Exodus 12;1-51
12 Ndien Jehovah ọdọhọ Moses ye Aaron ke isọn̄ Egypt ete:
2 “Ọfiọn̄ emi edidi ntọn̄ọ ọfiọn̄ ọnọ mbufo. Enye edidi akpa ọfiọn̄ ke isua ọnọ mbufo.+
3 Ẹdọhọ ofụri esop Israel ẹte, ‘Ke ọyọhọ usen duop ke ọfiọn̄ emi yak mmọ kiet kiet ẹda eyen ufene kiet+ ẹnọ ufọk mme ete mmọ, eyen ufene kiet ke ufọk kiet.
4 Edi edieke ufọk ekpride akaha ndita eyen ufene kiet mma, do enye ye mbọhọidụn̄ esie ẹnyene ndibuana eyen ufene emi nte ekemde ye ibat ukpọn̄ emi ẹdude ke ubon mmọ; mbufo ẹda eyen ufene eke ekemde se ẹdidemede ẹnọ owo kiet kiet ata.
5 Eyen ufene oro enyene ndiye idem,+ edi ayara, onyụn̄ ọyọhọ isua kiet.+ Mbufo ẹsio enye ke otu okukịm erọn̄ m̀mê ke otu ebot.
6 Ndien mbufo ẹtịm enye ẹnịm tutu esịm ọyọhọ usen duopenan̄ ke ọfiọn̄ emi,+ ndien ofụri esop Israel ẹnyene ndiwot enye ke mbubreyo.*+
7 Ndien mmọ ẹnyene ndida ubak iyịp oro nsịme ke obubọk enyịnusụn̄ ye ke ndori enyịnusụn̄ ufọk emi mmọ ẹdidude ẹta unam oro.+
8 “‘Ndien mmọ ẹnyene ndita unam emi ke okoneyo oro.+ Mmọ ẹdifọfọp enye ke ikan̄ ẹta ye uyo eke leaven mîdụhe+ ọkọrọ ye ndotndot ikọn̄.+
9 Ẹkûta enye ndisi, ẹkûsọsọbọ, ẹkûnyụn̄ ẹtem ke mmọn̄, edi ẹfọfọp enye ke ikan̄, ibuot esie ọkọrọ ye ukot ye nsia.
10 Ẹkûyak ndomokiet osụhọ eyo esiere, edi ẹfọp se isụhọde ke ikan̄.+
11 Ntem ke mbufo ẹdita enye, ẹbọbọ mbọbọ ke isịn mbufo,+ ẹsịne ikpaukot+ ke ukot ẹnyụn̄ ẹkama esan̄ ke ubọk; mbufo ẹnyụn̄ ẹsọsọp ẹta enye. Enye edi passover Jehovah.+
12 Ndien nyasan̄a mbe ke isọn̄ Egypt okoneyo emi+ nnyụn̄ n̄wot kpukpru akpan ke isọn̄ Egypt, ọtọn̄ọde ke owo tutu esịm unam;+ nyonyụn̄ mbiere ikpe nnọ kpukpru mme abasi Egypt.+ Ami ndi Jehovah.+
13 Ndien iyịp oro edidi idiọn̄ọ ọnọ mbufo ke ufọk emi mbufo ẹdude; ndien ami nyokụt iyịp oro nnyụn̄ nsan̄a mbe mbufo,+ ndien ufen nsobo oro idisịmke mbufo ke ini ndibiatde isọn̄ Egypt.
14 “‘Ndien mbufo ẹnyene nditi usen emi, mbufo ẹnyụn̄ ẹnyene ndinịm enye nte usọrọ nnọ Jehovah ke ofụri emana mbufo. Mbufo ẹdinịm enye nte nsinsi ewụhọ.
15 Mbufo ẹdita uyo eke leaven mîdụhe ke usen itiaba. Ih, ke akpa usen mbufo ẹnyene ndision̄o ndomuyo eke leaven odude mfep ke ufọk mbufo, koro owo ekededi emi adiade se leaven odude, ọtọn̄ọde ke akpa usen tutu esịm ọyọhọ usen itiaba,+ ẹnyene ndisịbe ukpọn̄ oro mfep ke Israel.+
16 Ndien mbufo ẹnyene ndinịm edisana mbono ke akpa usen, ẹnyụn̄ ẹnyene ndinịm edisana mbono+ ke ọyọhọ usen itiaba. Owo idinamke utom ndomokiet ke esịt.+ Ke mîbọhọke se kpukpru ukpọn̄ ẹdidiade, oro ikpọn̄ ke mbufo ẹdinam.+
17 “‘Ndien mbufo ẹnyene ndinịm usọrọ uyo eke leaven mîdụhe,+ koro ke usen emi ke ndida ofụri udịm mbufo n̄wọrọ ke isọn̄ Egypt. Mbufo ẹnyụn̄ ẹnyene ndinịm usen emi ke ofụri emana mbufo nte nsinsi ewụhọ.
