nditọ Israel ẹwọn̄ọ ke isọn̄ esie ẹnyọn̄ọ.+