18 Ke akpa ọfiọn̄, ke ọyọhọ usen duopenan̄, ke mbubreyo ke mbufo ẹdita uyo eke leaven mîdụhe tutu esịm mbubreyo+ ọyọhọ usen edịp ye kiet ke ọfiọn̄ oro.
19 Ndomuyo eke leaven odude inyeneke ndidu ke ufọk mbufo ke usen itiaba, koro owo ekededi eke editabide se leaven odude, edide enye edi esenowo m̀mê amanaisọn̄,+ ẹnyene ndisịbe ukpọn̄ oro mfep ke otu esop Israel.+
20 Mbufo inyeneke ndita se ededi emi leaven odude. Mbufo ẹnyene ndita uyo eke leaven mîdụhe ke ofụri ebietidụn̄ mbufo.’”
21 Moses ọsọsọp okot kpukpru mbiowo Israel+ onyụn̄ ọdọhọ mmọ ete: “Mbufo ẹsion̄o n̄kpri ufene ẹdi nte ubon mbufo ẹdide, ẹnyụn̄ ẹwot unam+ passover.
22 Mbufo ẹnyụn̄ ẹda ebek hyssop+ ẹdebi ke iyịp emi odude ke besịn ẹnyụn̄ ẹsịme enye ke ndori enyịnusụn̄ ye ke obubọk enyịnusụn̄; owo mbufo baba kiet okûnyụn̄ ọwọrọ ke ufọk esie tutu eyo esiere.
23 Ekem ke ini Jehovah asan̄ade ebe ndimia nditọ Egypt ufen onyụn̄ okụtde iyịp oro ke ndori enyịnusụn̄ ye ke obubọk enyịnusụn̄, Jehovah ayasan̄a ebe enyịnusụn̄ oro, enye idinyụn̄ iyakke nsobo odụk ufọk mbufo edinọmọ mbufo.+
24 “Ndien mbufo ẹnyene ndinịm n̄kpọ emi nte ewụhọ+ emi enyenede mbufo ye nditọ mbufo ke nsinsi.+
25 Ndien ama ekem ke ini mbufo ẹdisịmde isọn̄ emi Jehovah edinọde mbufo, kpa nte enye ọkọdọhọde, mbufo ẹnyene ndinam edinam emi.+
26 Ndien ama ekem ke ini nditọ mbufo ẹdibụpde mbufo ẹte, ‘Nso ke edinam emi ọwọrọ ọnọ mbufo?’+
27 do mbufo ẹnyene ndidọhọ ẹte, ‘Enye edi uwa passover Jehovah,+ emi akasan̄ade ebe ufọk nditọ Israel ke Egypt ke ini enye amiade nditọ Egypt ufen, edi anyan̄ade mme ufọk nnyịn.’”
Ekem mbio oro ẹnụhọ ẹnyụn̄ ẹduọn̄ọ ke isọn̄.+
28 Ntre nditọ Israel ẹka ẹkenam kpa nte Jehovah eketemede Moses ye Aaron.+ Mmọ ẹnam kpa ntre.
29 Edikem ke ufọt okoneyo, Jehovah owot kpukpru akpan ke isọn̄ Egypt,+ ọtọn̄ọde ke akpan Pharaoh emi etiede ke ebekpo esie tutu esịm akpan ofụn emi odude ke ufọk-n̄kpọkọbi idakisọn̄, ye kpukpru akpa nditọ ufene.+
30 Ndien Pharaoh edemede ke okoneyo, enye ye kpukpru mme asan̄autom esie ye kpukpru nditọ Egypt eken; ndien akwa ntuan̄a odu ke otu nditọ Egypt,+ koro baba ufọk kiet ikodụhe eke owo mîkakpaha.
31 Ndien enye ọsọsọp okot+ Moses ye Aaron ke okoneyo oro onyụn̄ ọdọhọ ete: “Ẹdaha ke enyọn̄, ẹwọn̄ọ ke otu ikọt mi, mbufo ye nditọ Israel eken, ẹnyụn̄ ẹka, ẹkenam n̄kpọ ẹnọ Jehovah, kpa nte mbufo ẹdọhọde.+
32 Ẹda erọn̄ ye enan̄ mbufo, kpa nte mbufo ẹdọhọde,+ ẹnyụn̄ ẹka. Mbufo ẹnyụn̄ ẹdiọn̄ mi n̄ko.”
33 Ndien nditọ Egypt ẹtọn̄ọ ndikpak mbon oro nnyụn̄ nnam mmọ ẹsọp ẹwọn̄ọ+ ke isọn̄ oro ẹnyọn̄ọ, “koro,” nte mmọ ẹkedọhọde, “nnyịn imekpere ndikpan̄a!”+
34 Ntre mmọ ẹda ndomuyo mmọ ẹwọn̄ọ mbemiso ofụtde, ẹnyụn̄ ẹbọp n̄kpọ unuak ndomuyo mmọ ke ọfọn̄ mmọ ẹdori ke afara.
35 Ndien nditọ Israel ẹnam ke uyo Moses ẹnyụn̄ ẹben̄e nditọ Egypt mme n̄kpọ silver ye mme n̄kpọ gold ye ọfọn̄.+
36 Ndien Jehovah anam nditọ Egypt ẹfọn mbon emi mfọn,+ tutu mmọ ẹnọ mbon emi se ededi emi mmọ ẹben̄ede;+ mmọ ẹnyụn̄ ẹbụme n̄kpọ nditọ Egypt.+
37 Ndien nditọ Israel ẹkpọn̄ Rameses+ ẹka Succoth,+ mmọ ẹwak ẹsịm irenowo tọsịn ikie itiokiet emi ẹsan̄ade ke ukot, owo ibatke nditọwọn̄.+
38 Ndien akwa mbuaha udịmowo+ ẹnyụn̄ ẹtiene mmọ ẹdọk, ọkọrọ ye erọn̄ ye enan̄, ata ediwak ufene.
39 Ndien mmọ ẹtọn̄ọ ndisan̄ ndomuyo oro mmọ ẹkedade ẹwọrọ ke Egypt ẹnam ekara uyo eke leaven mîdụhe, koro enye mîkofụtke, sia ẹkebebịn mmọ ẹsion̄o ke Egypt, mmọ ikonyụn̄ ikemeke ndibiat ini, ikonyụn̄ itịmke baba n̄kpọ kiet inọ idemmọ.+
40 Ndien uniọn̄ ini emi nditọ Israel ẹkedụn̄de, mmọ emi ẹkedụn̄de+ ke Egypt,+ ekedi isua ikie inan̄ ye edịp ye duop.+
41 Edikem ke utịt isua ikie inan̄ ye edịp ye duop, usen emi ke ofụri udịm ikọt Jehovah ẹkewọn̄ọ ke isọn̄ Egypt.+
42 Emi edi okoneyo emi ẹnyenede ndinịm nnọ Jehovah koro enye akadade mmọ ọwọrọ ke isọn̄ Egypt. Kpukpru nditọ Israel ẹnyene ndinịm okoneyo emi nnọ Jehovah ke ofụri emana mmọ.+
43 Ndien Jehovah ọdọhọ Moses ye Aaron ete: “Emi edi ewụhọ passover:+ Owo esenidụt ikemeke ndidia enye.+
44 Edi edieke ofụn eren emi ẹkedepde ke okụk odude, ẹnyene ndinịm enye mbobi.+ Do ndien ke enye ekeme ndidia.
45 Esenowo ye owo eke ẹkpede utom ikemeke ndidia.
46 Ẹdidu ke ufọk kiet ẹdia. Ẹkûda unam emi baba kiet ẹwọrọ ke ufọk oro ẹka an̄wa. Ẹkûnyụn̄ ẹbụn̄ ọkpọ esie baba kiet.+
47 Ofụri esop Israel ẹnyene ndinịm enye.+
48 Ndien edieke esenowo odụn̄de ye afo, enye onyụn̄ oyomde ndinịm passover nnọ Jehovah, yak ẹnịm kpukpru irenowo ke ufọk esie mbobi.+ Do ndien ke enye ekeme ndisan̄a n̄kpere nnyụn̄ nnịm enye; ndien enye eyetie nte amanaisọn̄. Edi eren eke mînaha mbobi ikemeke ndidia.
49 Ibet kiet edidu ọnọ amanaisọn̄ ye esenowo emi odude ke otu mbufo.”+
50 Ntre kpukpru nditọ Israel ẹnam kpa nte Jehovah eketemede Moses ye Aaron. Mmọ ẹnam kpa ntre.+
51 Ndien ke usen oro Jehovah osion̄o nditọ Israel ye ofụri udịm mmọ+ efep ke isọn̄ Egypt.
Mme Ikọ Idakisọn̄
^ At. Ed., “ke ufọt mbubreyo iba.”
